ފްލޫއާ ގުޅިގެން ނުވަ މީހަކު އައިސީޔޫގައި ދަނީ ފަރުވާ ދެމުން: އައިޖީއެމްއެޗް

މިހާރު ފެތުރެމުންދާ ރޯގާތަކާއި ގުޅިގެން ހޯމަ ދުވަހުގެ ނިއަލަށް އައިޖީއެމްއެޗުގެ އައިސީޔޫގައި ނުވަ މީހުން ފަރުވާ ދެމުންގެންދާ ކަމަށް އެހޮސްޕިޓަލުން ހާމަކޮށްފި އެވެ.

ރާއްޖޭ ޓީވީގެ "ޚަބަރުފީތާ"ގައި ވާހަކަ ދައްކަވަމުން އައިޖީއެމްއެޗްގެ ޕަބްލިކް ރިލޭޝަންސް އެންޑް މީޑިޔާގެ ޑިރެކްޓަރ އަހްމަދު މައުސޫމް ވިދާޅުވީ، މިހާރު ފެތުރެމުންދާ ރޯގާއާ ގުޅިގެން ގިނަ އަދަދެއްގެ ބަޔަކު އެހޮސްޕިޓަލުގެ ފްލޫ ކްލިނިކަށް ޑޮކްޓަރަށް ދައްކަމުންދާ ކަމަށެވެ. އެހެން ނަމަވެސް މިމަހުގެ 18 ވަނަ ދުވަހުން ފެށިގެން ޑޮކްޓަރަށް ދައްކާ މީހުންގެ އަދަދު މަދުވަން ފަށާފައިވާ ކަމަށް އޭނާ ވިދާޅުވި އެވެ.

މައުސޫމް ވިދާޅުވީ، ހޯމަ ދުވަހުގެ ނިއަލަށް 27 މީހުން އެޑްމިޓްކޮށްފައިވާ ކަމަށެވެ. އަދި އެ ހޮސްޕިޓަލުގެ ފްލޫ ކްލިނިކަށް މިހާތަަނަށް 3،499 މީހުންނަށް ޑޮކްޓަރަށް ދައްކާފައިވާ ކަމަށް އޭނާ ވިދާޅުވި އެވެ.

އައިޖީއެމްއެޗުން ދަނީ މާބަނޑު މީހުންނަށް އިންފްލުއެންޒާ ވެކްސިން ޖަހަމުންނެވެ.

" މިހާތަނަށް މާބަނޑު 888 މީހުންނަށް ވަނީ ވެކްސިން ދެވިފަ. މާބަނޑު މީހުންނަށް ހުކުރު ދުވަސް ފިޔަވާ ކޮންމެ ދުވަހަކު ވެސް ވެކްސިން ދެމުންގެންދަނީ،" މައުސޫމް ވިދާޅުވި އެވެ.

މިހާރު ފެތުރެމުންދާ ރޯގާއާ ގުޅިގެން ސާފުތާހިރު ކަމަށް ހުރިހާ ފަރާތްތަކުން ވެސް އިސްކަން ދެއްވުމަށް އައިޖީއެމްއެޗުގެ ޕަބްލިކް ހެލްތު ސްޕެޝިއަލިސްޓް ޑރ. އަބްދުލް މަލިކް ވިދާޅުވި އެވެ. އަދި ހޮސްޕިޓަލަށް ކޮންމެހެން، އަންނަން ނުޖެހޭ ހާލަތްތަކުގައި ހޮސްޕިޓަލަށް ނުދިއުމަށް ވަނީ އެދިފަ އެވެ. މަލިކް ވިދާޅުވީ، މިހާރު ފެތުރެމުންދާ ފްލޫއާ ގުޅިގެން އެޑްމިޓްކޮށް، އައިސީޔޫގައި ފަރުވާ ދެމުންދާ މީހުންނަކީ ކޮންމެވެސް އެހެން ބައްޔެއް ހުންނަ ފަރާތެއް ކަމަށެވެ. އެހެން ކަމުން، ބޮޑެތި ބަލިތައް ހުރި ފަރާތްތަކުން ބަލިން ރައްކާތެރިވުމަށް ޚާއްސަ ސަމާލުކަމެއް ދިނުމަށް ވަނީ އެދިފަ އެވެ.

އައިޖީއެމްއެޗުގައި ފްލޫ ކްލިނިކް ހުޅުވާފައިވަނީ 11 މަރޗްގަ އެވެ.