މާލޭ ސިޓީގެ ސްކޫލްތަކަށް ދިމާވެފައިވާ ޖާގައިގެ ދަތިކަން ޙައްލުކުރަމަށްޓަކައި، މާލެ އިންގްލިޝް ސްކޫލް (އެމްއީއެސް) ހިންގި އިމާރާތުގައި، ތަރައްޤީކުރި ޢިއްޒުއްދީން ސްކޫލު ހުޅުވައިފިއެވެ.

އާދިއްތަ ދުވަހު އޮތް ޚާއްސަ ރަސްމިއްޔާތެއްގައި މި ސުކޫލު ހުޅުވައިދެއްވީ ރައީސުލްޖުމްހޫރިއްޔާ އިބްރާހިމް މުޙައްމަދު ސޯލިހެވެ. އޭގެ އިތުރުން ނައިބް ރައީސް ފައިސަލް ނަސީމާއި، އެޑިއުކޭޝަން މިނިސްޓަރ ޑރ. އާއިޝަތު އަލީވެސް މި ރަސްމިއްޔާތުގައި ބައިވެރިވެ ވަޑައިގެންނެވިއެވެ.

އިއްޒުއްދީން ސުކޫލު ހުޅުވުމާއެކު އެ ސުކޫލުވެފައިވަނީ މާލޭ ސަރަޙައްދުގެ 16 ވަނަ ސުކޫލަށެވެ. އެގޮތުން މި ސުކޫލުގެ ކޮންމެ ކްލާހެއްގައި 25 ކުދިންގެ ޖާގަ ހުންނައިރު 2021 ވަނަ އަހަރު ގްރޭޑް ހަތަކުން ފެށިގެން ދިހަ އަކަށް ކިޔަވައިދޭން ފަށާނެކަމަށް އެޑިއުކޭޝަން މިނިސްޓްރީން ބުނެއެވެ.

އިއްޒުއްދީން ސުކޫލަކީ ސަރުކާރުގެ ވަށައިޖެހޭ ސިޔާސަތު ފުރިހަމައަށް ތަންފީޒްވާނެގޮތަށް، އެއް ދަންފަޅިއަށް ކިޔަވއިދޭނެ ސުކޫލެކެވެ. ސުކޫލަށް އިއްޒުއްދީން ސުކޫލުގެ ނަމުން ނަންދެވުނީ ދިވެހިރާއްޖޭގައި 1757 އިން 1766 ރަސްކަންކުރެއްވި ދޮންބަންޑާރައިން ނުވަތަ އަލްސުލްތާން އަލްގާޒީ ހަސަން އިއްޒުއްދީންގެ ނަންފުޅާ އެވެ. ސުކޫލުގެ ބެޖުން ރަމްޒުކޮށްދެނީ ދޮންބަންޑާރައިންގެ އައްޑަނަ އެވެ.

ސުކޫލްގެ ކުލައިގެ ގޮތުގައި ހަމަޖައްސާފައިވަނީ ދަނބު ކުލަ އެވެ. އެއީ ދިވެހި ވެށީގައި ވަރަށް ފަސޭހައިން ހެދޭ މަލިކުރުވާ މަލާ ގުޅުވަ އެވެ. ކެންސަރުގެ ފަރުވާއެއްގެ ގޮތުގައި މިޒަމާނުގައި އެންމެގިނައިން ބޭނުންކުރާ އެއް ބޭހަކީ ފަސްފިޔަލީ މަލިކުރުވާ މަލުން ނަގާ މާއްދާއެކެވެ.

ސުކޫލްގެ މޮޓޯއެއްގެ ގޮތުގައި ހަމަޖައްސާފައިވަނީ ހައްޤު ތެދު ހޯދާށެވެ.

އެޑިއުކޭޝަން މިނިސްޓަރ އާއިޝަތު އަލީ ވިދާޅުވީ ކަންކަމުގެ ހަގީގަތް އުނގަންނައިދިނުމަކީ އަދި ހަގީީގަތްތަށް ހޯދައިދިނުމަކީ ސްކޫލެއްގެ އެންމެ ބޮޑު ބޭނުންކަމަށެވެ. ސްކޫލު ނިންމިއަސް ހަގީގަތް ހޯދުމަށް ޝައުގުވެރިކަން ހުރުމާއި އެކަމުގެ މަޝްއޫލުވެގެން އުޅުމަކީ އިންސާނަކަށް ވީތީ ކުރަންޖެހޭކަމެއްކަމުގައި މިނިސްޓަރ ވަނީ ފާހަގަކުރައްވާފައެވެ. ޒަމާނަކީ ދޮގު ހަބަރުތައް ގިނަ އަދި ހަބަރުތައް ފަތުރަން ފަސޭޙަކަމު ސްކޫލުގެ މޮޓޯ ހާލަތާއި މާހައުލަށް ހާއްސަކޮށް ގުޅޭކަމަށްވެސް މިނިސްޓަރ ވަނީ ވިދާޅުވެފައެވެ.

ޢިއްޒުއްދީން ސްކޫލްގައި ގްރޭޑް ދިހައަކާއި ހަމަޔަށް ކިޔަވައިދޭން ނިންމާފައިވީ ނަމަވެސް މި އަހަރު އެ ސްކޫލްގައި ކިޔަވައިދޭނީ ގްރޭޑް ހަޔަކާއި ހަމައަށެވެ. އެއީ ގްރޭޑް އެކަކުން ހަތަރަކަށް ކޮންމެ ގްރޭޑެއްގައި ތިން ކްލާސް، އަދި ގްރޭޑް ފަހެއް އަދި ހައެއްގެ ކޮންމެ ގްރޭޑް އެއްގެ ދެ ކްލާހެވެ.

މިއީ، 500 ދަރިވަރުންގެ ޖާގަ ދިނުމަށް ޢަމާޒުކޮށް ހުޅުވޭ ސްކޫލެކެވެ.

އިއްޒުއްދީން ސުކޫލު ހުޅުވުމާއެކު މިހާރު ރާއްޖޭގެ ސުކޫލުތަކުގެ އަދަދަކީ 212 އެވެ.