ޒުވާން މިޑްފިލްޑަރ އައިސަމް މާޒިޔާއަށް!

ޓީސީ ސްޕޯޓްސް ކްލަބްއަށް ކުޅެމުން އަންނަ ގައުމީ ޓީމުގެ ޒުވާން މިޑްފިލްޑަރ އިބްރާހިމް އައިސަމް މާޒިޔާއަށް ސޮއިކޮށްފިއެވެ.

22 އަހަރުގެ އައިސަމް މާޒިޔާއަށް ބަދަލުވީ ތިން އަހަރާއި ބައިގެ އެއްބަސްވުމެއްގެ ދަށުންނެވެ. އޭނާއަކީ މި ފަހަރުގެ ޓްރާންސްފަރ މާކެޓްގައި މާޒިޔާއަށް ސޮއިކުރި ދެވަނަ ކުޅުންތެރިޔާއެވެ. މީގެ ކުރިން މާޒިޔާއިން ވަނީ މި ޓްރާންސްފަރ މާކެޓްގައި އަފްގާނިސްތާނުގެ ގައުމީ ޓީމުގެ ޑިފެންޑަރ ޝާރިފް މުހައްމަދުގެ ސޮއިވެސް ހޯދައިފައެވެ.

ކްލަބް އީގަލްސްއިން ކެރިޔަރުފެށި އައިސަމްއަކީ ޕްރެޝަރާއި ކެރިގެން ކުރިމަތިލާ އެޓޭކްއާއި ޑިފެންސް ބެލެންސް ހިފެހެއްޓުމުގައި ތަފާތުދައްކާ މޮޅު ކުޅުންތެރިޔެކެވެ.

ގައުމީ ޓީމް ސްކޮޑުގައި ނިމިދިޔަ އަހަރު ހިމެނުނު އައިސަމް އެންމެ ފުރަތަމަ ގައުމީ ޓީމު ސްކޮޑުގައި ހިމެނިގެން ކުޅުނު މުބާރާތަކީ ވޯލްޑްކަޕް/ އޭޝިއަން ކަޕް ޖޮއިންޓް ކޮލިފައިންގައި ރަށުން ބޭރުގައި ގުއާމާއި ދެކޮޅަށް ކުޅުނު މެޗުގައެވެ. އޭގެ ފަހުން ގައުމީ ޓީމު ކުޅުނު ހުރިހާ މެޗެއްގައި އައިސަމް ކުޅެފައިވެއެވެ. އެގޮތުން 2019 ވަނަ އަހަރު ޑިސެމްބަރު މަހު ނޭޕާލުގައި ބޭއްވި ސައުތް އޭޝިއަން ގޭމްސްގައި ވެސް އޭނާ ކުޅެފައިވެއެވެ.

މާޒިޔާ އިން ބުނީ އައިސަމްގެ ސޮއި އެޓީމުން ހޯދީ އައިސަމްއަކީ މި ސީޒަނުގައި ތަފާތު ދައްކަމުން އަންނަ މޮޅު ކުޅުންތެރިޔަކަށް ވެފައި އައިސަމަކީ ސީނިއާ ގައުމީ ޓީމުގައި މުހިންމު ދައުރެއް އަދާކުރަމުން އަންނަ ކުޅުންތެރިއަކަށް ވާތީ ކަމަށެވެ.

މާޒިޔާއިން ޓީމު ވަރުގަދަ ކުރަމުން މިދަނީ ކުރިޔަށް އޮތް އޭއެފްސީ ކަޕަށް ތައްޔާރުވުމުގެ ގޮތުންނެވެ. މާޒިޔާއިން އޭއެފްސީ ކަޕްގެ ޕްރިލިމިނަރީ ބުރުގައި ކުޅޭނީ ބަންގްލަދޭޝް ޕްރިމިއާ ލީގުގެ ރަނަރަޕް އަބަހާނީ ލިމިޓެޑް ޑާކާއާއެވެ.