ކުޅުދުއްފުށީ ސިޓީގެ އެމްޑީޕީ ޕްރައިމަރީގައި ބައިވެރިވުމުގެ ފުރުޞަތު ހުޅުވާލައިފި
ބައިވެރިވުމުގެ ފުރުސަތު 11 ޖެނުއަރީ އިން ފެށިގެން ވަނީ ހުޅުވާލެވިފައި
ކުޅުދުއްފުށި ސިޓީ
ކުރިއަށް އޮތް ލޯކަލް ކައުންސިލް އިންތިޚާބުގެ ކުޅުދުއްފުށީ ސިޓީގެ އެމްޑީޕީ ޕްރައިމަރީގައި ބައިވެރިވުމުގެ ފުރުޞަތު ހުޅުވާލައިފިއެވެ.
ކުޅުދުއްފުށި ސިޓީގެ އިންތިޚާބީ ދާއިރާތައް އިލެކްޝަންސް ކޮމިޝަނުން ކަނޑައަޅާފައި ވަނިކޮށް މޯލްޑިވިއަން ޑިމޮކްރަޓިކް ޕާޓީ (އެމްޑީޕީ)އިން ކުރި އިޢުލާނެއްގައި ބުނީ، ލޯކަލް ކައުންސިލް އިންތިޚާބުގެ ކުޅުދުއްފުށީ ސިޓީގެ އެމްޑީޕީ ޕްރައިމަރީގައި ބައިވެރިވުމުގެ ފުރުޞަތު 11 ޖެނުއަރީ 2020 އިން ފެށިގެން ހުޅުވާލެވިފައިވާ ކަމަށެވެ.
އެގޮތުން އެޕްލިކޭޝަން ހުށަހެޅުއްވުމުގެ ސުންގަޑިއަކީ 16 ޖެނުއަރީ 2020 ވާ ބުރާސްފަތި ދުވަހުގެ މެންދުރުފަހު 2:00 ކަމަށްވެސް އިޢުލާނުގައި ބުނެފައިވެއެވެ.
ކުޅުދުއްފުށީ ސިޓީގެ 6 އިންތިޚާބީ ދާއިރާއެއް އިލެކްޝަންސް ކޮމިޝަނުން ވަނީ ކަނޑައަޅާފައެވެ. އެގޮތުން އެ ހަ ދާއިރާގެ ތެރެއިން އަންހެން މެންބަރުން ހޮވާ ދެ ދާއިރާގެ ގޮތުގައި ހޮވުނީ ކުޅުދުއްފުށި މެދު އުތުރު ދާއިރާ އާއި ކުޅުދުއްފުށި މެދު ދެކުނު ދާއިރާއެވެ.
ކުޅުދުއްފުށި 6 ދާއިރާއަކަށް ބެހުމުން 6 ކައުންސިލަރުން އިންތިޚާބު ކުރުމުގެ އިތުރުން މޭޔަރަކު އިންތިޚާބު ކުރުމުގެ ފުރުޞަތު ލިބިގެންދާނެ ކަމަށް އިސީން މަޢުލޫމާތު ދެއެވެ.
