ކައުންސިލްތަކުގެ އިންތިޚާބާއި ޑަބްލިޔު.ޑީ.ސީގެ އިންތިޚާބާއި ކުޅުދުއްފުށި ސިޓީގެ އިންތިޚާބީ ދާއިރާތަކުގެ ފައިނަލް ރިޕޯޓް އާންމުކޮށްފި
12 ޖެނުއަރީ 2020 | އާދީއްތަ 13:30ކައުންސިލް އިންތިޚާބު ބޭއްވުމަށް ހަމަޖެހިފައިވަނީ އޭޕްރީލް 4 ގައި
އިލެކްޝަންސް ކޮމިޝަންގެ މެމްބަރުން
މިއަހަރުގެ އޭޕްރީލްމަހުގެ 4 ވަނަ ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބާއި ކުޅުދުއްފުށި ސިޓީގެ އިންތިޚާބީ ދާއިރާތައް ކަނޑައަޅާފައިވާ ގޮތުގެ ފައިނަލް ރިޕޯޓު އިލެކްޝަންސް ކޮމިޝަން(އީސީ) އިން ޢާންމުކޮށްފި އެވެ.
އީސީން ބުނީ މިރިޕޯޓު ގެޒެޓުންނާއި އީސީގެ ވެބްސައިޓުން ލިބެން ހުންނާނެ ކަމަށެވެ.
މިއަހަރު ބާއްވާ ލޯކަލް ކައުންސިލްތަކުގެ އިންތިޚާބުގައި މުޅި ޖުމުލަ 982 ކައުންސިލަރުން އިންތިޚާބު ކުރާނެއެވެ. އަދި 930 މީހަކު އަންހެނުން ތަރައްޤީއަށް މަސައްކަތްކުރާ ކޮމިޓީތަކަށް އިންތިޚާބު ކުރާނެއެވެ. ރަށު ކައުންސިލްތަކަށް އިންތިޚާބުކުރުމަށް ހަމަޖެހިފައިވަނީ 918 މީހުންނެވެ. އަތޮޅު ކައުންސިލަރުންގެ ގޮތުގައި 18 މީހުން އިންތިޚާބުކުރާނެއެވެ. އަދި ސިޓީ ކައުންސިލްތަކަށް 46 މީހަކު ޢައްޔަނު ކުރާނެއެވެ.
މާލެ ސިޓީއަށް 18 ކައުންސިލަރުން އިންތިޚާބު ކުރާއިރު އޭގެތެރެއިން 6 ކައުންސިލަރުންނަކީ އަންހެނުންނެވެ. އައްޑޫ ސިޓީގައި 12 ކައުންސިލަރުން އިންތިޚާބު ކުރާއިރު އޭގެތެރެއިން 4 ކައުންސިލަރުންނަކީ އަންހެނުންނެވެ. އަދި ފުވައްމުލައް ސިޓީގައި 6 ކައުންސިލަރުން އިންތިޚާބުކުރާއިރު އޭގެތެރެއިން 2 ކައުންސިލަރުންނަކީ އަންހެނުންނެވެ. އެންމެފަހުން ސިޓީގެ ދަރަޖަ ދިން ކުޅުދުއްފުށީގައި އިންތިޚާބުކުރާނީ 6 ކައުންސިލަރުންނެވެ. އޭގެތެރޭގައި 2 އަންހެން ކައުންސިލަރުން ތިބޭނެ އެވެ.
