ކުޑަކުދިންނާ ގުޅޭ ކޮންމެ ހަތަރު މައްސަލައަކުން އެއް މައްސަލައަކީ ޖިންސީ ހާނީއްކައިގެ މައްސަލައެއް!
20 ޖެނުއަރީ 2020 | ހޯމަ 18:352019ގެ ނޮވެމްބަރު މަހު ނިޔަލަށް ޖިންސީ ހާނީއްކައިގެ 333 މައްސަލައެއް ހުށައަޅާފައިވޭ
ޖިންސީ ގޯނާގެ ޝިކާރައަކަށް ވެފައިވާ ކުޑަކުއްޖަކު ރަމްޒުކޮށްދޭ މަންޒަރެއް
ކުޑަކުދިންނަށް ކުރާ އެކިކަހަލަ އަނިޔާތަކާއި ގުޅޭގޮތުން ޖެންޑަރ މިނިސްޓްރީއަށް ހުށައެޅޭ މައްސަލަތަކުގެ ތެރެއިން، ކޮންމެ ހަތަރު މައްސަލައަކުން އެއް މައްސަލައަކީ ޖިންސީ ހާނީއްކައިގެ މައްސަލައެއްކަން ހާމަވެއްޖެއެވެ.
ޖެންޑަރ މިނިސްޓްރީން މަހަކު އެއްފަހަރު އާންމުކުރާ ތަފާސްހިސާބުތަކަށް ބަލާއިރު، 2019 ވަނަ އަހަރުގެ ނޮވެމްބަރު މަހުގެ ނިޔަލަށް ކުޑަކުދިންނަށް ކުރާ އަނިޔާތަކާ ގުޅޭ 1238 މައްސަލައެއް ވަނީ ހުށައެޅިފައެވެ. އޭގެތެރެއިން 333 މައްސަލައަކީ ޖިންސީ ހާނީއްކައިގެ މައްސަލަތަކެވެ.
ކުޑަކުދިންނަށް ކުރާ އަނިޔާތަކުގެ މައްސަލަތަކުގެ ތެރެއިން ޖެންޑަރ މިނިސްޓްރީއަށް އެންމެ ގިނައިން ހުށައެޅި, އެ ވުޒާރާއިން އެންމެ ގިނައިން އެޓެންޑްކޮށްފައިވަނީ އިހުމާލުގެ މައްސަލަތަކަށެވެ. އެގޮތުން އިހުމާލުގެ ޖުމްލަ 344 މައްސަލައަކަށް އެވުޒާރާއަށް ހުށައެޅުމުން އެޓެންޑްކޮށްފައިވެއެވެ.
2018 ވަނަ އަހަރަށް ބަލާއިރު، އެ އަހަރުގެ ތެރޭގައިވެސް ޖިންސީ ހާނީއްކައިގެ 358 މައްސަލައެއް ހުށައެޅިފައިވެއެވެ. އަދި 2017 ވަނަ އަހަރު 418 މައްސަލައެއް ހުށައެޅިފައިވެއެވެ.
މިފަހުން ދެކުނުގެ ރަށެއްގައި، އެންމެ ދެ އަހަރުގެ ތުއްތު ކުއްޖަކު ރޭޕްކުރި މައްސަލައެއް ފެންމަތިވުމާއި ގުޅިގެން ޖިންސީ ހާނީއްކައިގެ މައްސަލަތައް ވަނީ ގިނަ ބައެއްގެ ސަމާލުކަމަށް އައިސްފައެވެ. އަދި މިފަދަ ކުދިންނަށް ރައްކާތެރިކަމާއި، އިންސާފު ހޯދައި ދިނުމަށް އާންމުން އަންނަނީ ގޮވާލަމުންނެވެ.
މިފަދަ ލާއިންސާނީ ކުށްތަކަށް އަރައިގަންނަ ފަރާތްތަކަށް ގާނޫނުގައިވާ އެންމެ ހަރުކަށި އަދަބު ދިނުމަށާއި، މުޖުތަމައުގެ ސަލާމަތާއި ރައްކާތެރިކަން ކަށަވަރު ނުކޮށްދެވޭ މައްސަލައިގެ ގިނަ ބައެއްގެ ފާޑުކިޔުން ވަނީ ސަރުކާރަށާއި ދައުލަތުގެ މުއައްސަސާތަކަށް ރައްދުވެފައެވެ. އަދި އިހުމާލުވީ ފަރާތްތަކުގެ އިސްތިއުފާއަށްވެސް ގިނަ ބަޔަކު އަންނަނީ ގޮވާލަމުންނެވެ.
