ހދ. އަތޮޅުގެ ވެރިކަންކުރާ ރަށެއް ކަނޑައެޅުމުގެ މަޝްވަރާތައް ކުރިޔަށް އެބަދޭ: ރައީސް އޮފީސް
އެންމެ ރަނގަޅީ ކުޅުއްދުއްފުށީގައި ވެރިކަން ކުރުން: ނޮޅިވަރަން ދާއިރާގެ މެމްބަރު
ހދ. ކުޅުއްދުއްފުށި
ހދ. ކުޅުއްދުއްފުށިއަށް ސިޓީގެ ދަރަޖަދެވިގެން ދިޔުމާއިއެކު އެ އަތޮޅު ވެރިކަން ކުރާ ރަށެއްގެ ކަނޑައެޅުމުގެ މަޝްވަރާތައް ކުރިޔަށްދާކަމަށް ރައީސް އޮފީހުން ބުނެފި އެވެ.
ކުޅުދުއްފުއްޓަށް ސިޓީއެއްގެ ދަރަޖަދީފައިވަނީ ހުސްވި އަހަރުގެ ޑިސެމްބަރު މަހުގެ 31 ވަނަ ދުވަހު އެވެ. އެރަށަށް ސިޓީއެއްގެ ދަރަޖަ ދިނުމަކީ ރައީސް ސޯލިހުގެ ރިޔާސީ ވައުދުފުޅަކަށްވާއިރު، އާބާދީގައި 10،000 މީހުން ހަމަވެއްޖެނަމަ އެ ރަށަކަށް ސިޓީއެއްގެ ދަރަޖަ ދެވިގެން ދާނެކަމަށް ޤާނޫނުގައި ބަޔާންކޮށްފައިވެއެވެ.
ސީޓީއެއްގެ ދަރަޖަ ލިބިފައިވިޔަސް އަދިވެސް ހދ. އަތޮޅުގައި ވެރިކަން ކުރަމުން ދަނީ ކުޅުދުއްފުށީގައެވެ. ސިޓީއެއްގެ ދަރަޖަ އެ ރަށަށް ދިން ހިސާބުން ފެށިގެން ވެރިކަން ކުރަން އެ އަތޮޅުގެ ރަށެއް ހަމަޖައްސަންޖެހެއެވެ.
އިދާރީ ދާއިރާތައް ލާމަރުކަޒީ އުސުލުން ހިންގުމުގެ ޤާނޫނުގެ 3 ވަނަ މާއްދާގެ (ހ) ގައި ބަޔާންކޮށްފައިވަނީ ސިޓީ ކައުންސިލްގެ ޝަރުތުހަމަވާ އިދާރީ ދާއިރާތައް ފިޔަވައި، އެހެން ދާއިރާތައް ލާމަރުކަޒީ އުސޫލުން ހިންގުމަށްޓަކައި ކޮންމެ އިދާރީ ދާއިރާއަކަށް އަތޮޅު ކައުންސިލެއް ރައީސުލްޖުމްހޫރިއްޔާ އުފައްދަވަންވާނެ ކަމަށެވެ. ޤާނޫނުގައި ބުނެފައިވާގޮތުން ރާއްޖޭގެ ދެ ވަނަ އިދާރީ ދާއިރާއަކީ ހދ. އަތޮޅު އެވެ. އެހެންކަމުން ކުޅުދުއްފުށި ސިޓީއަކަށް ބަދަލުވުމުން އެ އަތޮޅުގެ ވެރިކަން ކުރާނެ ރަށެއް ކަނޑައަަޅަންޖެހޭނެ އެވެ.
ރާއްޖެ.އެމްވީއާ ވާހަކަދައްކަވަމުން ރައީސް އޮފީހުގެ ތަރުޖަމާނު އިބްރާހިމް ހޫދު ވިދާޅުވީ، އެކަންތައްތަކުގެ މަޝްވަރާތައް މިހާރު ކުރިޔަށްދާ ކަމަށެވެ. އެހެން ނަމަވެސް އެކަމާއި ގުޅޭ އިތުރު މައުލޫމާތެއް އޭނާ ހާމައެއް ނުކުރައްވައެވެ. އަދި އެ އަތޮޅުގެ ވެރިކަން ކުރާނެ ރަށެއް ކަނޑައެޅޭނެ ވަކި ތާރީހެއްވެސް ހޫދު ވިދާޅެއްނުވެއެވެ.
ހދ. އަތޮޅުގެ ވެރިކަން ކުރާނެ ރަށަށް ކަނޑައެޅުމާއި މެދު ބަހުސްތަކެއް ކުރެވެމުންދާއިރު އަތޮޅުވެރިކަން އަލުން ނޮޅިވަރަންފަރަށް ބަދަލުކުރަން އެ ރަށު ކައުންސިލުން ވަނީ ޝައުގުވެރިކަން ފާޅުކޮށްފައެވެ.
ރާއްޖެ.އެމްވީއާ ވާހަކަދައްކަވަމުން ރައްޔިތުންގެ މަޖިލީހުގެ ނޮޅިވަރަމް ދާއިރާގެ މެމްބަރު މުހައްމަދު ނަޝީދު އަބްދުﷲ (މޮސްޓާ) ވިދާޅުވީ، އޭނާގެ ނަޒަރުގައި ރައްޔިތުންނަށް އެންމެ ރަނގަޅުގޮތަކީ ކުރިން އޮތްގޮތަށް ވެރިކަންކުރާ ރަށުގެ ގޮތުގައި ކުޅުދުއްފުށި އޮތުން ކަމަށެވެ. ނަޝީދު އެހެން ވިދާޅުވާ ސަބަބަކީ، މާލެ ފިޔަވާ ކުޅުދުއްފުއްޓަކީ އުމްރާނީ ގޮތުންނާއި އިޖްތިމާއި ގޮތުން ކުރިއަރާފައިވާ އެއް ރަށަށް ވާތީއެވެ. އަދި އެ ރަށް ނޫން އެހެން ރަށެއްގައި ވެރިކަން ކުރާނަމަ އަތޮޅު ކައުންސިލަށް ދިޔުމަށް ދަތުރެއްކޮށްފައި ދިޔުމުން ރައްޔިތުންގެ ޖީބުން ބޮޑު އެއްޗެއްދާނެ ކަމަށް ވިދާޅުވިއެވެ.
ނަޝީދު ވިދާޅުވީ، އެހެން ނޫންނަމަ ދެން އަތޮޅުވެރިކަން ކުރަން އެންމެ ރަނގަޅުވާނީ އެ އަތޮޅު މެދުގައި އޮންނަ ރަށެއް ކަމަށެވެ. އެކަމަކު އެއީ ކުރިނބި، ނޮޅިވަރަން ނުވަތަ ނޮޅިވަރަންފަރު ކަމެއް ނަޝީދު ވިދާޅެއް ނުވެއެވެ.
ހދ. އަތޮޅުގައި 14 ރަށެއް އޮވެއެވެ.
