ސިޓީގެ ޓާގެޓަކީ ގަދަ ހަތަރެއް: އަގުއެރޯ

އިނގިރޭސި ޕްރިމިއަރ ލީގުގެ އެންމެ ފަހުގެ ޗެމްޕިއަން މެންޗެސްޓަރ ސިޓީގެ ޓާގެޓަކީ ގަދަ ހަތަރެއް ކަމަށް އެޓީމުގެ ފޯވަރޑް ސާޖިއޯ އަގުއެރޯ ބުނެފިއެވެ.

މި ސީޒަނުގައި ލީގުތަށި ޖެހިޖެހިގެން ތިންވަނަ ފަހަރަށް އުފުލާލުމުގެ ޢަޒުމުގައި ނިކުތް ސިޓީއަށް މި ސީޒަނުގައި މާކަ އެދެވޭ ކުޅުމެއް ދެއްކިފައެއް ނުވެއެވެ. އެގޮތުން ލީގުގަ މިހާތަނަށް ސިޓީން ކުޅުނު 20 މެޗުގެ ތެރެއިން ފަސް މެޗުން އެޓީމު ބަލިވެފައިވާއިރު ސިޓީއިން އޮތީ ލީގު ތާވަލުގެ ތިން ވަނައިގައިއެވެ. ލީގު ތާވަލުގެ އެއްވަނައިގަ ލިވަރޕޫލުން އޮތީ އެއް މެޗު މަދުން ކުޅެ 55 ޕޮއިންޓާއެކުގައެވެ.

އަނިޔާއިން ރަނގަޅުވެ، އަގުއެރޯ ކުޅުނު ފުރަތަމަ މެޗަކީ މިދިޔަ ހުކުރު ދުވަހުގެރޭ ސިޓީން ވޮލްވްސް އާއި ދެކޮޅަށް ކުޅުނު މެޗެވެ. އެމެޗުގެ ފުރަތަމަ އެގާރާގައި ހިމެނިގެން އަގުއެރޯ ކުޅެން އެރި ނަމަވެސް މެޗުގެ 12 ވަނަ މިނެޓުގަ ސިޓީގެ ކީޕަރަށް ރަތް ކާޑު ދެއްކުމާއި ގުޅިގެން ދެވަނަ ކީޕަރު ބްރާވޯ އެރުވީ އަގުއެރޯ ބަދަލުކުރުމަށްފަހުގައެވެ. އެމެޗުން ސިޓީ ބަލިވީ 2-3 ގެ ނަތީޖާ އަކުންނެވެ. އެމެޗަށްފަހު ވާހަކަދައްކަމުން އަގުއެރޯ ބުނީ ލީގުގެ އެއްވަނައިގަ އޮތް ލިވަރޕޫލާއި އެއްވަރު ކުރުމަކީ ވުމަށްވުރެ ނުވުން ގާތް ކަމެއް ކަމަށާއި، ސިޓީގެ ފޯކަސް ހުރީ ގަދަ ހަތަރެއްގަ އޮވެ ލީގު ނިންމައިލުމަށް ކަމަށެވެ.

ސިޓީގެ ކޯޗު ޕެޕް ގާޑިއޯލާ ބުނީ ލީގުގަ ދެން ލިވަރޕޫލް އަތުލައިގަނެ އެއްވަނައަށް އެރުމުގެ ވިސްނުމެއް ނުގެންގުޅޭ ކަމަށާއި ހުރިހާ ވެސް ވިސްނުމެއް މިހާރު ހުރީ ލީގުގެ ދެވަނައިގަ އޮވެ އެއް ޕޮއިންޓް އިތުރަށް ހޯދައިގެން އޮތް ލެސްޓަރ ސިޓީ އަތުލައިގަނެ، ލީގު ތާވަލުގެ ދެވަނައިގައި އޮވެ ސީޒަން ނިންމުމަށް ކަމަށް ގާޑިއޯލާ ބުންޏެވެ.

ގާޑިއޯލާ އިތުރަށް ބުނީ ސިޓީ މިހާރު އޮތް ފޯމުގަ އޮވެ ލީގު ތާވަލުގެ ދެވަނައަށް އެރުމުގެ ފުރުސަތު އެބައޮތް ކަމަށާއި، އޭނާގެ ކުޅުންތެރިންނަށް ފުރިހަމައަށް އިތުބާރުކުރާ ކަމަށެވެ.