ވެކްސިން ނުޖަހާ ކުޑަ ކުދިންގެ ދަފްތަރު ޑިޖިޓަލައިޒް ކުރަނީ
20 ޖެނުއަރީ 2020 | ހޯމަ 08:15ޑިޖިޓަލް ޑޭޓާ ބޭސް ގާއިމްކުރުމުގެ މަސައްކަތް ވަނީ ފަށާފައި
ހިމަބިއްސަށް ވެކްސިން ޖެހުމަށް ހެލްތް މިނިސްޓްރީ އިލްތިމާސްކުރޭ
ހިމަބިހި ނުވަތަ މީސަލްސްއަށް ވެކްސިން ނުޖަހާ 18 އަހަރުން ދަށުގެ ކުދިން ދެނެގަނެގަތުމަށް ޑިޖިޓަލް ޑާޓާ ބޭސްއެއް ޤާއިމް ކުރަން ނިންމަވާފަވާ ކަމަށް ހެލްތު މިނިސްޓްރީން ބުނެފިއެވެ.
ހިމަބިހި ނައްތާލުމަށް ހެލްތު މިނިސްޓްރީން ކުރަމުންދާ އެންމެފަހުގެ މަސައްކަތްތަކުގެ މަޢުލޫމާތު ހިއްސާކުރައްވާ ހެލްތު މިނިސްޓްރީގެ ސީނިއަރ ޕޮލިސީ ޑިރެކްޓަރ ހަސަން ޝިޔާމް ވިދާޅުވީ ހިމަބިއްސައް ވެކްސިން ނުޖަހާ ކުދިންގެ ދަފްތަރު އެކުލަވާލުމުގެ މަސައްކަތްތައް ކުރިއަށްދާ ކަމަށާއި، މިހާރު ޑިޖިޓަލް ޑާޓާ ބޭސްއެއް ޤާއިމު ކުރަން ނިންމާފައިވާ ކަމަށެވެ.
ހެލްތު މިނިސްޓަރ ޢަބްދުﷲ އަމީން ހުރިހާ މަސައްކަތްތަކެއް ކުރިއަށްދާގޮތް ބެއްލެވުމުގައި ވަރަށް ގާތުން މޮނިޓަރ ކުރައްވާކަން ފާހަގަކުރައްވައި ޝިޔާމް ވިދާޅުވީ އާދިއްތަ ދުވަހު ވެސް އެންސީއައިޓީގެ ބޭފުޅުންނާ ބައްދަލުކުރައްވާ، ދަފްތަރު ޑިޖިޓަލް ޑާޓާ ބޭސްއެއްގެ ގޮތުގައި ޤާއިމު ކުރުމުގެ މަސައްކަތްތަކާ ބެހޭ ގޮތުން މަޝްވަރާ ކުރެއްވި ކަމަށެވެ. އަދި ޑިޖިޓަލް ޑޭޓާ ބޭސްގެ މަސައްކަތްތައް އާދިއްތަ ދުވަހު ފަށާނެކަމުގެ ޔަޤީން މިނިސްޓަރު ދެއްވި ކަމަށް ޝިޔާމް ވިދާޅުވިއެވެ.
މިމަހުގެ 08 ދުވަހު ހިމަބިހި ފެނިފައިވާއިރު، މިހާތަނަށް ހަތަރު މީހަކު ވަނީ ހިމަބިއްސައް ފޮޒިޓިވްވެފައެވެ.
ބަލި ފެނުމާއެކު، ހެލްތު މިނިސްޓްރީއާ ހެލްތު ޕްރޮޓެކްޝަން އެޖެންސީ ގުޅިގެން ދަނީ ހިމަބިއްސަށް ޝައްކު ކުރެވޭ ފަރާތްތަށް ޓެސްޓު ކުރަމުންނެވެ. އަދި ބައްޔަށް ޝައްކުވާ ފަރާތްތަކުން ވެކްސިން ޖެހުމަށް ހެލްތު މިނިސްޓްރީން ވަނީ އިލްތިމާސް ކޮށްފައެވެ.
ހުރިހާ އަތޮޅެއްގެ ޞިއްޙީ ޚިދުމަތްދޭ ތަންތާގައި ވެކްސިން ދިނުމުގެ މަސައްކަތް ފަށާއިވާއިރު، ރަށްރަށުގައި ތިބި މީސަލްސް ގެ ދެ ޑޯޒް ހަމަނުވާ 18 އަހަރުން ދަށުގެ ކުދިން ދެނެގަނެ ވެކްސިން ދިނުމުގެ މަސައްކަތްވެސް ހެލްތު މިނިސްޓްރީން ވަނީ ފަށާފައެވެ. އަދި ހިމަބިއްސަށް ސްކްރީންކުރުމަށާއި، ވެކްސިން ދޭނެ ސެންޓަރެއް ހުޅުމާލޭގަޔާއި މާލޭގައި މިހާރު ވަނީ ޤާއިމުކޮށް ޚިދުމަތްދޭން ފަށާފައެވެ.
ރާއްޖެއަކީ ހިމަބިހި ނައްތާލާފައިވާ ޤައުމެއްގެ ގޮތުގައި ދުނިޔޭގެ ޞިއްޙަތު ޖަމްޢިއްޔާއިން ކަނޑައަޅާ އިޢުލާންކޮށްފައި ވަނީ 13 ޖޫން 2017 ގައެވެ.
ގައިންގައިން އަރާ ބަލިތަކުން ތުއްތު ކުދިން ރައްކާތެރިކުރުމަށް ރާއްޖޭގައި ވެކްސިންދޭން ފަށާފައި ވަނީ 1976 ވަނަ އަހަރުއެވެ. އަދި ހިމަބިހިން ރައްކާތެރިވުމަށް މީސްލްސް ވެކްސިން ދޭން ފަށާފައި ވަނީ 1983 ވަނަ އަހަރުއެވެ. ދިވެހިރާއްޖެއިން މީސްލްސް ޖެހިފައިވާ މީހަކު އެންމެ ފަހުން ފެނިފައިވަނީ 2009 ވަނަ އަހަރެވެ.
