ފަތުރުވެރިކަމުގެ ދާއިރާއަށް "ހޮސްޕިޓާލިޓީ" އިންޑަސްޓްރީއޭ ކިޔެނީ ކީއްވެގެންކަން އެނގޭ މީހަކު، އެ ސިނާޢަތުގައި މަސައްކަތްކުރާ ފަރާތްތަކުން އަދާކުރާ މުހިންމު ދައުރާމެދު ސުވާލެއް ނުއުފައްދާނެއެވެ. ކިތަންމެ މޮޅު ވަޞީލަތްތަކަކާއެކު، ކިތަންމެ ފެންވަރު ރަނގަޅަށް ހަދާފައި ހުރި ރިސޯޓެއް ވިޔަސް، އަދި ހޮޓަލެއްވިޔަސް، އެތަނުގައި ކަމުދާ ސަރވިސްއެއް ނުވަތަ ޚިދުމަތެއް ނުދެވޭނަމަ އެތަނަށް އަންނާނެ ބަޔަކު ނުވާނެތީއެވެ.
އެ މުވައްޒަފުންގެ މުހިންމު ކަމާމެދު ސުވާލު އުފެއްދޭނެ ޖާގައެއް ނެތެވެ. އިންތިހާއަށް މުހިންމެވެ. ދާއިރާ ދާއިރާއަކަށް ވަނީވެސް އެމީހުންގެ މިންނެތް މަސައްކަތުންނެވެ. އެމީހުންގެ އަދާކުރާ މެހެމާންދާރީއެއްގެ ސަބަބުންނެވެ. މިރާއްޖެއަށް ބަލާއިރު، މިސިނާޢަތުގަ މަސައްކަތްކުރާ ގިނަ ދިވެހިންނަކީ ޢާއިލާއާއި އަނބިދަރިން ދޫކޮށް ގިނަ ދުވަސްތަކެއް ވަންދެން ދުރު ރަށްތަކެއްގައި، ގިނަ ދުވަސްތަކެއް ހޭދަކުރާ ބަޔެކެވެ. އަމިއްލަ ވަޒަނުގައި ތިބެގެންވެސް، އެތަންތަނުގައި މަސައްކަތްކުރާ ބޭރު މީހުންނެކޭ ތަފާތެއް ނެތެވެ.
ހިތާމަޔަކީ މިއަދުވެސް، މިރާއްޖޭގައި އެސިނާޢަތުގެ އަގުވަޒަން ކުރާނެ ބަޔަކު ނެތުމެވެ. ކޮންމެ ސަރުކާރެއްވެސް ބަދަލުވާއިރު މި ރާއްޖެއަށް އެންމެ ޚިދުމަތްކުރާ، މިދާއިރާގެ މުވައްޒަފުންގެ ފޮނި އުއްމީދުތަކެއް ހުރެއެވެ. ނަމަވެސް، މިއިން ހުވަފެނެއްގައި ހަޤީޤީ ކުލަ ޖެހޭނެ ފަހަރެއްގެ އިންތިޒާރުގައި ވެރިކަން ނިމި ދަނީއެވެ. ދުވަހަކުވެސް ހަޤީޤަތަކަށްވާ މަންޒަރެއް ނުފެނެއެވެ. އެވެރިންގެ ދުލުން ބުނާނަމަ، އަސާސީ މުސާރަތަކާއި ސަރވިސް ޗާޖުތަކުގެ ހަމަހަމަކަމަށް އާދޭސް ކޮށްކޮށް ތިބޭހާއެވެ. ވާކަމެއް ހަމަ ޙަރާމެވެ.
އަދި މިހުރިހާ ކަމެއްގެ މައްޗަށް، މިކަންކަން ޙައްލު ކޮށްދޭން ތިބި ވެރިން އެކަންކަމަށް އިޖާބައެއް ނުދީ، ވިޔާފާރިވެރިންގެ މަޞްލަޙަތު އިސްކުރުމުން ދެން މާޔޫސްވުން ނޫން ކަމެއް ވާނެހެއްޔެވެ؟ އެންމެ ފުރަތަމަ ކަމެއް ގޯސްކޮށް ހިނގާކަން ޤަބޫލުކުރަން ޖެހެއެވެ. އެހެން ނޫނީ ކަމެއް ރަނގަޅެއް ނުވާނެއެވެ. އެކަން ދަންނާން އެބަ ޖެހެއެވެ. ސިޔާސަތު ކަނޑައަޅާ ވެރިން ގޮސް، ވިޔަފާރިވެރިންގެ ތައްޕާހުގައި ވެޑުވިގެން ތިއްބެވީމާ އެކަންކަން ދާނީ މުޅިން ގޯހުން ގޯހަށެވެ. ރަނގަޅުވާނެ ހަމަ އެއްވެސް ގޮތެއް ނެތެވެ.
މިއަދު މި ސިނާޢަތުގެ މަސައްކަތްތެރިންނާ ޙަވާލުވެވަޑައިގެން ހުންނެވި ވަޒީރަށްވެސް ދަންނަވަން އޮތީ ހަމަ މިވާހަކައެވެ. ވިޔަފާރިވެރިންގެ މަޞްލަޙަތަށް ނުވިސްނާ، މަސައްކަތްތެރިންނާ މެދު ވިސްނަވާށެވެ. އެއީ މާދަމާވެސް ގޮސްދާނެ ބަޔެއްކަން ދަނެގެން، މިސިނާޢަތަށް ދާ އޮހޮރުވާ މަސައްކަތްތެރިންނާ މެދު ވިސްނަވާށެވެ. އެވެރިންނަށް ހެޔޮގޮތް ހަދައިދީގެން މިޤައުމަކަށްވެސް، ސިނާޢަތަކަށްވެސް، އަދި ކިއެއްތަ ވިޔަފާރިވެރިއަކަށްވެސް ދެރައެއް ނުލިބޭނެއެވެ. ވިސްނަވާލައްވާށެވެ.
