ބިދޭސީންވެސް ވެކްސިންތައް ފުރިހަމަކުރުމަށް ލާޒިމްކުރަނީ
ވެކްސިން ޖެހުމުގެ ކަންތަކުގައި އުސޫލީ ގޮތުން ގެންނަންޖެހޭ ބަދަލުތަކެއް ގެންނާނެ
ހެލްތް މިނިސްޓަރު އަމީން އަބްދުﷲ އަމީން
ރާއްޖޭގައި މަސައްކަތްކުރާ ބިދޭސީންނަކީ މިގައުމުން ނައްތާލެވިފައިވާ ބަލިތަކާއި އަދި ގައިން ގަޔަށް އަރާ ބަލިތަކުން ރައްކާތެރިވުމަށް ދޭންޖެހޭ ވެކްސިންތައްދީފައިވާ ބަޔަކަށް ހެދުން ލާޒިމް ކުރުމުގެ މަސައްކަތްތައް ކުރަމުންދާ ކަމަށް ހެލްތު މިނިސްޓަރު އަބްދުﷲ އަމީން ވިދާޅުވެއްޖެއެވެ.
ރާއްޖޭގައި ހިމަބިހި ފެތުރެމުންދާކަން އިއުލާންކުރުމަށް ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި މިނިސްޓަރު އަމީން ވިދާޅުވީ، ބިދޭސީންނަށް ވެކްސިން ޖެހުމުގެ ކަންތަކުގައި އުސޫލީ ގޮތުން ގެންނަންޖެހޭ ބަދަލުތަކެއް ގެންނާނެ ކަމަށެވެ. އެގޮތުން ރާއްޖެއަށް މަސައްކަތްކުރަން އަންނަ ބިދޭސީންނަކީ ރާއްޖެއިން ނައްތާލެވިފައިވާ ބަލިތަކާއި އަދި ގައިން ގަޔަށް އަރާ ބަލިތަކުން ރައްކާތެރިވުމަށްޓަކައި ދޭންޖެހޭ ވެކްސިންތައް ދެވިފައި ހުރި ބައެއްކަމަށް ހެދުމަށް މޮނިޓަރ ކުރުމުން އަންނަ ކަމަށް މިނިސްޓަރ ވިދާޅުވި އެވެ. އަދި ބިދޭސީންގެ ކަންކަމަށް ޚާއްސަ ސަމާލުކަމެއްދީ، އެކަމަށްޓަކައި ކުރަންޖެހޭ މަސައްކަތް ކުރަމުން އަންނަ ކަމަށާއި، އެކަން ލާޒިމްކުރުމަށް ވިސާ ދޭ ޕްރޮސަސްއަށް ގެންނަންޖެހޭ ބަދަލުތައް ގެނެސް އެމަސައްކަތް ކުރާނެ ކަމަށް މިނިސްޓަރު އަމީން ވިދާޅުވިއެވެ.
މިނިސްޓަރު އަމީން ވިދާޅުވީ ހިމަބިހި ފެތުރެމުންދާތީވެ އެކަމުގެ ހުރިހާ ހޮސްޕިޓަލެއްގެ އެހީތެރިކަމާއި ސިއްހީ ޚިދުމަތްދޭ ހުރިހާ ފަރާތްތަކުގެ އެހީތެރިކަން ވަރަށް ރަނގަޅަށް ލިބެމުންދާ ކަމަށެވެ.
