އޮމާންގެ ރަސްގެފާނު އަވަހާރަވުމާއި ގުޅިގެން ރައީސުލްޖުމްހޫރިއްޔާ ތަޢުޒިޔާ ވިދާޅުވެއްޖެ
ސުލްތާން ގަބޫސް އަވަހާރަވީ ގިނަ ދުވަސްތަކެއް ވަންދެން އާލާސްކަންފުޅާއި އުޅުއްވުމަށް ފަހުގަ
އޮމާންގެ ރަސްގެފާނު ސުލްތާން ގަބޫސް ބިން ސާއިދް
އޮމާންގެ ރަސްގެފާނު ސުލްޠާން ޤަބޫސް ބިން ސާޢިދު އަވަހާރަވުމާއި ގުޅިގެން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙު ތަޢުޒިޔާ ވިދާޅުވެއްޖެއެވެ.
ގިނަ ދުވަސްތަކެއް ވަންދެން އާލާސްކަންފުޅާއި އުޅުއްވުމަށް ފަހު، ސުލްޠާން ޤަބޫސް އަވަހާރަވީ ހުކުރު ދުވަހުގެ ހަވީރުގެ ވަގުތެއްގައެވެ.
ސުލްޠާން ޤަބޫސްގެ މަރާއި ގުޅިގެން ތަޢުޒިޔާ ވިދާޅުވަމުން ރައީސް ޞާލިޙު ކުރެއްވި ޓްވީޓެއްގައި ވިދާޅުވީ، ސުލްޠާން ޤަބޫސްގެ މަރުގެ ޚަބަރު އެއްސެވީ ފުން ހިތާމައާއެކު ކަމަށާއި، އެމަނިކުފާނަކީ ޤަލްފުގަވެސް ޞުލްޙަ މަސަލަސްކަން ދެމެހެއްޓުމަށް މުހިންމު މަސައްކަތްތަކެއް ކޮށްދެއްވި ބޭފުޅެއް ކަމަށެވެ.
ރައީސް ޞާލިޙު ވަނީ ސުލްޠާން ޤަބޫސްގެ ފުރާނަފުޅަށް ސުވަރުގޭގެ މަތިވެރި ނިޢުމަތް ދެއްވުން އެދި ދުޢާ ކުރައްވާފައެވެ.
އޮމާނުން މިހާރު ދެކެމުން އަންނަ ޒަމާނީ ތަރައްޤީގެ ބާނީ، ސުލްޠާން ޤަބޫސް އަވަހާރަވުމާއި ގުޅިގެން އެ ޤައުމުގައި ހިތާމަ ފާޅުކުރުމުގެ ތިން ދުވަސް އޮންނާނެކަން ވަނީ އިޢުލާންކޮށްފައެވެ. އަދި 40 ދުވަސް ވަންދެން އެ ޤައުމުގެ ދިދަ ބައި ދަނޑިއަށް ތިރިކުރުމަށްވެސް ވަނީ ނިންމާފައެވެ.
50 އަށް ވުރެ ގިނަ އަހަރު ވަންދެން އޮމާންގެ ވެރިކަން ކުރެއްވި ސުލްޠާން ޤަބޫސްއަކީ، އެންމެ ގިނަ ދުވަސްތަކެއް ވަންދެން ޢަރަބި ދުނިޔޭގައި ވެރިކަން ކުރެއްވި ބޭފުޅާއެވެ. އެއްވެސް ލޭ އޮހޮރުވުމަކާ ނުލާ 1970 ވަނަ އަހަރުގެ ތެރޭގައި ކުރެއްވި ބަޢާވާތަކަށް ފަހު، ސުލްޠާން ޤަބޫސް އޮމާންގެ ވެރިކަމަށް ވަޑައިގެންނެވީ، ބައްޕާފުޅު ރަސްކަމުގެ ތަޚުތުން ދުރުކުރެއްވުމަށް ފަހުގައެވެ.
