އަތޮޅު ފިހާރަތަކުން ލިބޭ އާމްދަނީގެ ފައިދާ އާއި ފްރީޒްކޮށްފައި ހުރި އެކައުންޓްތަކުގެ ފައިސާ ކައުންސިލްތަކަށް ދޫކުރަނީ

މިސަރުކާރު ހަވާލުވީ އިރު މާލޭގައި ހުރި އަތޮޅު ފިހާރަތަކުން ލިބޭ ފައިދާގެ އެއްވެސް މިންވަރެއް ކައުންސިލްތަކާ ޙިއްސާކޮށްފައި ނުވާ ކަމަށާއި، އެހެންކަމުން އެކަން ކުރައްވަމުން ގެންދަވާ ކަމަށް ފިނޭންސް މިނިސްޓަރ އިބްރާހީމް އަމީރު ވިދާޅުވެއްޖެއެވެ.

ހދ. ކުޅުދުއްފުށި ސިޓީގައި އެމްޑީޕީން އިންތިޒާމުކޮށްގެން ކުރިޔަށްގެންދާ "ތިލަދުންމަތި އިރުވައި ކޮންފެރެންސް" ގައި ކޮންފެރެންސްގެ ބައިވެރިން ކުރި ސުވާލަކަށް ޖަވާބު ދެއްވަމުން ފިނޭންސް މިނިސްޓަރ ވިދާޅުވީ، އަތޮޅު ފިހާރަތަކުގެ ފައިސާ އެންމެ ފަހުން ބަހާފައި ވަނީ 2014 ވަނަ އަހަރު ކަމަށާއި، އޭގެކުރިން އެކަން ކޮށްފައިވަނީ އެމްޑީޕީ ވެރިކަމުގައި ކަމަށެވެ. ނަމަވެސް މިސަރުކާރު އައުމަށް ފަހު މިސަރުކާރުން މިިދިޔަ އަހަރު އެ ފައިސާ ކައުންސިލްތަކަށް ބަހާފައިވާނެ ކަމަށް މިނިސްޓަރ ވިދާޅުވިއެވެ.

އެގޮތުން މިދިޔަ އަހަރު ބަހާފައި ވަނީ 2015 ވަނަ އަހަރުގެ ފައިސާ ކަމަށާއި، އަދިވެސް ފައިސާ އެބަހުރިކަމަށާއި، ނަމަވެސް އެއްފަހަރާ އެފައިސާތައް ދޫކުރެވެން ނެތްކަމަށް މިނިސްޓަރ ވިދާޅުވިއެވެ. ނަމަވެސް މިއަހަރު އަތޮޅު ފިހާރައިން ލިބޭ ޢާމްދަނީގެ ފައިދާ ކައުންސިލްތަކަށް ބަހާނެކަަމަށް މިނިސްޓަރ ވިދާޅުވިއެވެ. މީގެއިތުރުން މިނިސްޓަރ ވިދާޅުވީ ފްރީޒްކޮށްފައި ހުރި ކައުންސިލްތަކުގެ އެކުންޓުގައި ހުރި ފައިސާ ދޫކުރުމުގެ މަސައްކަތްވެސް ކުރައްވަމުން ގެެންދަވާކަމަށެވެ.

މީގެއިތުރުން މިނިސްޓަރ ވިދާޅުވީ ކައުންސިލްތަކުގެ ބަޖެޓުގެ ބާކީ ފައިސާ އެއީ ޢަމްދަނީ ގެ ގޮތުގައި ކައުންސިލްތަކަށް ދޫކުރަންޖެހޭ ފައިސާކަމަށާއި، ނަމަވެސް އެކަން އޮތީ ނުކޮށްކަމަށެވެ. މިސަރުކާރުން ފުރަތަމަ ފަހަރަށް 2019 ވަނަ އަހަރު އެކަން ކޮށްފައިވާކަމަށާއި މިއަހަރުވެސް އެކަން ކުރާނެ ކަމަށް މިނިސްޓަރ ވިދާޅުވި އެވެ.