އެމްޑީޕީ ނޫން ކައުންސިލަރުން އައިސްގެން ބަޖެޓް ފުރިހަމަ ގޮތުގައި ބޭނުން ނުކުރެވޭނެ: ޝަރީފް
ބަޖެޓުން ކުރާނެ ކަންތައްތައް ވިސްނުމަކީ އެމްޑީޕީ ކައުންސިލަރުން ނޫނީ ނުކުރެވޭނެ ކަމެއް
ކެލާ ދާއިރާގެ މެންބަރު އިބްރާހިމް ޝަރީފް
އެމްޑީޕީއަށް ނިސްބަތްވާ ކައުންސިލަރުން ނޫން އެހެން ކައުންސިލަރުން އައިސްގެން ބަޖެޓް ފުރިހަމަ ގޮތުގައި ބޭނުންކުރުމަކީ ވާނެ ކަމެއް ނޫން ކަމަށް ކެލާ ދާއިރާގެ މެންބަރު އިބްރާހިމް ޝަރީފް ވިދާޅުވެއްޖެއެވެ.
ކުރިއަށް އޮތް ލޯކަލް ކައުންސިލް އިންތިޚާބަށް ކެމްޕެއިނަށް އެމްޑީޕީން ތިލަދުންމައްޗަށް ކުރާ ދަތުރުގައި، ހއ. ދިއްދޫގައި އޮތް ޖަލްސާގައި ވާހަކަދައްކަވަމުން ޝަރީފް ވިދާޅުވީ ލާމަރުކަޒީ ގާނޫނު ފާސްކުރުމަށްފަހު އެ ގާނޫނުގެ ދަށުން ވަރަށް ގިނަ ބާރުތަކެއް ރަށްރަށުގެ ކައުންސިލްތަކަށް ދީފައިވާނެ ކަމަށެވެ. އަދި އެއާއެކު ރަށްރަށުގެ ކައުންސިލަށް މި ބާރުތަކާއެއްކޮށް ވަރަށް ބޮޑު ބަޖެޓެއް އެކުލަވާލާ ފާސްކޮށްފައިވާ ކަމަށެވެ.
އޭނާ ވިދާޅުވީ މި ބަޖެޓުން ކުރާނެ ކަންތައްތައް ވިސްނުމަކީ އެމްޑީޕީ ކައުންސިލަރުން ނޫނީ ނުކުރެވޭނެ ކަމެއް ކަމަށެވެ.
ޝަރީފް ވިދާޅުވީ އެމްޑީޕީގެ ކައުންސިލަރުން ހޮވައިގެން ކުރެވޭނެ އެންމެ މުހިންމު އެއްކަމަކީ ޓުއަރިޒަމް ފުޅާނުވެ އޮތް ތިލަދުންމައްޗަށް ގެސްޓް ހައުސްގެ ވިޔަފާރި ފުޅާކުރުން ކަމަށެވެ. އަދި އެކަން ކުރުމަށް ހަނިމާދޫ އިންޓަރނޭޝަނަލް އެއާޕޯޓް ތަރައްގީކުރަން ޖެހޭ ކަމަށާއި، އެއާއެކު ފަތުރުވެރިން ގެނައުމުގައި ވެސް ލުއިތަކެ ލިބިގެންދާނެ ކަމަށެވެ.
ޝަރީފް ވިދާޅުވީ ހއ. ހދ. އަތޮޅުގައި ޓުއަރިޒަމް ކުރިއެރުވުމަށް އިންޑިއާގެ ފަތުރުވެރިން ގެނައުމަކީ ކުރެވިދާނެ ކަމަށާއި، އެހެން ހިސާބުތަކަށް ވުރެ އަގުހެޔޮކޮށް އެ ހިސާބުގައި އެކަން ކުރެވޭނެ ފުރުސަތު އެބައޮތް ކަމަށެވެ. އަދި އެކަން ކުރެވެން އޮތީ ހަނިމާދޫ އިންޓަރނޭޝަނަލް އެއަރޕޯޓް ތަރައްގީކުރެވިގެން ކަމަށް ޝަރީފް ފާހަގަ ކުރެއްވިއެވެ.
