ސަރުކާރުގެ ގެދޮރުވެރިކުރުމުގެ ޕްރޮގުރާމުގެ ދަށުން ހިތަދުއާއި ހުޅުދޫގައި ޢިމާރާތްކޮށްފައިވާ ފްލެޓުތަކުގެ ތެރެއިން ޢާންމުކޮށް މިހާތަނަށް ދޫނުކޮށް ހުރި ފްލެޓްތައް ސޯޝަލް ހައުސިންގ ސްކީމްގެ ދަށުން ދޫކުރުމަށް ނިންމާފައިވާކަމަށް އައްޑޫ ސިޓީ ކައުންސިލުން ބުނެފިއެވެ.

އައްޑޫ ސިޓީ ކައުންސިލުން ބުނީ މިފްލެޓްތަކަކީ ކުރިން ވިއްކާގޮތަށް ބަހައްޓާފައި ހުރި ފްލެޓްތަކެއް ކަމަށެވެ. ނަމަވެސް ވިޔަފާރި އުޞޫލުން ވިއްކުމުގެ ބަދަލުގައި، އެފްލެޓްތައް ސޯޝަލް ހައުސިންގ ސްކީމްގެދަށުން ކުރިންވެސް ހައުސިންގ ޔުނިޓް ދޫކުރުމަށް ކަނޑައެޅިފައިވާ އުޞޫލާއި އެއްގޮތަށް ދޫކުރުމަށް ހައުސިންގ މިނިސްޓްރީން ނިންމާ އެކަން ކައުންސިލް އިދާރާއަށް އަންގާފައިވާކަމަށެވެ. އެހެންކަމުން އައްޑޫ ސިޓީ ކައުންސިލުން ވަނީ އެ ފްލެޓްތައް ޢާންމުންނަށް ދޫކުރުމަށް އެކަން އިޢުލާންކޮށްފައެވެ.

ސަރުކާރުގެ ގެދޮރުވެރިކުރުމުގެ ޕްރޮގުރާމުގެ ދަށުން ހިތަދޫގައި ޢިމާރާތްކޮށްފައިވާ 264 ފްލެޓުގެ ތެރެއިން ކުރިން ވިއްކާ ގޮތަށް ބެހެއްޓީ 32 ފްލެޓެވެ. ސޯޝަލް ހައުސިންގ ސްކީމްގެ ދަށުން ކުރިންވެސް ހައުސިންގ ޔުނިޓް ދޫކުރުމަށް ކަނޑައެޅާފައިވާ އުޞޫލާއި އެއްގޮތަށް މި 32 ފްލެޓަށް ކުރިމަތިލެވޭނީ އައްޑޫ ސިޓީގެ ހިތަދޫ ރައްޔިތުންނާއި ހިތަދުއަށް ދިރިއުޅުން ބަދަލުކުރަން ބޭނުންވާ މަރަދޫ، މަރަދޫފޭދޫ، ފޭދޫ ރައްޔިތުންނަށް ކަަމަށް އައްޑޫ ސިޓީ ކައުންސިލުން ބުނެއެވެ.

ހުޅުދޫގައި ޢިމާރާތްކޮށްފައިވާ 48 ފްލެޓުގެ ތެރެއިން ކުރިން ވިއްކާ ގޮތަށް ބެހެއްޓި 9 ފްލެޓެވެ. އައްޑޫ ސިޓީ ކައުންސިލުން ބުނީ ސޯޝަލް ހައުސިންގ ސްކީމްގެ ދަށުން ކުރިންވެސް ހައުސިންގ ޔުނިޓް ދޫކުރުމަށް ކަނޑައެޅިފައިވާ އުޞޫލާއި އެއްގޮތަށް މި 9 ފްލެޓަށް ކުރިމަތިލެވޭނީ އައްޑޫސިޓީގެ ހުޅުދުއާއި މީދޫ ގެ ރައްޔިތުންނަށް ކަމަށެވެ.

ފްލެޓަށް އެދޭ ފޯމް ފުރިހަމަކޮށް، ފޯމާއެކު ހުށަހަޅަންޖެހޭނެ ކަމަށް ބަޔާންކޮށްފައިވާ އެހެނިހެން ލިޔެކިއުންތަކާއެކު ކައުންސިލް އިދާރާއަށް ހުށަހަޅަންޖެހެނީ މި ޖަނަވަރީ މަހުގެ 16 ވަނަ ދުވަހުގެ އޮފީސް ބަންދުވުމުގެ ކުރިން ކަމަށް ކައުންސިލުން ބުނެއެވެ. ފްލެޓަށް އެދޭ ފޯމް އެ އިދާރާ އިންނާއި އަވަށު އޮފީސްތަކުން ލިބެން ހުންނާނެ ކަމަށާއި އިދާރާގެ ވެބްސައިޓުން ޑައުންލޯޑު ކުރެވެންވެސް ހުންނާނެކަމަށް ކައުންސިލުން ބުނެއެވެ.

ހިތަދޫގައި ޢިމާރާތްކޮށްފައިވާ 264 ފްލެޓްގެ ތެރެއިން މީގެ ކުރިން ޢާންމުކޮށް ދޫކުރަން ހުޅުވާލީ 230 ފްލެޓެވެ. މިހާތަނަށް ޙަވާލުކުރެވުނީ 180 ފްލެޓެވެ. ޙަވާލުނުކުރެވި 50 ފްލެޓް ހުރިއިރު ހިތަދޫ ފްލެޓް ޞަރަޙައްދު ލޭންޑްސްކޭޕް ކުރުމާއި، ލައިޓް ޖެހުމުގެ މަސައްކަތް ޓެންޑަރ ކުރެވިފައިވާކަމަށް ވެސް އައްޑޫ ސިޓީ ކައުންސިލުން ބުނެއެވެ.

ހުޅުދޫގައި ޢިމާރާތްކޮށްފައިވާ 48 ފްލެޓްގެ ތެރެއިން މީގެ ކުރިން ޢާންމުކޮށް ދޫކުރަން ހުޅުވާލީ 38 ފްލެޓެވެ. ފްލެޓަށް އެދި ފޯމް ހުށަހެޅި މީހުންގެ ތެރެއިން ޝަރުޠު ހަމަވީ 25 ފަރާތެކެވެ. ދާއިމީ ލިސްޓުގަ ހިމެނުނީ 20 ފަރާތެކެވެ. އެގްރީމަންޓްގައި މިހާތަނަށް ސޮއި ކުރީ 4 ފަރާތަކުންނެވެ.