އޮލިމްޕަސް ހޯލް ކުއްޔަށް ދޫކުރުމުގައި ޢަމަލުކުރަމުން އައި އުސޫލު އިސްލާހުކޮށް އަލުން އެކުލަވާލައިފިއެވެ.

ނެޝަނަލް ސެންޓަރ ފޮރ ދި އަރޓްސް އިން އާންމުކުރި އިސްލާހުގައި ބުނެފައިވަނީ ފިލްމު ދެއްކުމަށާއި ޝޯ ބޭއްވުމަށާއި އަދި ފަންނުވެރިކަމުގެ ދާއިރާއާއި ގުޅުންހުރި ކަންކަމަށް އޮލިމްޕަހުގެ ހޯލު ހަމަހަމަ ގޮތެއްގައި، ވަކި އުޞޫލެއްގެ ދަށުން ކުއްޔަށް ދޫކުރުމާއި، ދެމެހެއްޓެނިވި އަދި ހަރުދަނާ ގޮތްތަކެއް ކަނޑަ އެޅުމުގެ މަޤްސަދުގައި ކުރިން ބޭނުންކުރަމުން އައި އުސޫލަށް އިސްލާހުގެނެސް އޮލިމްޕަސް ކުއްޔަށް ދޫކުރުމުގައި ޢަމަލުކުރާނެ އުސޫލް އާއްމުކޮށްފައިވާނެ ކަމަށެވެ.

އޮލިމްޕަސް އުސޫލުގައި ބުނެފައިވަނީ ކުއްޔަށް ހިފާ ފަރާތުން ހަރަކާތެއް ހިންގުމުގަޔާއި ތައްޔާރީތައް ކުރިއަށް ގެންދިޔުމުގައި އޮލިމް ޕަހުގެ ޢިމާރާތާއި ވަސީލަތްތަކާއި ތަކެއ ޗަށް ރައް ކާތެރިވާން ވާނެ ކަމަށެވެ. އެގޮތުން ޝޯވއަށް ބޭނުންވާ ސްޓޭޖް ލައިޓް، ސްޕީކަރ ނުވަތަ ޕީއޭ ސިސްޓަމް އަދި ލެޑްޕެނަލް ފަދަ އާލާތްތައް ބަހައްޓައި ހަރުކުރުމުގައި، އޮލިމްޕަހުގައި އެކަންކަމަށް ހާއްސަކޮށްފައިވާ ތަން ތަނާއި ބްރެކެޓްތައް ފިޔަވައި އެހެން އެއްވެސް ތަނެއްގައި އެއްޗެއް ހަރުކުރަންވާނީ ނުވަތަ ހަރުކޮށްފައިހުރި އެއްޗެއް ނައްޓަން ޖެހިއްޖެ ހިނދެއްގައި އެ އެއްޗެއް ނައްޓަންވާނީ އެންސީއޭގެ ހުއްދަ ލިޔުމުން ލިބިގެން އެންސީއޭގެ ބެލުމުގެ ދަށުންނެވެ. އަދި މިފަދަ ކަމެއް ކުރަން ވާނީ އެންސީއޭ ގެ ބެލުމުގެ ދަށުންނެވެ.

މީގެއިތުރުން ހަރަކާތެއް ނިމޭތާ 24 ގަޑިއިރު ތެރޭގައި، އެ ހަރަކާތުގައި ބޭނުން ކުރުމަށް ގެނައި ހުރިހާ ސާމާނާއި އަދި ކުނިފަދަ އުކާލަންޖެހޭ ތަކެތި ގެންގޮސް ތަންހުސްކޮށް ސާފުކުރަން ވާނެ ކަމަށް ބުނެފައިވެއެވެ.

މި އުސޫލުގައި ބުނެފައިވާގޮތުން އޮލިމްޕަހުގައި ހަރަކާތެއް ހިންގަންވާނީ ނުވަތަ މަސައްކަތެއް ކުރަނ ވާނީ ހެނދުނު 8:00 އާއި ރޭގަނޑު 12:00 އާއި ދެމެދުއެވެ. ނަމަވެސް ރޭގަނޑުގެ ފިލްމު ޝޯއެއްނަމަ އެންމެ ލަސްވެގެން ރޭގަނޑު 1:00 އަށް ނިންމަން ޖެހެއެވެ. އަދި މި ވަގުތުގެ ތެރޭގައި ނަމާދު ވަގުތަށް 10 މިނިޓަށް މަސައްކަތް ނުވަތަ ހަރަކާތް މެދުކަނޑާލަން ވާނެ ކަމަށް ބުނެފައިވެއެވެ.

