އެމްޑީޕީއާ ދޭތެރޭގައި ބައެއް ފަރާތްތަކުން ހިތްހަމަ ނުޖެހެނީ ރައްޔިތުންނަށް ބާރުވެރިކަން ހޯދައިދޭން އުޅޭތީ: ސަލީމް
މިއީ އެމްޑީޕީން ޗެމްޕިއަންކަން ހޯދަން ނުކުންނަ ތިންވަނަ ފަހަރު، މި ފަހަރު ވެސް އެމްޑީޕީން ތަށި ނަގާނެ
ހޯރަފުށީ ދާއިރާގެ މެންބަރު އަހުމަދު ސަލީމް
އެމްޑީޕީއާ މެދުގައި ސިޔާސީގޮތުން ބައެއް ފަރާތްތަކުން ހިތްހަމަ ނުޖެހެނީ ރައްޔިތުންނަށް ބާރުވެރިކަން ހޯދައިދޭން އުޅޭތީކަމަށް ހޯރަފުށީ ދާއިރާގެ މެންބަރު އަހުމަދު ސަލީމް ވިދާޅުވެއްޖެއެވެ.
އެޖެންޑާ 19 ރަށަށް – ހއ. ދިއްދޫގައި ބޭއްވި ޖަލްސާގައި ވާހަކަދައްކަވަމުން ސަލީމް ވިދާޅުވީ ދިވެހިރާއްޖެއަކީ އެތައް ޒަމާންތަކެއް ވަންދެން އެކި ބާވަތްތަކުގެ ވެރިކަން ކޮށްފައި އޮތް ގައުމެއްކަން އެންމެންނަށްވެސް އިނގޭ ކަމަށެވެ. އަދި އެމްޑީޕީއާ މެދުގައި ސިޔާސީގޮތުން ބައެއް ފަރާތްތަކުން ހިތްހަމަ ނުޖެހެނީ ރައްޔިތުންނަށް ބާރުވެރިކަން ހޯދައިދީ ރައްޔިތުން އަމިއްލައަށް ގޮތް ނިންމުމުގެ ފުރުސަތު ހޯދައިދޭތީ ކަމަށް ސަލީމް ވިދާޅުވި އެވެ. އެގޮތުން ސަލީމް ވިދާޅުވީ ވެރިންގެ ކައިރިއަށްގޮސް ސަލާން ނުޖަހާ ފައިބުޑަށް ނުވެއްޓި އަމިއްލައަށް އަބުރުވެރި ދިރިއުޅުމެއް ހޯދައިދިނުމުގެ މަސައްކަތް ކުރަން އުޅޭތީ އެމްޑީޕީއާއި ދޭތެރޭގައި ސިޔާސީ ބައެއް ފަރާތްތަކުން ހިތްހަމް ނުޖެހޭ ކަމަށެވެ.
ސަލީމް ވިދާޅުވީ މިއީ އެމްޑީޕީން ޗެމްޕިއަންކަން ހޯދަން ނުކުންނަ ތިންވަނަ ފަހަރު ކަމަށެވެ. އަދި މި ފަހަރު ވެސް އެމްޑީޕީން ތަށި ނަގާނެ ކަމަށާއި، ޗެމްޕިއަނުން ޗެމްޕިއަނުންނަށް ވަނީ ހަމައެހެން ތިބެފަ ނޫން ކަމަށެވެ. އެއީ ބުރަ މަސައްކަތާއި ހިއްމަތާއި މިންނަތާއި ރޭވުންތެރިކަމާއެކީ ކުރާ ކަމެއް ކަމަށާއި، ހަމަ ތިބެފަ ދަނޑަށްއަރާ މެޗެއް ކުޅެފައި މޮޅުވަނީއެއް ނޫން ކަމަށްވެސް ސަލީމް ވިދާޅުވިއެވެ.
