ފަސް އަހަރުގެ ކުއްޖަކަށް ޖިންސީ ގޯނާކުރި މައްސަލައެއް ބަލަނީ!
18 ޖެނުއަރީ 2020 | ހޮނިހިރު 13:13ފަސް އަހަރުގެ ކުއްޖަކަށް 56 އަހަރުގެ ދިވެހި ފިރިހެނަކު ޖިންސީ ގޯނާކުރިކަމުގެ މައްސަލަ އެއް ދަނީ ބަލަމުން
ކުޑަކުއްޖަކަށް ޖިންސީ އަނިޔާލިބޭކަން ރަމްޒުކޮށްދޭ ޕޯސްޓަރެއް
ދެކުނުގެ އަތޮޅެއްގެ ރަށެއްގައި ފަސް އަހަރުގެ ކުއްޖަކަށް، 56 އަހަރުގެ ދިވެހި ފިރިހެނަކު ޖިންސީ ގޯނާކުރިކަމުގެ މައްސަލަ އެއް ބަލަމުންދާކަމަށް ފުލުހުން ބުނެފި އެވެ.
ފުލުހުން ބުނީ މިމައްސަލަ ފުލުހުންނަށް ހުށަހަޅާފައިވަނީ ހުކުރު ދުވަހުގެ ރޭގެ ވަގުތެއްގައި ކަމުގައެވެ. އަދި މިމައްސަލައާއި ގުޅިގެން ފުލުހުން ބަލަންޖެހޭ ކަންކަން ބަލަމުންދާކަމަށް ފުލުހުން ވަނީ ބުނެފަ އެވެ.
މިމައްސަލަގާއި ތުހުމަތުކުރެވޭ މީހާގެ މައުލޫމާތެއް ފުލުހުން ހާމައެއް ނުކުރެ އެވެ. ދެކުނުގެ އަތޮޅެއްގެ ރަށެއްގައި ފަސް އަހަރުގެ ކުއްޖަކަށް ޖިންސީ ގޯނާކުރިކަމުގެ މައްސަލަ އެއް ފެންމަތި ވެގެންމިދިޔައީ ގއ ކަނޑުހުޅުދޫގައި އުމުރުން 2 އަހަރުގެ ކުޑަކުއްޖަކަށް އެކުއްޖާގެ ބައްޕަ އާއި ކާޕަ އާއި މުނިކާފަ ޖިންސީ އަނިޔާކޮށްފައިވާ މައްސަލަ ހޫނުވެފައި ވަނިކޮށެވެ.
މިމައްސަލާގައި މި ތިން މީހުންވެސް މިހާރުވަނީ ފުލުހުންގެ ބެލުމުގެ ދަށަށް ގެނެސްފަ އެވެ.
މީގެއިތުރުން މިކަން ކުށްވެރިކުރައްވާ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވަނީ ކަމާބެހޭ ފަރާތްތަކާއި ބައްދަލުކުރައްވާ އަނިޔާ ލިބިފައިވާ ކުއްޖާއަށް އިންސާފު ހޯދައިދިނުމަށާއި ކުށްވެރިންނަށް ހައްގު އަދަބު ދިނުމަށް އެ މައްސަލަ ވީހާ ވެސް ރަނގަޅަށް ބައްލަވައިދެއްވުމަށް ވަނީ އެދިވަޑައިގަންފައެވެ.
މީގެއިތުރުން މިމައްސަލަ ރައްޔިތުންގެ މަޖިލީހުގެ ހިޔުމަން ރައިޓްސް އެންޑް ޖެންޑަރ ކޮމިޓީންވެސް އަންނަނީ ބަލަމުންނެވެ.
