ރާއްޖެ އަނބުރާ 1800ގެ އަހަރުތަކުގެ ތެރެއަށް ވައްޓާލަން ރައްޔިތުން ބޭނުމެއް ނުވޭ: އަހުމަދު އަބްދުﷲ
އެމްޑީޕީން އަބަދުވެސް ގެންދިޔައީ ލާމަރުކަޒީ ބާރުތައް ރަށްރަށަށް ދިނުމަށް ވަކާލާތުކުރަމުން ކަމަށް ވިދާޅުވި
ބާރަށު ދާއިރާގެ މެމްބަރު އަހުމަދު އަބްދުﷲ ވާހަކަދައްކަވަނީ
ރާއްޖެ އަނބުރާ 1980 ނުވަތަ 1800 ގެ އަހަރުތަކުގެ ތެރެއަށް ވައްޓާލަން ދިވެހި ރައްޔިތުން ބޭނުންނުވާކަމަށް ބާރަށު ދާއިރާގެ މެމްބަރު އަހުމަދު އަބްދުﷲ ވިދާޅުވެއްޖެ އެވެ.
ކުރިއަށް އޮތް ލޯކަލް ކައުންސިލް އިންތިޚާބުގެ ކެމްޕޭނަށް އެމްޑީޕީން ތިލަދުންމައްޗަށް ކުރާ ދަތުރުގައި، ހއ ދިއްދޫގައި އޮތް ޖަލްސާގައި ވާހަކަދައްކަވަމުން ޕާޓީގެ ޗެއަރޕާސަންގެ ނައިބް މާލީކަންވެސް ކުރައްވާ އަހުމަދު އަބްދުﷲ ވިދާޅުވީ ރައްޔިތުން ބޭނުންވަނީ ފުރިހަމަ ލާމަރުކަޒީ ނިޒާމެއް ކަމަށެވެ. އަދިި ރައްޔިތުންގެ ކަންކަން ރައްޔިތުންނަށް ނިންމޭނެ ފަދަ ނިޒާމެއްކަމަށާއި، 1800 ނުވަތަ 1980 ގެ އަހަރުތަކުގެ ހާލަތަށް އަނބުރާ ދިއުމަށް ރައްޔިތުން ބޭނުން ނުވާކަމަށް މެމްބަރު އަހުމަދު އަބްދުﷲ ވިދާޅުވި އެވެ.
މެމްބަރު އަހުމަދު އަބްދުﷲ ވިދާޅުވީ އެމްޑީޕީން އަބަދުވެސް ގެންދިޔައީ ލާމަރުކަޒީ ބާރުތައް ރަށްރަށަށް ދިނުމަށް ވަކާލާތުކުރަމުން ކަމަށެވެ. އަދި ރައީސް މުހައްމަދު ނަޝީދުގެ ވެރިކަމުގައި ގާނޫނީ ނިޒާމުގެ ތެރެއިން ލާމަރުކަޒީ ބާރުތަކާއި، ރައްޔިތުންނަށް ބާރުތައް ދޫކޮށްލުމަށް ފާސްކުރެވުނު ކަމަށެވެ. ނަމަވެސް ކުރީގެ ސަރުކާރުތަކުން މަސައްކަތްކުރީ އެ ބާރުތައް ކައުންސިލްތަކުންނާއި ރައްޔިތުން އަތުން ނިގުޅައިގަތުމަށް ކަމަށް އޭނާ ވިދާޅުވި އެވެ. އެގޮތުން އެ ސަރުކާރުތަކުން ތަރައްގީއަށް ހުރަސްއަޅާ، ކައުންސިލްތަކުގެ އަތް ބަނދެލި ކަމަށް މެމްބަރު ވިދާޅުވިއެވެ. ނަމަވެސް އެމްޑީޕީއިން ދެވަނަ ފަހަރަކަށް ވެރިކަމަށް އައިސް އެ މަސައްކަތް އަލުން ފެށިކަމަށާއި އިދާރީ ދާއިރާތަށް ލާމަރުކަޒީ އުސޫލުން ހިންގުމުގެ ގާނޫނަށް އިސްލާހު ގެނެސް، ނިގުޅައިގަތް ބާރުތައް އަނބުރާ ދީފައިވާނެ ކަމަށް އަހުމަދު އަބްދުﷲ ވިދާޅުވިއެވެ.
ކައުންސިލްތަކަށް މާލީ ބާރުވެރިކަން ލިބޭ ގޮތަށް އިދާރީ ދާއިރާތަށް ލާމަރުކަޒީ އުސޫލުން ހިންގުމުގެ ގާނޫނަށް އިސްލާހު ގެނެސްފައިވަނީ މިދިޔަ އަހަރުގެ ޑިސެމްބަރު މަހުގެ 3 ވަނަ ދުވަހުއެވެ. އެ ގާނޫނަށް ގެނައި އިސްލާހުތަކުގެ ތެރޭގައި އަތޮޅު ކައުންސިލްގެ ރައީސްގެ އިތުރުން، އެ ކައުންސިލުގައި ހިމެނެންވާނީ އެ އިދާރީ ދާއިރާގައި ހިމެނޭ ރަށު ކައުންސިލުތަކަށް އިންތިޙާބު ކުރާ ރައީސުންނެވެ.
މީގެއިތުރުން ކައުންސިލްތަކުގެ ރައީސުންނާއި، ސިޓީ ކައުންސިލްތަކުގެ މޭޔަރުން ސިއްރު ވޯޓަކުން އިންތިޚާބު ކުރެވޭ ގޮތަށް ގާނޫނު އަސާސީ އިސްލާހުކުރުމުގެ އިތުރުން އިދާރީ ދާއިރާތައް ހިންގުމަށްޓަކައި އިންތިޚާބުކުރެވޭ ކައުންސިލްތަކުގެ އުމުރު 5 އަހަރަށް ދިގު ކުރާ ގޮތަށްވެސް ވަނީ އިސްލާހުކޮށްފައެވެ.
