އެއްބަސްވުމެއްގައި ފޯރޖް ކޮށްފައިވާ ސޮއެއް ބޭނުންކުރެއްވިކަމަށް ބުނާ މައްސަލައެއްގައި ދ ޖުޑީޝަލް ދާއިރާގެ އިސް މެޖިސްޓްރޭޓް އަބްދުލް ރައްޒާޤް މުހައްމަދު ސަސްޕެންޑް ކޮށްފިއެވެ.
އަންގާރަ ދުވަހު ޖުޑީޝަލް ސަރވިސް ކޮމިޝަން (ޖޭއެސްސީ) އިން ނެރުނު ބަޔާނެއްގައި ބުނީ، ދ ކުޑަހުވަދޫ މެޖިސްޓްރޭޓް ކޯޓުން ބަލަމުންދާ މައްސަލައެއްގެ ޝަރީއަތަށް އަބްދުލް ރައްޒާޤް ހުށައެޅުއްވި އެއްބަސްވުމުގައިވާ ސޮޔަކީ ފޯރޖް ކޮށްފައިވާ ސޮއެއްކަމަށް ބުނާ މައްސަލައެއް ފުލުހުން ތަޙްޤީޤު ކުރަމުންދާކަން އަންގާވަފައިވާ ކަމަށެވެ.
އެގޮތުން ފުލުހުން އެކަން އަންގައި ކޮމިޝަނަށް ސިޓީ ފޮނުވުމާއެކު އޭނާގެ ސުލޫކީ މައްސަލަ ބެލުމަށާއި، ޖޭއެސްސީގެ ޤާނޫނުގެ 25 ވަނަ މާއްދާގެ (ޏ) ގެ ދަށުން އަބްދުލް ރައްޒާޤް މުޙައްމަދު ފަނޑިޔާރުންގެ މަސައްކަތުން ވަގުތީ ގޮތުން ސަސްޕެންޑް ކުރުމަށް ނިންމާފައިވާ ކަމަށެވެ. އަދި އެގޮތަށް ނިންމެވީ މިހިނގާ ޖެނުއަރީ މަހުގެ 7 ވަނަ ދުވަހު ކަމަށްވެސް ކޮމިޝަނުން ބުނެފައިވެއެވެ.
