ޔުނައިޓެޑުން ޕޮގްބާ ވިއްކާލުމަށް ގިގްސް ގޮވާލައިފި
3 ޖެނުއަރީ 2020 | ހުކުރު 12:15ޕޮގްބާގެ ކުޅުން އެއް ފެންވަރެއްގައި ނުހިފެހެއްޓޭ: ގިގްސް
ޔުނިއިޓެޑަށް ކުޅެމުން އަންނަ ފަރަންސޭސީ މިޑްފީލްޑަރު ޕޯލް ޕޮގްބާ
ޔުނައިޓެޑަށް ކުޅެމުން އަންނަ ފަރަންސޭސްވިލާތުގެ ހުނަރުވެރި މިޑްފީލްޑަރު ޕޯލް ޕޮގްބާ ވިއްކާލުމަށް، ރަޔަން ގިގްސް ގޮވާލައިފިއެވެ.
ޕްރިމިއަރ ލީގު ޕްރޮޑަކްޝްންސްއިން ކުރި ސުވާލަކަށް ޖަވާބުދެމުން ގިގްސް ބުނީ، މިވަގުތު ޔުނައިޓެޑުގެ ސްކޮޑުގައި ހުރި އެންމެ ހުނަރުވެރި މިޑްފީލްޑަރަކީ ޕޮގްބާ ކަމާއިމެދު ޝައްކެއްނުކުރާ ނަމަވެސް، އޭނާއަކީ އެއް ފެންވަރެއްގައި މެޗުތަކުގައި ކުޅެވޭ ކުޅުންތެރިއެއް ނޫންކަމަށެވެ. އެގޮތުން ޔުނައިޓެޑަށް އެންމެ ފައިދާ ބޮޑުވާނީ އޭނާ ވިއްކާލުންކަމަށް ގިގްސް ބުންޏެވެ.
އަންނަ ސީޒަނުގައި ޕޮގްބް ޔުނައިޓެޑުން ފެނިދާނެ ކަމާއިމެދު މިހާރުވެސް ސުވާލުތަކެއް އުފެދިފައިވާއިރު، މިހިނގާ ޖެނުއަރީ މަހުގެ ޓްރާންސްފަރ ބާޒާރުގައި އޭނާ ޔުނައިޓެޑް ދޫކޮށްނުލާނެކަމަށް އޭނާގެ އޭޖެންޓް މީނޯ ރައޯލާވެސް ވަނީ ބުނެފައެވެ. ނަމަވެސް އަންނަ ސީޒަނާ ބެހޭގޮތުން އޭނާ ސީދާ މައުލޫމާތެއް ހާމަކޮށްފައެއް ނުވެއެވެ.
ގިގްސް ބުނީ ޕޮގްބާގެ ކުރިމަގާ މެދު މީޑިއާއިން ކުރާ ސުވާލުތަކުން ޔުނައިޓެޑުގެ ކޯޗު އޮލެ ގުނަރ ސޯލްޝަޔާއަށްވެސް އިތުރު ޕްރެޝަރުތައް ކުރިމަތިވާ ކަމަށެވެ. އަދި ޕޮގްބާ ޔުނައިޓެޑުގައި ހުރީ އުފަލުން ކަމާއިމެދު ސުވާލު އުފެދޭ ކަމަށްވެސް ގިގްސް ބުނެފައިވެއެވެ.
އަނިޔާއާހެދި މި ސީޒަނުގައި ޕޮގްބާ ޔުނައިޓެޑަށް ކުޅެފައިވަނީ އެންމެ ހަތް މެޗެވެ. އަދި މިހާރުވެސް އޭނާ ކުޅުމުން ދުރުގައި ހުރިއިރު، ސީދާ މެޗް ފިޓްނަސް ލިބި ކުޅެން ނިކުންނާނެ ތާރީހެއް ކަށަވަރެއް ނޫނެވެ.
