އެސްޓީއޯއަށް ފައިދާގެ ގޮތުގައި 400 މިލިއަން ރުފިޔާ
16 ޖެނުއަރީ 2020 | ބުރާސްފަތި 07:55އަމާޒަކީ މިއަހަރުތެރޭ ކުންފުނީގެ ފައިދާ 500 މިލިއަން ރުފިޔާއަށް އިތުރުކުރުން
އެސްޓީއޯގެ މެނޭޖިންގ ޑިރެކްޓަރ ހުސެއިން އަމްރު
ސްޓޭޓް ޓްރޭޑިންގ އޯގަނައިޒޭޝަން އެސްޓީއޯއަށް މިދިޔަ އަހަރު 400 މިލިއަން ރުފިޔާ ފައިދާގެ ގޮތުގައި ލިބިފައިވާކަމަށް އެސްޓީއޯ އިން ހާމަކޮށްފިއެވެ.
އެސްޓީއޯގެ 55 ވަނަ އަހަރީ ޖަލްސާގައި ވާހަކަދައްކަވަމުން އެ ކުންފުނީގެ މެނޭޖިންގ ޑިރެކްޓަރ ހުސެއިން އަމްރު ވިދާޅުވީ 2019 ވަނަ އަހަރު އެކުންފުންޏަށް ފައިދާގެ ގޮތުގައި 400 މިލިއަން ރުފިޔާ ލިބުނު ކަމަށާއި، އެ ކުންފުނީގެ ޢަމާޒަކީ މިއަހަރުތެރޭ ކުންފުނީގެ ފައިދާ 500 މިލިއަން ރުފިޔާއަށް އިތުރުކުރުން ކަމަށެވެ.
އެސްޓީއޯގެ 2019 ވަނަ އަހަރުގެ މާލީ ހިސާބުތައް ދައްކާގޮތުން 3 ވަނަ ކުއާޓަރގައި އެސްޓީއޯއަށް ސާފު ފައިދާގެ ގޮތުގައި ލިބިފައިވަނީ 95 މިލިއަން ރުފިޔާއެވެ. މިއީ ދެވަނަ ކުއާރޓަރުގައި ލިބުނު 76.6 މިލިއަން ރުފިޔާއަށް ވުރެން 23 އިންސައްތަ އިތުރު ޢަދަދެކެވެ. 3 ވަނަ ކުއާޓަރުގައި އެސްޓީއޯއަށް ޢާމްދަނީގެ ގޮތުގައި ލިބުނީ 6.97 ބިލިއަން ރުފިޔާއެވެ. މިއީ 2018 ވަނަ އަހަރާއި އަޅާބަލާއިރު 131 މިލިއަން ރުފިޔާ އިތުރު ޢަދަދެކެވެ.
އެސްޓީއޯ އިން 2018 ވަނަ އަހަރު ލިބުނު ފައިދާއިން ޙިއްސާއަކަށް 58ރ. ބަހާފައެވެ.
