ކުރިއަށް އޮތް ލޯކަލް ކައުންސިލް އިންތިޚާބުގެ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ޕްރައިމަރީގައި ވާދަކުރުމުގެ ފުރުސަތު މިމަހުގެ 30ގައި ހުޅުވާލާނެ ކަމަށް އެޕާޓީން ބުނެފިއެވެ.

ބުރާސްފަތި ދުވަހު ލޯކަލް ކައުންސިލް އިންތިޚާބުގެ ޕްރައިމަރީގެ ޓައިމްލައިން އެމްޑީޕީން އާންމުކޮށްފައިވާއިރު، 30 ޑިސެންބަރު 2019 އިން 10 ޖެނުއަރީ 2020ގެ ނިޔަލަށް އިންތިޚާބުގެ ޕްރައިމަރީގައި ކުރިމަތިލުމުގެ ފުރުސަތު ވަނީ ހުޅުވާލާފައެވެ.

އެމްޑީޕީން ބުނީ 07 ޖެނުއަރީގައި ވޯޓްލެވޭ މީހުންގެ ލިސްޓް އާއްމުކުރާނެ ކަމަށާއި، ޝަކުވާ ހުށަހެޅުމަށް 03 ދުވަސް ލިބޭނެ ކަމަށެވެ. އަދި ކެންޑިޑޭޓުންގެ ލިސްޓު 13 ޖެނުއަރީވާ ހޯމަ ދުވަހު އާއްމުކުރާނެ ކަމަށެވެ.

އެމްޑީޕީން ބުނީ ފައިނަލް ވޯޓާސް ލިސްޓު އާއްމު ކުރާނީ 15 ޖެނުއަރީވާ ބުދަ ދުވަހު ކަމަށެވެ. އަދި ވޯޓުލުން ކުރިއަށް ގެންދާނީ 31 ޖެނުއަރީވާ ހުކުރު ދުވަހު ކަމަށެވެ.

އަންނަ އަހަރުގެ އެޕްރީލް މަހު ބާއްވާ ލޯކަލް ކައުންސިލް އިންތިޚާބަށް ކެމްޕޭން ކުރުމުގެ ހަރަކާތްތައް މިހާރު ވަނީ ފަށާފައެވެ. މި އިންތިޚާބަކީ މިފަހުން ރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ގާނޫނަށް ގެނައި އާ އިސްލާހުތަކަށް ފަހު ބާއްވާ ފުރަތަމަ އިންތިޚާބެވެ.

މި ގާނޫނަށް ގެނައި މައިގަނޑު އިސްލާހުތަކުގެ ތެރޭގައި ކައުންސިލްތަކުގެ ދައުރު ފަސް އަހަރަށް އިތުރުކުރުމާއި، ހުރިހާ ކައުންސިލްތަކަކުން 33 އިންސައްތަ އަންހެނުންނަށް ޚާއްސަ ކުރުމުގެ އިތުރުން، ކައުންސިލުތަކަށް އަމިއްލަ ނަމުގައި ވިޔަފާރިކުރުމުގެ ބާރުތައް ދިނުން ހިމެނެއެވެ.