ކައުންސިލް އިންތިހާބު: ޕީޕީއެމްގެ ޓިކެޓަށް އެދި 300 އަށް ވުރެ ގިނަ މީހުން
ލީޑަރޝިޕް ބޭފުޅުން ރަށްރަށަށް ދަތުރުތަކެއް ކުރައްްވާނެ: އަދުރޭ
ޕީޕީއެމުން ބޭއްވި ޕްރެސް ކޮންފަރެންސެއްގެ ތެރެއިން
މި އަހަރުގެ އޭޕްރީލް މަހުގެ ހަތަރު ވަނަ ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިހާބުގައި ޕީޕީއެމް/ޕީއެންސީ ޓިކެޓްގައި ވާދަކުރުމަށް 300 އަށްވުރެ ގިނަ ފޯމް ލިބިފައިވާ ކަމަށް އިދިކޮޅު ޕްރޮގްރެސިވް ކޯލިޝަނުން ހާމަކޮށްފިއެވެ.
ޕްރޮގްރެސިވް ކޯލިޝަނުން މިހާރު އެންމެ އިސްކަމެއްދީގެން ކުރިޔަށް ގެންދަނީ ޖަލުގައި ހުންނެވި ކުރީގެ ރައީސް އަބްދުﷲ ޔާމީނަށްޓަކައި ލޯކަލް ކައުންސިލް އިންތިހާބު ކާމިޔާބު ކުރުމެވެ.
ކައުންސިލް އިންތިހާބަށް އެ ޕާޓީން ވަމުންދާ ތައްޔާރީތައް ހާމަކުރައްވަމުން ޕީއެންސީގެ ނައިބް ރައީސް އަބްދުއްރަހީމް އަބްދުއްﷲ (އަދުރޭ) ވިދާޅުވީ، އާދިއްތަ ދުވަހު ޕީޕީއެމް/ޕީއެންސީގެ ލީޑަރޝިޕްގެ އިސް ޓީމެއް ހއ. އަށާއި ށ. އަތޮޅުގެ އިތުރުން ބ. އަތޮޅަށް ދަތުރެއް ކުރުމަށް ހަމަޖެހިފައިވާ ކަމަށެވެ. އަދުރޭ ވިދާޅުވީ، އަތޮޅަކަށް ވަޑައިގަންނަވާ ޓީމުން އެ އަތޮޅެއްގެ ހުރިހާ ރަށަކަށް ޒިޔާރަތް ކުރައްވާއި، ޕާޓީ އަށާއި ރައީސް ޔާމީނަށް ތާއިދު ކުރައްވާ ބޭފުޅުންނާއި ބައްދަލު ކުރައްވާނެ ކަމަށެެވެ. އަދުރޭ ވަނީ ޕީޕީއެމް/ޕީއެންސީގެ މެމްބަރުންނަށް އިލްތިމާސެއް ކުރައްވާފައެވެ.
ރައްޔިތުންގެ މަޖިލީހުގެ ފޮނަދޫ ދާއިރާގެ މެމްބަރުކަންވެސް ކުރައްވާފައިވާ އަދުރޭ ވިދާޅުވީ، ޕީޕީއެމް އަށް ވޯޓު ދީގެން ނޫން އެހެން ގޮތެއް ރާއްޖޭގެ ކުރިމަގަށް ނެތް ކަމަށެވެ. އަދުރޭ ވިދާޅުވީ، ރައީސް ޔާމީންވެސް އެދިވަޑައިގަންނަަވަނީ ލޯކަލް ކައުންސިލް އިންތިހާބު ޕީޕިއެމް/ޕީއެންސީ އަށް ކާމިޔާބު ކޮށްދިނުން ކަމަށެވެ. ރައީސް ޔާމީންގެ އަަރިސް ބޭފުޅެއް ކަމަށްވާ އަދުރޭ ވިދާޅުވީ، ކިތަންމެ ހާލެއްގައި ޖަލުގައި ހުންނެވިޔަސް ޔާމީން ހުންނެވީ ވަރަށް ސާބިތުކަމާއި އެކު ކަމަށެވެ.
މުސްކުޅި ހަރުބަހެއް ކަމަށްވާ ''އަސް ވިއްކިޔަސް ލަގަން ނުވިއްކާށެ'' މާނަކުރައްވައި އަދުރޭ ވިދާޅުވީ، ލަގަން އޮތީ ރައްޔިތުންގެ އަތުގައި ކަމަށެވެ. އެއީ ލޯކަލް ކައުންސިލް އިންތިހާބުކަން ސިފަކުރައްވައި އޭނާ ވިދާޅުވީ، އަހާއި ލަގަން އެއްކޮށް އެމްޑީޕީ އަށް ދީފީއްޔާ މީ ދިވެހިރާއްޖެ އެއް ނޫން ކަމަށެވެ.
ދިވެހިންގެ ދިވެހިރާއްޖޭގެ ގޮތުގައި ބާއްވަން ބޭނުންވާނަމަ ކައުންސިލް އިންތިހާބު ޕީޕީއެމް އަށް ދޭން ޖެހޭ ކަމަށް އަދުރޭ ވިދާޅުވާ ވިދާޅުވުނުން ތަކުރާރު ކުރެއްވިއެވެ.
