މެންޗެސްޓަރ ޔުނައިޓެޑްގެ ކޯޗުކަމާއި ދުވަހަކުވެސް ހަވާލު ނުވާނެ ކަމަށް މެންޗެސްޓަރ ސިޓީގެ ކޯޗު ޕެޕް ގާޑިއޯލާ ބުނެފިއެވެ.

އިނގިރޭސި ލީގު ކަޕްގެ ސެމީ ފައިނަލުގައި އަންގާރަ ދުވަހުގެ ރޭ ޔުނައިޓެޑްގެ ދަނޑުގައި މި ދެޓީމު ކުޅޭ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ސިޓީގެ ކޯޗު ގާޑިއޯލާ ބުނީ، ޔުނައިޓެޑުން އޭނާއަށް އޮފަރ އެއް އައި ކަމުގައިވިޔަސް އެ ޓީމަށް ކޯޗުކަން ނުކޮށްދޭނެ ކަމަށެވެ. އެއީ އޭނާ އަށް އެ ކްލަބާއި ވާދަވެރި ސިޓީގައި މަސައްކަތްކުރެވިފައި ވުމުން ކަމަށެވެ. މީގެ އިތުރުން ގާޑިއޯލާ ބުނީ އޭނާއަށް އޮފަރ އެއް ލިބިފައި ނެތްނަމަ، އޭނާ ހުންނާނީ ދިވެހިރާއްޖޭގައި ކަމަށެވެ. އިތުރަށް ގާޑިއޯލާ ބުނީ ޔަގީނުންވެސް ސިޓީގައި މަސައްކަތް ކުރުމަށްފަހު އޭނާ ޔުނައިޓެޑްގައި މަސައްކަތް ނުކުރާނެ ކަމަށެވެ. ހަމަ އެގޮތަށް ބާސެލޯނާގައި މަސައްކަތް ކުރުމަށްފަހު ވާދަވެރި ރެއާލް މެޑްރިޑްގައިވެސް މަސައްކަތް ނުކުރާނެ ކަމަށް ގާޑިއޯލާ ބުންޏެވެ.

މީޑިއާ ރިޕޯޓުތައް ބުނާ ގޮތުންނަމަ، މި ސީޒަނަށް ފަހު ގާޑިއޯލާ ސިޓީގެ ކޯޗުކަމުގެ މަގާމުން ވަކިކުރާނެއެވެ. ނަމަވެސް އެކަމަށް ރައްދުދީ ގާޑިއޯލާ ބުނީ ސިޓީގެ ކޯޗު ކަމުން ވަކިނުކުރާނެ ކަމުގެ ޔަގީންކަން އޭނާއަށް އެބައޮތް ކަމަށެވެ.

ގާޑިއޯލާ ބުނީ މި ސީޒަނުގަ، އެޓީމުން ވި ކޮންމެ ބައްޔަކީ ކުޅުންތެރިންނަށް ހެދުނު ގޯސް ތަކުން ވި ބައްޔެއް ކަމަށާއި، އެކަން އޭނާ ގަބޫލު ކުރާ ކަމަށެވެ. އަދި ލިވަރޕޫލަށް ވުރެ 14 ޕޮއިންޓް ފަހަތުން އޭނާގެ ޓީމު ތާވަލުގެ ތިންވަނައިގަ އޮތް ކަން ޓީމުގެ މެނޭޖްމެންޓުންވެސް ގަބޫލު ކުރަން ޖެހޭ ކަމަށެވެ.

ގާޑިއޯލާގެ ކޯޗު ކަމުގެ ދަށުގައި، ސިޓީން ވަނީ 2017-18 ވަނަ އަހަރުގެ އިނގިރޭސި ޕްރިމިއަރ ލީގު ކާމިޔާބު ކޮށްފައެވެ. އަދި އެ ޓީމު ވެގެން ގޮސްފައިވަނީ ފުރަތަމަ ފަހަރަށް 100 ޕޮއިންޓް ހަމަކޮށް ލީގު ކާމިޔާބު ކުރި ޓީމަށެވެ. ނަމަވެސް މި ސީޒަނުގައި ސިޓީގެ ފަރާތުން ފެނިގެން ގޮސްފައިވަނީ ދަށް ކުޅުމެކެވެ.