ގާނޫނީ ފަންނުގެ ގާނޫނަށް އާންމުންގެ ހިޔާލު ހޯދަނީ
10 ޖެނުއަރީ 2020 | ހުކުރު 04:41ބައެއް މާއްދާތައް ތަންފީޒުކުރެވިއްޖެނަމަ، ދަތިތައް ކުރިމަތިވާނެ ކަމުގެ ޝަކުވާ ލިބޭ
ގާނޫނީ ވަކީލުން ހުވާކުރެއްވުމުގެ ރަސްމިއްޔާތެއްގެ ތެރެއިން
ދިވެހިރާއްޖޭގެ ގާނޫނީ ފަންނުގެ ގާނޫނަށް ހިޔާލު ހުށަހަޅަން ބޭނުންވާ ފަރާތްތަކަށް އެފުރުސަތު ހުޅުވާލައިފިއެވެ.
ބާ ކައުންސިލުން ބުނީ ރާއްޖޭގެ ގާނޫނީ ފަންނުގެ ގާނޫނުއަށް އިސްލާހު ހުށަހެޅުމުގެ ފުރުސަތުގައި، އާންމުންނަށް ހިޔާލު ހުށަހެޅުމުގެ ފުރުސަތު ހުޅުވާލީ ގާނޫނީ ފަންނުގެ ގާނޫނުގައި ހުރި ބައެއް މާއްދާތައް ތަންފީޒުކުރެވިއްޖެނަމަ، ދައުލަތުގެ ބައެއް މުއައްސަސާތަކުން ދެމުން އަންނަ ޚިދުމަތްތަކަށާއި، އެ ޚިދުމަތްތަކަށް އެދޭ ރާއްޖޭގެ އަދި ރާއްޖޭން ބޭރުގެ ފަރާތްތަކަށް ތަފާތު ދަތިތައް ކުރިމަތިވާނޭ ކަމުގެ ޝަކުވާ ލިބެމުންދާތީ ކަމަށެވެ.
ބާ ކައުންސިލުން ބުނީ މިގާނޫނުގެ މާއްދާތައް ތަންފީޒުކުރުމުގައި ހުރި ދަތިތައް އިތުރަށް ދެނެގަނެ، އެ މާއްދާތަކަށް ބޭނުންވާ އިސްލާހުތައް ވީ އެންމެ އަވަސް ފުރުސަތެއްގައި ގެނައުމަށް ނިންމާފައިވާ ކަމަށެވެ.
އެގޮތުން ގާނޫނީ ފަންނުގެ ގާނޫނުގެ އެއްވެސް މާއްދާއަކަށް އެއްވެސް ފަރާތަކުން އެއްވެސް ޚިޔާލެއް ހުށަހަޅަން ބޭނުންވާނަމަ، ބާ ކައުންސިލަށް ލިޔުމުން ހުށަހެޅުމުގެ ފުރުސަތު ހުޅުވާލާފައިވާ ކަމަށެވެ،
ބާ ކައުންސިލުން ބުނީ ހިޔާލު ހުށަހަޅަންޖެހޭނީ އެކައުންސިލްގެ އީމެއިލްއަށް ކަމަށާއި، ހިޔާލު ހުށަހެޅުމުގެ ސުންގަޑިއަކީ މިމަހުގެ 22 ވާ ބުދަ ދުވަހުގެ 14:00 ކަމަށެވެ.
ގާނޫނީ ފަންނުގެ ބިލް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ތަސްދީގު ކުރެއްވީ 27 ޖޫން 2019 ގައެވެ. އަދި މި ބިލް ރައްޔިތުންގެ މަޖިލީހުން ފާސްކޮށްފައިވަނީ 26 ޖޫން 2019 ގައެވެ.
ގާނޫނީ ފަންނުގެ ބިލުގެ މައިގަނޑު މަގުސަދަކީ ވަކީލުންގެ ގޮތުގައި މަސައްކަތް ކުރުމުގެ ހުއްދަ ދޫކުރުމާއި ގާނޫނީ ވަކީލުންގެ މަސައްކަތްތަކާ ގުޅޭ އެންމެހައި ފަންނީ ކަންކަން ރެގިއުލޭޓްކޮށް ފިޔަވަޅު އަޅައި, ބެލެހެއްޓުމާއި ގާނޫނީ ވަކީލުންނަށް އިތުރަށް ތަމްރީން ދީ ގާނޫނީ ފަންނު ތަރައްގީކޮށް ބެލެހެއްޓުމެވެ.
