ދަތުރުވެރިންގެ މާރުކޭޓް ހަތަރު ފަންގިފިލާއަށް އަލުން އިމާރާތްކުރަނީ
8 ޖެނުއަރީ 2020 | ބުދަ 19:04ޕާކިން ޒޯންތައް ހަދާނެ
ފަލަސުރުހީ ޕްރޮގްރާމްގެ ތެރެއިން، މާލެ ސިޓީ ކައުންސިލްގެ މޭޔަރ ޝިފާ
ދަތުރުވެރިންގެ މާރުކޭޓްގެ ހަތަރު ފަންގިފިލާއަށް އަލުން އިމާރާތް ކުރުމަށް ނިންމާފައިވާ ކަމަށް މާލޭ ސިޓީ ކައުންސިލުން ބުނެފިއެވެ.
ރާއްޖެޓީވީގައި ވާހަކަދައްކަވަމުން މާލެ ސިޓީ ކައުންސިލްގެ މޭޔަރ ޝިފާ މުހައްމަދު ވިދާޅުވީ ދަތުރުވެރިންގެ މާރުކޭޓުން ވީހާ ވެސް ގިނަ ބަޔަކަށް ވިޔަފާރި ހިންގުމުގެ ފުރުސަތު ދިނުމަކީ ގިނަ ކައުންސިލަރުން ބޭނުންވާ ގޮތް ކަމަށެވެ. އެގޮތުން މިހާރު ދަތުރުވެރިކަންގެ މާރުކޭޓު ހަތަރު ފަންގިފިލާއަށް ހެދުމަށާއި، އެސަރަހައްދުގައި ވެހިކަލްތައް ޕާކު ކުރެވޭ ގޮތަށް ޕާކިން ޒޯންތައް ހެދުމަށް ނިންމާފައިވާ ކަމަށެވެ. އަދި މިމަޝްވަރާތައް ކުރިއަށް ގެންދިޔައީ ކުރީގެ ރައީސް އަދި ރައްޔިތުން މަޖިލީހުގެ ރައީސް މުހައްމަދު ނަޝީދުވެސް އިންނަވައިގެން ކަމަށް ޝިފާ ވިދާޅުވިއެވެ.
ޝިފާ ވިދާޅުވީ މިހާރު ދަތުރުވެރިންގެ މާރުކޭޓް މަރާމާތުކުރާނެ ގޮތުގެ ކުރެހުން އެޗްޑީސީންގެ އެހީތެރިކަމާއެކު ކުރިއަށްދާ ކަމަށާއި، ފައިސާގެ ކަންކަން ހަމަޖެއްސުމަށް ފިނޭންސް މިނިސްޓްރީއާއެކު ކުރިއަށްދާ ކަމަށެވެ. އަދި ލޯނެއް ނަގަންޖެހިއްޖެ ހާލަތެއްގައި އެކަންވެސް ކުރުމަށް ނިންމާފައިވާ ކަމަށް ޝިފާ ވިދާޅުވިއެވެ.
މީގެ އިތުރުން ޝިފާ ވިދާޅުވީ މާރުކޭޓްތައް ހުރި މިސަރަހައްދަކީ ތޮއްޖެހިފައި އޮންނަތަނެއް ކަމަށާއި، މިމައްސަލައަށް ވެސް ހައްލު ހޯދަން ޖެހޭ ކަމަށެވެ.
މާރުކޭޓް ކޮމެޓީން ހަދާފައިވާ ސަރވޭއަށް އަލިއަޅުއްވާލައްވާ ޝިފާ ވިދާޅުވީ މިފާއިތުވެގެންދިޔަ ދުވަސްތަކުގައި މާރުކޭޓް 53 އިންސައްތަ ބޭނުންކުރަމުންދިޔައީ ބިދޭސީން ކަމަށެވެ.
އެހެންކަމުން އަލުން މާރުކޭޓް ހެދިގެންދާއިރު މިހާރު ކުރިން ފެނުން މާރުކޭޓް ނުފެންނާނެ ކަމަށާއި، އެއަށްވުރެ ބޮޑަށް ސާފުތާހިރުވެ ހުރިހާ ގޮތަކުން ރަނގަޅުވާނެ ކަމަށް ޝިފާ ވިދާޅުވިއެވެ. އަދި ވިދާޅުވީ މާރުކޭޓް ހަދާ ގޮތުގެ ކުރެހުންތައް ވަރަށް އަވަހަށް އާންމުކުރާނެ ކަމަށެވެ.
