މާލޭގެ އެންމެ ޒަމާންވީ މަތީ ޘާނަވީ ތަޢުލީމު އުގަންނައިދޭ ސްކޫލްކަމަށްވާ، ސެންޓަރ ފޮރ ހަޔަރ ސެކަންޑަރީ އެޑިއުކޭޝަން (ސީއެޗްއެސްއީ) ހުޅުމާލެއަށް ބަދަލުކުރުމާ ބެހޭ މަޝްވަރާތައް ފަށައިފިއެވެ.

ސީއެޗްއެސްއީ ހުޅުމާލެއަށް ބަދަލުކުރުމުގެ މަޝްވަރާތައް ފަށާފައިވާއިރު، އެސްކޫލްގެ އާ އިމާރާތުގެ މަސައްކަތް ކޮންޓްރެކްޓަރ ވަނީ މަޑު ޖައްސާލާފައެވެ. އެސްކޫލުގެ ޢާ ޢިމާރާތް އެޅުމުގެ މަސައްކަތް ކުރަމުންދަނީ ރަޝީދު ކާޕެންޓްރީ އެންޑް ކޮންސްޓްރަކްޝަން (އާރްސީސީ) އާ ޙަވާލުކޮށްގެންނެވެ. އެގޮތުން އައު ޢިމާރާތް ކުރަމުންދަނީ ކުރީގައި ބޭނުންކުރަމުން ދިޔަ ބާ ޢިމާރާތް ތަޅާލުމަށްފަހުގައެވެ.

ސީއެޗްއެސްއީގައި 08 ބުރީގެ ޢިމާރާތެއް އެޅުމަށް އާރްސީސީއާ ޙަވާލުކޮށްފައިވަނީ 17 އޮކްޓޫބަރު 2019 ގައެވެ. މިމަޝްރޫޢު ޙަވާލުކުރީ 420 ދުވަހުގެ ތެރޭގައި ނިންމާ ގޮތަށް 33 މިލިއަން ރުފިޔާއަށެވެ.

މަޢުލޫމާތު ލިބިފައިވާ ގޮތުގައި، ސީއެޗްއެސްސީއަށް ހުޅުމާލެއިން ބިމެއް ދިނުމަށް ކުރަން ޖެހޭ ގިނަ މަސައްކަތްތައް މިހާރު ވަނީ ނިމިފައެވެ. އަދި ސީއެޗްއެސްއީ ހުޅުމާލެއަށް ބަދަލުކުރަން ނިންމީ ސީއެޗްއެސްއީ ހުންނަ ލިލީމަގު ބޮޑުކުރަން ސަރުކާރުން ނިންމާފައިވާތީ، އެސްކޫލުގެ ބޮޑު ބައެއް ގެއްލިގެންދާތީއެވެ. ނަމަވެސް މިކަން ރަސްމީ އެއްވެސް އިދާރާއަކުން ރަސްމީ ގޮތެއްގައި ހާމަކޮށްފައެއް ނުވެއެވެ.

1000 އަށްވުރެ ގިނަ ދަރިވަރުން މަތީ ޘާނަވީ ތަޢުލީމު ޙާޞިލުކުރަމުން އަންނަ ސީއެޗްއެސްއީ ހުޅުމާލެއަށް ބަދަލުކުރަން ނިންމި ނަމަވެސް ބަދަލުކުރަނީ ކޮން ޞަރަޙައްދަކަށް ކަމެއް އަދި ސާފެއްނުވެއެވެ.

ސައެންސް އެޑިއުކޭޝަން ސެންޓަރުގެ ނަމުގައި 1979 ވަނަ އަހަރު ،ކުރީގެ ރައީސް މައުމޫން ޢަބްދުލްގައްޔޫމް ހުޅުއްވައިދެއްވި މި ސްކޫލް، ސީއެޗްއެސްއީ ގެ ނަމަށް ބަދަލުކޮށްފައިވަނީ 2001 ވަނަ އަހަރުގެ ތެރޭގައެވެ.

ސީއެޗްއެސްސީ ހުޅުމާލެއަށް ބަދަލުކުރުމުގެ މަސައްކަތްތައް ފަށާފައިވާއިރު، މާލޭގެ ސްކޫލުތަކުގެ ޖާގައިގެ ދަތިތަކުގެ މައްސަލައަށް ޙައްލެއް ހޯދައިދޭނެ ކަމަށާއި، ދަރިވަރުން ތަޢުލީމު ޙާޞިލުކުރުމަށް އެކަށީގެންވާ މާޙައުލެއް ޤާއިމުކޮށްދޭނެ ކަމަށް ސަރުކާރުން ވަނީ ބުނެފައެވެ.