މަހުޖަނުންގެ ކުރިމަތީގައި ނަޝީދު ދިފާއު ކުރެއްވީ ރިސޯޓު މުވައްޒަފުން!

ފަތުރުވެރިކަމުގެ ސިނާއަތުގެ ފަސް ވަނަ މާސްޓާ ޕްލޭންގެ މަސައްކަތް ހޯމަ ދުވަހުގެ ރޭ ދަރުބާރުގޭގައި ވަނީ އިފްތިތާހު ކޮށްފައެވެ. ރައީސް ސޯލިހު އިފްތިތާހު ކުރެއްވި އެ ހަފްލާގައި ނާއިބް ރައީސް ފައިސަލް ނަސީމާއި ޓޫރިޒަމް މިނިސްޓަރު އަލީ ވަހީދު އަދި ފަތުރުވެރިކަމުގެ ދާއިރާގައި ހަރާކަތްތެރިވާ އިސްބޭފުޅުންގެ އިތުރުން ރިސޯޓުތަކުގެ ވެރިން ވެސް ބައިވެެރިވެ ވަޑައިގެންނެވިއެވެ. އޭގެ ތެރޭގައި ރާއްޖޭގެ މަޝްހޫރު ވިޔަފާރިވެރިންނާއި މަހުޖަނުން ވެސް ހިމެނެއެވެ.

އެހާ މުހިއްމު ހަފްލާއެއްގައި ޖޯޝުން ފުރިގެންވާ ތަގުރީރެއް ދެއްވީ ރައްޔިތުންގެ މަޖިލީހުގެ ރައީސް އަދި ރައީސް މުހައްމަދު ނަޝީދެވެ. ކެމްޕެއިންތަކުގައި ރަށްތަކަށް ވަޑައިގެން، ވާހަކަފުޅު ދައްކަވާ ޖޯޝުގައި ނަޝީދު ވާހަކަފުޅު ދެއްކެވިއެވެ.

އެމަނިކުފާނުގެ ވާހަަަކަފުޅު ފެއްޓެވި، ކުޑައިރު ކިޔަވާ ފޮތްތަކުގެ ވާހަކައިންނެވެ. ހިޔާލީ ވާހަކަތަކެއް ސިފަވާ ގޮތަށް ވާހަކަތަކެއް ނަޝީދު ގެންނެވިއެވެ. އެގޮތުން މާމިގިލީ އައްޔަ ކިޔާ މީހަކާއި މަގުދޫ ފަހުރިއްޔާ ކިޔާ މީހެއްގެ ވާހަކަ އެމަނިކުފާނު ގެންނެވިއެވެ. ފަތުރުވެރިކަން ފުޅާވީ ރިސޯޓުތަކުން ނޫން ކަމަށާއި ފަތުރުވެރިން ފެތުރިގެން ދިޔައީ ރަށްތަކުގެ ހޭޅިފަށުން ކަމަށް އެމަނިކުފާނު ތަކުރާރުކޮށް ވިދާޅުވިއެވެ. އެގޮތުން ފަތުރުވެރިންގެ މެދުގައި "މޯލްޑިވްސް" މަގުބޫލު މަންޒިލަކަށް ހެދީ އައްޔަ އާއި ފަހުރީ ކަމަށް ނަޝީދު ވިދާޅުވިއެވެ.

ދަރުބާރުގޭ ރަންނަބަނޑޭރި މާލަމުގެ އޯޑިއަންސްގައި ތިއްބެވި ރިސޯޓުތަކުގެ އޯނަރުންނަށް އިޝާރާތް ކުރައްވާ ނަޝީދު ވިދާޅުވީ، އެ ބޭފުޅުންނަކީ އައްޔަ އާއި ފަހުރީއާ އެއްކޮށް ''މޯލްޑިވްސް'' ހެދުމުގައި އަތުކުރި އޮޅާލައިގެން ރެއާ ދުވާލު ފަޅު ރަށްރަށުގައި ''ބަނޑަހަ'' ޖަހައިގެން މަސައްކަތް ކުރި މީހުން ކަމަށެވެ. ''މި ފަތުރުވެރިކަމަކީ ފަޅު ރަށުގެ ނިކަމެތި ދިރިއުޅުން'' ކަމަށް ސިފަކުރައްވަމުން ވިދާޅުވީ، އެއީ އެކަނިވެރި ދިރިއުޅުން ކަމަށެވެ. ފަތުރުވެރިކަމުގެ މުޅި ސިނާއަތު ބިނާވެފައި އޮތީ ފަޅު ރަށެއްގައި އެކަނި ދިރިއުޅުމުގެ މައްޗަށް ކަމަށެވެ.

