ލޯކަލް ކައުންސިލް އިންތިޚާބު: އެމްޑީޕީ ޕްރައިމަރީގައި ވާދަކުރުމަށް 958 މީހަކު ފޯމު ހުށަހަޅައިފި
9 ޖެނުއަރީ 2020 | ބުރާސްފަތި 18:16މާދަމާއަކީ ފޯމް ހުށަހެޅޭ ފަހު ދުވަސް
އެމްޑީޕީން މީގެ ކުރިން ބޭއްވި އިންތިޚާބެއްގެ ތެރެއިން
ލޯކަލް ކައުންސިލް އިންތިޚާބުގަ, އެމްޑީޕީގެ ފަރާތުން ވާދަކުރާ ފަރާތްތައް ކަނޑައެޅުމަށް ބާއްވާ އެމްޑީޕީގެ އެތެރޭގެ ޕްރައިމަރީގައި ވާދަކުރުމަށް 958 ފަރާތަކުން ފޯމު ހުށަހަޅައިފިއެވެ.
ރައްޔިތުންގެ މަޖިލީހުގެ ހެންވޭރު އުތުރު ދާއިރާގެ އެމްޑީޕީގެ މެންބަރު އިބްރާހިމް މުޢިއްޒު ވިދާޅުވީ، އެމްޑީޕީގެ ލޯކަލް ކައުންސިލް އިންތިޚާބަށް ކުރިމަތިލާ ކެންޑިޑޭޓުން ހޮވުމަށްޓަކައި 30 ޑިސެންބަރު 2019 ވަނަ ދުވަހު ކުރި އިޢުލާނާ ގުޅިގެން މިވީ ނުވަ ދުވަހުގެ ތެރޭގައި ޖުމުލަ 958 ފޯމު ލިބިފައިވާ ކަމަށެވެ.
އެގޮތުން އަތޮޅު ކައުންސިލްގެ ރައީސް ކަމަށް 22 ބޭފުޅަކު ކުރިމަތިލާފައިވާ ކަމަށެވެ. އަދި ރަށްރަށުގެ ކައުންސިލްތަކަށް ޖުމުލަ 866 ފާރާތަކުން ކުރިމަތިލާފައިވާ ކަމަށް އެމްޑީޕީން ބުނެއެވެ.
މީގެ އިތުރުން މުޢިއްޒު ވިދާޅުވީ، ރާއްޖޭގައި އޮތް 03 ސިޓީއަށް ބަލާއިރު، މާލެ ސިޓީގެ މޭޔަރު ކަމަށް 03 ބޭފުޅުން ކުރިމަތިލާފައިވާ ކަމަށާއި، 09 ކައުންސިލަރުން ކުރިމަތިލާފައިވާ ކަމަށެވެ. އައްޑޫ ސިޓީގެ މޭޔަރު ކަމަށް 03 ބޭފުޅުން ކުރިމަތިލާފައިވާއިރު، ކައުންސިލަރު ކަމަށް 34 ބޭފުޅުން ކުރިމަތިލާފައިވާ ކަމަށެވެ. އަދި ފުވައްމުލައް ސިޓީއަށް 03 މޭޔަރު ކުރިމަތިލާފާއިވާއިރު، ކައުންސިލް މެންބަރު ކަމަށް 09 ބޭފުޅުން ކުރިމަތިލާފައިވާ ކަމަށް މުޢިއްޒު ވިދާޅުވިއެވެ.
ލޯކަލް ކައުންސިލް އިންތިޚާބުގެ ޕްރައިމަރީގެ ޓައިމްލައިން އެމްޑީޕީން ޢާންމުކޮށްފައިވާއިރު، 30 ޑިސެންބަރު 2019 އިން 10 ޖެނުއަރީ 2020ގެ ނިޔަލަށް އިންތިޚާބުގެ ޕްރައިމަރީގައި ކުރިމަތިލުމުގެ ފުރުޞަތު ވަނީ ހުޅުވާލާފައެވެ. އެގޮތުން މާދަމާއަކީ ފޯމު ހުށަހެޅޭ އެންމެ ފަހު ދުވަހެވެ.
ލޯކަލް ކައުންސިލް އިންތިޚާބުގަ، އެމްޑީޕީގެ ފަރާތުން ވާދަކުރާ ފަރާތްތައް ކަނޑައެޅުމަށް ބާއްވާ އެމްޑީޕީގެ އެތެރޭގެ ޕްރައިމަރީގެ ވޯޓުލުން، މިހިނގާ ޖެނުއަރީ މަހުގެ 31 ވަނަ ދުވަހު ބޭއްވުމަށް ވަނީ ހަމަޖެހިފައެވެ.
ކެންޑިޑޭޓުންގެ ލިސްޓު 13 ޖެނުއަރީވާ ހޯމަ ދުވަހު ޢާންމުކުރާނެ ކަމަށް އެމްޑީޕީން ބުނެފައިވާއިރު، ވޯޓުލުމުގެ ޙައްޤު ލިބިގެންވާ މީހުންގެ ފައިނަލް ލިސްޓު ޢާންމު ކުރާނީ 15 ޖެނުއަރީވާ ބުދަ ދުވަހު ކަމަށް އެމްޑީޕީން ބުނެއެވެ.
އަންނަ އަހަރުގެ އެޕްރީލް މަހު ބާއްވާ ލޯކަލް ކައުންސިލް އިންތިޚާބަށް ކެމްޕޭން ކުރުމުގެ ޙަރަކާތްތައް މިހާރު ވަނީ ފަށާފައެވެ. މި އިންތިޚާބަކީ މިފަހުން ރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނަށް ގެނައި އާ އިޞްލާޙުތަކަށް ފަހު ބާއްވާ ފުރަތަމަ އިންތިޚާބެވެ.
މިޤާނޫނަށް ގެނައި މައިގަނޑު އިޞްލާޙުތަކުގެ ތެރޭގައި ކައުންސިލްތަކުގެ ދައުރު ފަސް އަހަރަށް އިތުރުކުރުމާއެކު، ހުރިހާ ކައުންސިލްތަކަކުން 33 އިންސައްތަ އަންހެނުންނަށް ޚާއްޞަ ކުރުމުގެ އިތުރުން، ކައުންސިލުތަކަށް އަމިއްލަ ނަމުގައި ވިޔަފާރިކުރުމުގެ ބާރުތައް ދިނުން ހިމެނެއެވެ.
