އަޅުގަނޑަކީ މިކަން ކުރެވޭނެ މީހާ ކަމަށް، އަމިއްލަ ނަފްސަށް އިތުބާރު އެބައޮތް: ޝިދާތާ
18 ޖެނުއަރީ 2020 | ހޮނިހިރު 17:09ރައްޔިތުންގެ އަޑުއެހުމުގެ ގާބިލްކަށް އެބަހުރި
މިއަދު ބޭއްވި ނޫސްވެރިންގެ ބައްދަލުވުމުގައި ޖެންޑަރ މިނިސްޓަރު ޝިދާތާ ޝަރީފް
ދެއަހަރުގެ ކުޑަކުއްޖަކަށް ޖިންސީ އަނިޔާދިން މައްސަލަ ފެންމަތިވެ، ޖެންޑަރ، ފެމިލީ އެންޑް ސޯޝަލް ސަރވިސަސް މިނިސްޓަރު ޝިދާތާ ޝަރީފްއާމެދު ބަޔަކު މީހުން ނުރުހުން ފާޅުކޮށް، އިސްތިއުފާ ދެއްވުމަށް ގޮވާލަމުންދާތީ، އެކަމުގެ ރައްދު ޝިދާތާ ދެއްވައިފި އެވެ.
ދެ އަހަރުގެ ކުޑަކުއްޖަކަށް ޖިންސީ އަނިޔާ ދިން މައްސަލާގައި ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމުގައި ޝިދާތާ ވިދާޅުވީ، އެކަމަނާ މަގާމުގެ ޒިންމާ އަދާކުރައްވަމުން ގެންދަވާ އަދި މަގާމުގެ ޒިންމާ އަދާކުރެއްވޭނެ ކަމުގެ އިތުބާރު އެކަމަނާގެ އަމިއްލަ ނަފްސައްވެސް އެބައޮތް ކަމަށާއި އެކަމަނާއަކީ "މިކަންކުރެވޭނެ މީހާ" ކަމަށް ވިދާޅުވެފަ އެވެ.
ޝިދާތާ ވިދާޅުވީ، އެކަމަނާ ޖެންޑަރ މިނިސްޓަރު ކަމާ ހަވާލުވެ، އެމިނިސްޓްރީގެ މެންޑޭޓްގައި ހުރި ކަންކަން ކުރުމުގައާއި ނިޒާމު ހަރުދަނާ ކުރުމަށް ވަރަށް ގިނަ މަސައްކަތްތަކެއް ކުރެވެމުންދާ ކަމަށާއި އަދި މިހާތަނަށް ބައެއް ކަންކަން ކާމިޔާބުކަމާއެކު ކޮށް ނިންމާލާފައިވެސްވާ ވާކަމަށެވެ. އެހެންކަމުން ހާސިލް ކުރެވިފައިވާ ކާމިޔާބީތައްވެސް ވަރަށް ގިނަ ކަމަށް ޝިދާތާ ވިދާޅުވި އެވެ.
ޝިދާތާ ވިދާޅުވީ، ސަރުކާރުގެ ހުރިހާ މުއައްސަސާތަކާއެކު މިސަރުކާރުން ހާސިލްކުރަން ބޭނުންވާ ކަންކަން ހާސިލްކޮށް، ރާއްޖެ ހަމަމަގަށް އަޅުވާނެ ކަމަށެވެ. އަދި ރައްޔިތުންގެ ހުރި ކަންބޮޑުވުންތައް މިސަރުކާރުން އަޑު އަހާނެ ކަމަށާއި އެކަމަނާ ވެސް ރައްޔިތުންގެ އަޑު އައްސަވާނެ ކަމަށެވެ.
ޝިދާތާ ވިދާޅުވީ ކުޑަކުދިންނަށް ޖިންސީ ގޯނާ އަދި ޖިންސީ އަނިޔާގެ މައްސަލަތަކަކީ އަބަދުވެސް އިވެމުންދާ ވާހަކަތަކެއް ކަމަށެވެ. އެގޮތުން މި ސަރުކާރުން މިހާރު އެމައްސަލަތަކަށް އަވަސް ހައްލެއް ގެނައުމަށް ކުރަމުންދާ މަސައްކަތުގެ ތެރެއިން، ކުރިއާ އަޅާބަލާއިރު، އެފަދަ މައްސަލަތައް ބަލާ، ފިޔަވަޅު އަޅާލެއް ކުރިއަށްވުރެ އަވަސްވެފައި، އެކުދިންނަށް ފޯރުކޮށްދޭންޖެހޭ ހިމާޔަތާއި ރައްކާތެރިކަން ފޯރުކޮށްދިނުމުގައި އަވަސް ފިޔަވަޅުތަކެއް އަޅަމުންދާ ކަމަށެވެ.
