ގްރޫޕަކުން މީހަކަށް އަނިޔާކުރި މައްސަލައެއް ފުލުހުން ބަލަން ފަށައިފި
ފުލުހުންނަށް އެ މައްސަލަ ރިޕޯޓުކޮށްފައިވަނީ ބުރާސްފަތި ދުވަހުގެރޭ 12:36 ހާއިރު
ސޯޝަލް މީޑިއާގައި އާންމުވެފައިވާ ވީޑިއޯ
ގްރޫޕަކުން މީހަކަށް އަނިޔާކުރި މައްސަލަ ފުލުހުން ބަލަން ފަށައިފިއެވެ.
ފުލުހުންގެ އިދާރާ އިން ބުނީ ބުރާސްފަތި ދުވަހުގެރޭ 12:36 ހާއިރު ބަޔަކު މާރާމާރީއެއް ހިންގައިގެން ފުލުހުންނަށް ރިޕޯޓުކޮށްފައިވާ ކަމަށާއި އެ މާރާމާރި ހިންގާފައިވަނީ ބޮޑުތަކުރުފާނު މަގުގައި ހުންނަ ބޭންކް އޮފް ސިލޯން ކުރިމަތީގައި ކަމަށެވެ. އަދި އެ މައްސަލަ ބަލަމުންދާ ކަމަށް ފުލުހުން ބުންޏެވެ.
މާލޭ މަގުމަތީގައި، ގްރޫޕަކުން މީހަކަށް އަނިޔާކުރި ވީޑިއޯއެއް ސޯޝަލް މީޑިއާގައި ވެސް ވަނީ އާންމުވެފައެވެ. މި ވީޑިއޯ އިން ފެންނަ ގޮތުގައި މަގުމަތީގައި އިން ޒުވާން ފުރައިގެ ފިރިހެނެއްގެ ގައިގައި 10 ވަރަކަށް މީހުންގެ ގްރޫޕަކުން ފައިންނާއި އަތުން ތަޅައި ހަދައެވެ. އަދި ސައިކަލެއްގައި ދެ މީހުން އައިސް، އޭނާ ގައިގައި ސައިކަލުން ޖެއްސުމުން އެ ގުރޫޕް އެއްކޮށް ކަހަލަ ގޮތަކަށް އެ މީހާގެ ގައިގައި ތަޅާ މަންޒަރު ފެނިގެންދެއެވެ.
ހަމަލާ ދިން ގުރޫޕު އެ ސަރަހައްދު ދޫކޮށް ގޮސްފައިވަނީ އެ ތަނަށް ފުލުހަކު އައުމުންނެވެ. އަދި އެއްފަހު ހަމަލާ އަމާޒުވި ޒުވާނާ ވެސް މަޑުމަޑުން ކޮޅަށް ތެދުވެ ހިނގާލާފައި ދާ މަންޒަރު ވީޑިއޯ އިން ފެނެއެވެ.
މިދިޔަ އަހަރު ފުލުހުންނަށް މާރާމާރީގެ 601 މައްސަލަ ހުށަހެޅިފައިވާއިރު، ގްރޫޕް މާރާމާރީގެ 129 މައްސަލައެއް ހުށަހަޅާފައިވެއެވެ.