ރާއްޖޭގެ ރިސޯޓުތައް ހިންގާ ވިޔަފާރިވެރިން ވެސް ބައިވެރވިވެ ވަޑައިގެންނެވި އެ ހަފްލާގައި ނަޝީދު ވިދާޅުވީ، އެ ހުރިހާ ވަގުތަކާއި ބުރަތަކެއް އުފުލައި ރިސޯޓްތަކުގައި ވަޒީފާ އަދާކުރަމުންދާ ދިވެހިން ދަނީ މި ސިނާޔަތް ކުރިއެރުމަށް މަސައްކަތް ކުރަމުން ކަމަށެވެ. ރާއްޖެއަށް ލިބޭހާ ފައިދާއެއް ލިބެނީ އެ ސިނާއަތުންނެވެ. އިޖްތިމާއި ރައްކާތެރިކަން ފޯރުކޮށް ދެނީވެސް ޓުއަރިޒަމް އިންނެވެ. ފަތުރުވެރިކަމުން ލިބޭ ފައިދާ ހަމަހަމަ ގޮތުގައި އައްޔަ އާއި ފަހުރިއްޔާގެ ދަރިންނަށް ލިބެން ޖެހެއެވެ. އެކަމަކު މިހާރު ކަންތައްވަމުން ދަނީ އެހެނެއް ނޫނެވެ. އެ ދެމީހުންގެ ދަރިން ވެސް ހަމަ އެގޮތަށް ''ފަޅު ރަށުގެ'' ދިރިއުޅުމަށް ވަރިހަމަކޮށްގެން ތިބެން ވަނީ މަޖުބޫރު ވެފައެވެ.

ނުސީދާކޮށް އެއްވެސް މީހެއްގެ ނަން ނުގެންނަވައި، ބަހުގެ ހަމަލާތައް މަހުޖަނުންނަށް ރައްދު ކުރައްވައި ނަޝީދު ވިދާޅުވީ ''ސައުދާގަރުން'' މުވައްޒަފުންނާ މެދު ކަންތައް ކުރާ ގޮތް ސާފުކޮށް އެނގޭ ކަމަށެވެ. އަދި ވިދާޅުވީ ދިވެހި މުވައްޒަފުންނާ ދޭތެރެ ވެރިން އިހާނެތިކޮށް، ކަންތައް ކުރާ ކަމަށެވެ. ސަރވިސް ޗާޖު ހަމަޔަށް ނުލިބޭ ތަނުގައި އަނބިދަރިން ކައިރިއަށް އަހަރަކު ހާލަކުން ފަހަރަކު ނޫނީ ނުދެވޭ ކަމަށް ވެސް ވިދާޅުވިއެވެ.

އެމަނިކުފާނު ވިދާޅުވީ ރިސޯޓު މުވައްޒަފުންގެ ހައްގުތަކެއްވާ ކަމަށާއި އެ ހައްގުތައް ކަށަވަރު ކޮށްދޭނެ ބަޔަކު ނެތް ކަމަށެވެ.

ނަޝީދު އާންމު ކުރެއްވި ތަފާސް ހިސާބުތަކުން އެނގޭ ގޮތުގައި ރިސޯޓުތަކުގައި 12،000 ދިވެހި މުވައްޒަފުން މަސައްކަތް ކުރެއެވެ. ރައްޔިތުންގެ މަޖިލީހުގެ ކެމްޕެއިންގައި ރައީސް ނަަޝީދު ރިސޯޓު މުވައްޒަފުންނަށް ވައުދުވެވަޑައިގެންނެވީ ވަޒީފާ އަދާ ކުރުމަށް ފަހު، އަނބިދަރިން ކައިރިއަށް ދެވޭނެ ގޮތް ހައްދަވައި ދެއްވާނެ ކަމަށެވެ. ޓުއަރިޒަމް ދާއިރާގައި މަސައްކަތް ކުރާ މުވައްޒަފުންގެ ހައްގުތައް ހޯދައި ދިނުމަށް ހާއްސަ ސަމާލުކަމެއްދީ، އެމީހުންނަށް ލިބެންޖެހޭ ސާރވިސް ޗާރޖް ފަދަ އިނާޔަތްތައް ގަވާއިދުން ލިބުމަކީ އެޖެންޑާ 19 ގައި ކަށަވަރު ކޮށްދީފައިވާ ކަމަކެވެ.