އެމެރިކާއިން އީރާންގެ ސަލާމަތީ ބާރުތަކުގެ އިސްވެރިޔާ ގާސިމް ސުލައިމާނީ އަވަހާރަކޮށްލާފައި ވަނިކޮށް ބަގުދާދުގައި ހުންނަ އެމެރިކާ އެމްބަސީއަށް ރޮކެޓް ހަމަލާއެއްދީފި އެވެ.

ބީބީސީގެ އޮފިޝަލަކާއި ހަވާލާދީ މީޑިއާތަކުގައި ރިޕޯރޓްކޮށްފައިވާގޮތުން އިރާޤުގެ ވެރިރަށް ބަގްދާދުގައި ހުންނަ އެމެރިކާ އެމްބަސީގެ ގްރީން ޒޯން ހިމެނޭ ސަރަޙައްދަށް ހޮނިހިރު ދުވަހުގެ ވަގުތެއްގައި ވަނީ ރޮކެޓް ހަމަލާއެއް ދީފައެވެ.

އޭގެއިތުރުން، އިރާޤުގެ ވެރިރަށުން ބޮޑު ދެ ގޮވުމެއްގެ އަޑު އިވިގެން ދިޔަ ކަމަށް މަންޒަރުދުއް ފަރާތްތަކާއި ހަވާލާދީ ރޮއިޓަރސްގައި ރިޕޯރޓްކޮށްފައިވެއެވެ. އަދި މި ހަމަލާގެ ސަބަބުން އެމްބަސީއަށް ވަންނަ ދޮރު ބަންދުކޮށްފައިވާކަމަށް ރިޕޯރޓްތައް ބުނެއެވެ.

އޭގެ އިތުރުން، އިރާޤުގައި ހުންނަ ބަލާދް އެއާފޯސް ބޭސްއަކަށްވެސް ދެ ރޮކެޓް އަމާޒުކޮށް، ހަމަލާދީފައިވާކަމަށް އިރާޤުގެ މީޑީއާތަކާއި ހަވާލާދީ ބޭރުގެ މީޑިއާތަކުން ދަނީ ރިޕޯރޓްކުރަމުންނެވެ.

އިރާގުގައި ހުންނަ އެމެރިކާ އެމްބަސީއަށް ހަމަލާދީފައިވާކަމަށް ރިޕޯރޓްތައް ބުނާއިރު، އެމެރިކާއަށް ރައްދު ހަމަލާ ދިނުމަށް 35 ސަރަޙައްދެއް ފާހަގަކޮށްފައިވާނެ ކަމަށް އީރާނުގެ އަސްކަރިއްޔާއިން ވަނީ ބުނެފައެވެ. އެގޮތުން އެމެރިކާގެ ގިނަ އުޅަނދުތައް ހުރަސްކުރާ ހޮރުމޫޒު ކަނޑުއޮޅިއަކީ މުހިއްމު ޓާރގެޓެއް ކަމަށާއި، އޭގެއިތުރުން އިޒްރޭލުގެ އިޤްތިސާދީ މައި ހަބް ކަމަށްވާ ތެލަވިލްއަށްވެސް ހަމަލާތައް އަމާޒުކުރާނެކަމުގެ އިޝާރާތެއް އީރާނުގެ އަސްކަރިއްޔާއިން ވަނީ ދީފައެވެ.