ނިރުބަވެރި ޙަމަލާއެއްގެ މަޢުލޫމާތު ދެއްވުމުން އެމެރިކާގެ ރައީސް ޑޮނަލްޑް ޓްރަމްޕަށް ރަޝިޔާގެ ރައީސް ވްލެޑްމިއަރ ޕުޓިން ޝުކުރު އަދާކުރައްވައިފިއެވެ.
ޖާސޫސީ މަޢުލޫމާތުގެ އެހީގައި ޓެރަރިސްޓް ޙަމަލާއެއް ދޭން އުޅޭކަމުގެ މަޢުލޫމާތު ހިއްސާކުރެއްވުމާއި ގުޅިގެން އާދިއްތަ ދުވަހު ޕުޓިން ވަނީ ޓްރަމްޕަށް ފޯނުން ގުޅުއްވައި އެކަމަށް ޝުކުރު އަދާކުރައްވާފައެވެ. އެގޮތުން އެ ޙަމަލާއަކީ އައު އަހަރާއި ދިމާކޮށް ރަޝިއާގެ ސިޓީއެއްކަމަށްވާ ސެއިންޓް ޕީޓަރސްބާރގ އަށް ދޭން އުޅުނު ޙަމަލާއެއްކަމަށް މަޢުލޫމާތު ލިބިފައިވާކަމަށް ރަޝިއާގެ މީޑިއާތަކާއި ޙަވާލާދީ ބީބީސީގައި ރިޕޯރޓު ކޮށްފައިވެއެވެ.
ރަޝިއާގެ ޖާސޫސީ އިދާރާގެ ތަރުޖަމާނާއި ޙަވާލާދީ ބައިނަލްއަޤުވާމީ މީޑިއާތަކުން ރިޕޯރޓުކުރާގޮތުގައި، އެ މަޢުލޫމާތުތައް ލިބުމާ ގުޅިގެން ރަޝިއާއިން ވަނީ ދެ މީހަކު ހައްޔަރުކޮށްފައެވެ. ނަމަވެސް އެކަމާ ގުޅޭ އިތުރު ތަފުޞީލު ހާމަކޮށްފައެއް ނުވެއެވެ.
ޕުޓިންއާއި ޓްރަމްޕް ވަނީ މީގެ ކުރިންވެސް ފޯނުން ބައްދަލު ކުރައްވައި އެކި ކަންކަމާއި ގުޅޭގޮތުން މަޝްވަރާ ކުރައްވާފައެވެ. އެގޮތުން މަޝްވަރާކުރައްވާފައިވާ ބައެއް ކަންކަމުގެ ތެރޭގައި ނިއުކްލިއަރ އެއްބަސްވުންތަކާއި، ސީރިއާއާއި، އުތުރު ކޮރެއާގެ އިތުރުން ވިޔަފާރިއާއި ގުޅުންހުރި ކަންކަން ހިމެނެއެވެ.
2017 ވަނަ އަހަރުގެ ޑިސެންބަރު މަހުވެސް ޕުޓިން ވަނީ ނިރުބަވެރި ޙަމަލާއެއްގެ މަޢުލޫމާތު ހިއްސާކުރެއްވުމާއި ގުޅިގެން ޓްރަމްޕަށް ޝުކުރުއަދާ ކުރައްވާފައެވެ.
