ފުޓުބޯޅަ ސިޔާސީ ނުކުރުމަށް އިންފަންޓީނޯ ގޮވައިލައިފި

ފީފާއިން އިންތިޒާމުކުރާ މުބާރާތްތައް އެކި ގައުމުތަކުގައި ބާއްވާއިރު، އަމަލުކުރަމުންދާ އުސޫލުގެ ތެރެއަށް ސިޔާސީ ކަންކަން ވެއްދުމަކީ ރަނގަޅު ކަމެއް ނޫން ކަމަށް ފީފާގެ ރައީސް ޖިއާނީ އިންފަންޓީނޯ ވިދާޅުވެއްޖެއެވެ.

2022 ވަނަ އަހަރު ގަތަރުގައި ބާއްވަން ހަމަޖެހިފައިވާ ވާރލްޑްކަޕް ބާއްވަން އެގައުމުން ބިޑް ކާމިޔާބުކުރީ ކޮރަޕްޝަނުގެ ތެރެއިން ކަމަށާއި، ގަތަރުގައި ބޭއްވުމަށް ހަމަޖެހިފައިވާ ވޯލްޑްކަޕްގެ ސްޓޭޑިއަމްތައް އަޅަމުންދާ މަސައްކަތްތެރިންނަށް އިހާނެތިކޮށް ހަދަމުންގެންދާ ކަމުގެ އަޑުތަކާއި، ގަތަރަށް ވޯލްޑްކަޕް ފަދަ މުބާރާތެއް އެންމެ އެކަށީގެންވާ ގޮތަށް ނުގެންދެވޭނެ ކަމަށް ބުނެ ގިނަ ބަޔަކު ކިޔަމުން އަންނަ ފާޑު ކިޔުންތަކަށް ރައްދުދެއްވައި އިންފަންޓީނިއޯ ވިދާޅުވީ ނިމިދިޔަ ކްލަބް ވޯލްޑްކަޕްގެ އިންތިޒާމުތައް ވަރަށް ފުރިހަމަކަމަށެވެ. މިއީ ގަތަރަށް 2022 ވަނަ އަހަރު އޮންނަ ވޯލްޑްކަޕް ކާމިޔާބު ކަމާއެކު ކުރިޔަށް ގެންދެވޭނެ ކަމުގެ ނިޝާނެއް ކަމުގައި އިންފަންޓީނޯ ފާހަގަކުރެއްވިއެވެ.

މީގެއިތުރުން އިންފަންޓީނޯ ވިދާޅުވީ ދުނިޔޭގައި ވަރަށް ގިނަ ކަންކަން ހައްލުނުވެ އެބަހުރި ކަމަށެވެ. އަދި ފުޓުބޯޅައިގެ މައްސަލައިގަ ފާޑުކިޔާ ޤައުމުތަކުން ދޭދޭގުޅުމުގެ ތެެރެއިން ވިޔަފާރީގެ ގުޅުންފަދަ ގުޅުންތައް ބަދަހިކުރަމުން އައިނަމަވެސް، ފުޓުބޯޅަ މުބާރާތެއް ބާއްވަން އުޅޭ ދަނޑިވަޅުތަކުގަ މައްސަލަ ޖެހޭ ކަމަށެވެ. އެއްބަޔަކު އަނެއްބަޔަކަށް ފާޑު ކިޔުމަކީ ދުނިޔޭގެ އާދައެއްކަން ސިފަކުރައްވާ އިންފަންޓީނޯ ވިދާޅުވީ ދުނިޔެއަށް ހައްލު ނުކުރެވޭ ކަމެއް ފުޓުބޯޅައިން ހައްލު ކުރާނެ ގޮތެއް އޭނާއަށް ނުވިސްނޭ ކަމަށެވެ.