ބަޖެޓު އެންމެ ފުރިހަމަކޮށް ތަންފީޒު ވެގެންދާނީ ފުރިހަމަ ރީނދޫ ކައުންސިލެއް އޮވެގެން: ޢަބްދުﷲ ވަޙީދު
ދިއްދޫއަށް 200 މިލިއަންގެ ބަޖެޓެއް ފާސްކުރެވުނު
ދިއްދޫ ދާއިރާގެ މެމްބަރު ޢަބްދުﷲ ވަޙީދު
2020ގެ ބަޖެޓު އެންމެ ފުރިހަމަކޮށް ތަންފީޒު ވެގެންދާނީ ފުރިހަމަ ރީނދޫ ކައުންސިލެއް އޮވެގެންކަމަށް ރައްޔިތުންގެ މަޖިލީހުގެ ދިއްދޫ ދާއިރާގެ މެމްބަރު ޢަބްދުﷲ ވަޙީދު ވިދާޅުވެއްޖެއެވެ.
މެމްބަރު މިހެން ވިދާޅުވީ ކުރިއަށް އޮތް ލޯކަލް ކައުންސިލް އިންތިޚާބަށް ކެމްޕެއިނަށް އެމްޑީޕީން ތިލަދުންމައްޗަށް ކުރާ ދަތުރުގައި، ހއ. ދިއްދޫގައި އޮތް ޖަލްސާގައި ވާހަކަދައްކަވަމުންނެވެ.
މެމްބަރު ވިދާޅުވީ 2020 ވަނަ އަހަރު ދިއްދޫއަށް 200 މިލިއަންގެ ބަޖެޓެއް ފާސްކުރެވުނު ކަމަށެވެ. އަދި މި ބަޖެޓު އެންމެ ފުރިހަމަކޮށް ތަންފީޒުވެގެންދާނީ ފުރިހަމަ ރީނދޫ ކައުންސިލެއް އޮވެގެން ކަމަށެވެ. ދިއްދޫގެ ބަޖެޓަށް އަލިއަޅުއްވާލާ މެމްބަރު ވިދާޅުވީ 2020 ވަނަ އަހަރަށް ފާސްކުރެވުނު ބަޖެޓުގައި ދިއްދޫ ރައްޔިތުންނަށް ރައިސުލްޖުމްހޫރިއްޔާ ވެވަޑައިގެންނެވި ވައުދުތަކުގެ 90% ވަނީ ހިމެނިފައިކަމަށެވެ.
މެމްބަރު ވިދާޅުވީ އެޖެންޑާ 19ގެ ވައުދުތަކާއި ރައިސުލްޖުމްހޫރިއްޔާގެ ވައުދުތަކަކީ އިހުމާލުވާނެ ވައުދުތަކެއް ނޫން ކަމަށެވެ. އަދި އެ ވައުދުތައް ކުރިއަށް އޮތް އަހަރުތަކުގައި ފުއްދަވާނެ ކަމަށް ވިދާޅުވެ މެމްބަރު ވިދާޅުވީ ކުރިއަށް އޮތް ފަސް އަހަރު ވެގެންދާނީ ރައްޔިތުންނަށް އުފަލާއި ހިތްހަމަޖެހުން ގެނުވައިދޭނެ އަހަރުތަކަކަށް ކަމަށެވެ.
2020ގެ ދައުލަތުގެ ބަޖެޓުގައި އެންމެ ބޮޑު އިސްކަމެއް ދީފައިވާނީ ރައްޔިތުންނަށް ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވެސް ވަނީ މީގެކުރިން ވިދާޅުވެފައެވެ. އެގޮތުން 37.8 ބިލިއަން ރުފިޔާގެ ބަޖެޓް ރައްޔިތުންގެ މަޖިލީހުން ފާސްކޮށްފައިވަނީ މިދިޔަ އަހަރުގެ ޑިސެމްބަރު މަހުގެ 5 ވަނަ ދުވަހުއެވެ.