ދިވެހި ފިލްމު ދެއްކުމަށް އޮލިމްޕަސް ބުކް ކުރެވޭނީ ކުލީގެ %50 އަށްވާ ފައިސާ އާއި ރިފަންޑްބަލް ޑިޕޮސިޓްގެ ގޮތުގައި 3000 ( ތިންހާސް ރުފިޔާ)ގެ ޑެޕޮސިޓެއް ނޭޝަނަލް ސެންޓަރ ފޮ ދި އާޓްސް އަށް ދައްކާ، އެއްބަސްވުމުގައި ސޮއި ކުރުމަށްފަހުގައެވެ. އަދި ރިފަންޑްބަލް ޑިޕޮސިޓްގެ ގޮތުގައި ދައްކާ -/3000 ( ތިންހާސް ރުފިޔާ) އަކީ މިއުސޫލުގެ 4 ވަނަ މާއްދާގެ (ހ) އަދި (ބ) އަށް ހިމަނާފައި ވާކަންކަމާ ކުއްޔަށް ހިފާ ފަރާތުން ޚިލާފް ވެއްޖެނަމަ އަނބުރާ ލިބޭނެ ފައިސާއެއް ނޫން ކަމަށް ބުނެފައިވެއެވެ.

ދިވެހި ފިލްމު ދެއްކުމަށް ކުއްޔަށް ހިފާ ފަރާތުން ކުލީގެ ބާކީ އޮތް %50 ފައިސާ ދައްކާނީ ކުއްޔަށް ހިފާފައިވާ ދުވަސްތަކަށް ކޮންމެ ދުވަހަކު އެދުވަހަކަށްވާ ކުލީގެފައިސާ އެދުވަހެއްގެ މެންދުރު 1:30 ގެ ކުރިން އެންސީއޭ އަށެވެ. އަދި ހަފްތާ ބަންދު ނުވަތަ އެހެންވެސް ސަރުކާރު ބަންދު ދުވަސްތަކަކާއި ދިމާވާނަމަ އެދުވަސްތަކުގެ ކުލި ބަންދުވުމުގެ ކުރިއަށް ދައްކަންވާނެކަމަށް ބުނެފައިވެއެވެ.

މި އުސޫލުގައިވާ ގޮތުން ދިވެހި ފިލްމު ދެއްކުމަށް ޝޯ އަކަށް 2,000 ރުފިޔާ، ފޮރިން ފިލްމު ދެއްކުމަށް ޝޯ އަކަށް 6,000 ރުފިޔާ، އެވޯޑް ޝޯ އަދި ފެސްޓިވަލްބޭއްވުމަށް ޝޯ އަކަށް 5,000 ރުފިޔާ، ތަމްސީލު އަދި މިއުޒިކް ޝޯ އަކަށް 2000 ރުފިޔާ، ޖަލްސާފަދަ، ސެމިނާ އަދި ޕްރެސެންޓޭޝަންފަދަ ހަރަކާތްތަކަށް ދުވާލަކު 5,000 ރުފިޔާ، އަދި ސަރުކާރުން ބާއްވާ ޙަފްލާއަކަށް 5,000 ރުފިޔާ ވަނީ ހަމަޖައްސާފައެވެ.

އަދި އޮލިމްޕަސް ބެކްޔާޑުގައި އިވެންޓެއް ބޭއްވުމަށް ދުވާލަކަށް 1500 ރުފިޔާ، އިވެންޓަށް ހޯލް ތައްޔާރުކުރުމަށް ދުވާލަކަށް 2,500 ރުފިޔާ، ހަމައެކަނި ހަފްތާ ބަންދަށް ކުއްޔަށް ހިފާނަމަ ޝޯ އަކަށް 4000 ރުފިޔާ ވަނީ ހަމަޖައްސާފައެވެ. މީގެ އިތުރުން އެންސީއޭއިން ހިންގާ ހަރަކާތް ތަކާއި ސަރުކާރާއި އަމިއްލަ ފަރާތްތަކުން އެންސީއޭ އާއި ގުޅިގެން އޮލިމްޕަހުގައި ހިންގާ އެކިއެކި ހަރަކާތްތަކަށް އަގުނެގުމާއި ނުނެގުން މި އުސޫލުން ހުރަހެއް ނާޅައެވެ.