ސަލީމް ވިދާޅުވީ އެމްޑީޕީން ޗެމްޕިއަންކަން ނަގާނެކަމުގެ އެއް ހެއްކަކީ އެމްޑީޕީން މަސައްކަތްކުރާ އިންތިޒާމްތައް ކަމަށެވެ. އަދި ތަންތަނަށް ދަތުރުކޮށް ގޭގެއަށް ގޮސް މީހުންނާ ވާހަކަދައްކާ މެނިފެސްޓޯ އެކުލަވާލާ ކަންކަން ތަރުތީބުކޮށް ވޯޓާ ހަމައަށް ގޮސް އެކަން ކާމިޔާބުވުމުން އެވީ ވައުދުތަކުގެ މަތިން ހަނދާން ނައްތާނުލާ ރެއާ ދުވާލު މަސައްކަތްކޮށް އެ ވައުދުތައް ކާމިޔާބުކުރުމަށް ކުރާ މަސައްކަތް ކަމަށާއި، އެއީ އެމްޑީޕީއަށް ޗެމްޕިއަންކަން ލިބޭ ގޮތް ކަމަށް ސަލީމް ވިދާޅުވިއެވެ.
ސަލީމް ވިދާޅުވީ ކާޅު ހާލި ހެދީމަ ކޮވެލި ބިސްއަޅާ ކަމަށެވެ. އެގޮތުން އެމްޑީޕީން ރިޔާސީ އިންތިހާބެއް ކާމިޔާބުކޮށް ރާއްޖެއަށް ނަޒަރު ހިންގާލިއިރު، ރާއްޖެ އޮތީ ވީރާނާވެގެން ގޮސްފައި ކަމަށާއި، ރާއްޖެއާއި ގުޅުން އޮތް ގައުމެއް ނެތް ކަމަށެވެ. އަދި ރާއްޖޭގައި ކޮރަޕްޝަން އޮތީ އިންތިހާއަށް ކަމަށާއި، ދިވެހިންނާ މެދު ކަންކުރެވެމުން ދިޔައީ ހިތުހުރި ގޮތަކަށް ކަމަށެވެ.
މީގެއިތުރުން ވަޒީފާތަކުގެ ޔަގީންކަމެއް ނެތް ކަމަށާއި، ބޭނުން މީހަކަށް ބޭނުންގޮތެއް ހަދަމުންދިޔަކަން އެއީ އިއްޔެ މެންދުރު ހިނގަމުންދިޔަ ކަންތައްތައް ކަމަށެވެ. އަދި އެ ހުރިހާ ކަމެއް ބަދަލުކޮށް ދުނިޔެއާއި ގުޅުން ބަދަހިކޮށް ރާއްޖެ އަންނަ ފަތުރުވެރިން އިތުރުކޮށް، ރާއްޖޭގެ އިގްތިސާދު ކުރިއަރުވާ އެތައްއެތައް ވައުދެއް ފުއްދަންކުރާ މަސައްކަތްތަކުން އުފާވެރިކަން އިހުސާސްކުރެވޭ ކަމަށް ސަލީމް ވިދާޅުވިއެވެ.
ސަލީމް ވިދާޅުވީ ލާމަރުކަޒީ ނިޒާމަކީ އެމްޑީޕީ ދަންނަ ނިޒާމެއް ކަމަށާއި، އެއީ އެމްޑީޕީއަށް ފަރިތަ ނިޒާމެއް ކަމަށެވެ. އަދި އެމްޑީޕީން އަބަދުވެސް ރާއްޖޭގައި ވެރިކަން ހިންގަން ބޭނުންވި ނިޒާމް މިހާރު އޮތީ ގާނޫނީ ގޮތުން ފުރިހަމަކޮށްފައި ކަމަށާއި، ދެން އެމްޑީޕީއަށް އެ ފުރުސަތު ދެއްވަން ޖެހޭ ކަމަށެވެ. އަދި ދިވެހިރާއްޖެ ފުރިހަމަ ލާމަރުކަޒީ ނިޒާމަކުން ހިންގަން ފެށީމަ ރައްޔިތުންނަށް ލިބެނީ ކިހާ އުފާވެރިކަމެއް ކަން ފެނިގެންދާނެ ކަމަށް ސަލީމް ވިދާޅުވިއެވެ.
