ސުނާމީ ކާރިޘާއާއި ގުޅިގެން ނަގާފައިވާ 592 ލޯނެއް ވަނީ މާފު ކުރެވިފައި: ރައީސް
26 ޑިސެމްބަރު 2019 | ބުރާސްފަތި 11:32އެކި ވަރުގެ ގެއްލުން ލިބުނު 190 ރަށެއް ވޭ
ރައިސުލްޖުމްހޫރިއްޔާ އިބްރާހިމް މުހައްމަދު ސޯލިހު
ސުނާމީ ކާރިޘާއާއި ގުޅިގެން ނަގާފައިވާ 592 ލޯނެއް ވަނީ މާފު ކުރެވިފައިވާ ކަމަށް ރައިސުލްޖުމްހޫރިއްޔާ އިބްރާހިމް މުޙައްމަދު ޞާލިޙު ވިދާޅުވެއްޖެއެވެ.
ރައީސް ޞާލިޙު މިހެން ވިދާޅުވީ އެއްބައިވަންތަކަމުގެ ދުވަހާ ގުޅިގެން ތ. ވިލުފުށީގައި ބޭއްވި ޚާއްޞަ ޖަލްސާގައި ވާހަކަ ދައްކަވަމުންނެވެ.
ރައީސް ވިދާޅުވީ ސުނާމީ ކާރިޘާގައި އެކި ވަރުގެ ގެއްލުން ލިބުނު 190 ރަށުގެ ރައްޔިތުންގެ ދިރުއުޅުމުގެ ޙާލަތު އިޔާދަ ކުރުމަށް މިދިޔަ 15 އަހަރުގެ ތެރޭގައި އެކި ސަރުކާރުތަކުން މަސައްކަތް ކުރިކަމަށެވެ. އަދި އެކަން ކުރުމަށް ކުރިމަތިވި އެންމެ ބޮޑު ގޮންޖެހުމަކަށްވީ ދިރިނޫޅެވޭ ވަރަށް ހަލާކުވި 5 ރަށުގެ ރައްޔިތުން އެހެން ރަށްރަށުގައި ވަޒަންވެރި ކުރުވުމާއި އާބާދުކުރުވުން ކަމަށެވެ.
މީގެއިތުރުން އެމަނިކުފާނު ވެރިކަމާއި ޙަވާލުވެވަޑައިގެންނެވި އިރުވެސް މި ފަދަ ރަށްރަށުގެ ޝަކުވާތައް ހުރި ކަން ފާހަގަކުރެއްވިއެވެ. އޭގެތެރެއިން ބައެއް ކަންކަމަކީ ބައެއް މީހުން ނަގާފައި ހުރި ލޯނުތައް ނުދެއްކި ދަރަނިވެރިވުން ކަމަށެވެ.
އެއްބައިވަންތަކަމުގެ ދުވަހާއި ގުޅިގެން ވާހަކަ ދައްކަވަމުން ރައީސް ވިދާޅުވީ އެ ޤުދުރަަތީ ޙާދިސާގައި އެތައް ބައެއްގެ މުޅި ޙަޔާތް ޤުރުބާންކޮށްގެން އާރާސްތު ކުރި ދިރިއުޅުމާއި ގެދޮރު ސުންނާފަތިވެގެން ދިޔަކަމަށެވެ. އަދި ގާތްތިމާގެ މީހުންނާއި ރައްޓެހިން ގެއްލި، ޢާއިލާތައް މާލީ ގޮތުން އިނދަ ޖެހުނު ކަމަށެވެ. މި ޙާދިސާގަ ދިރިނޫޅެވޭ ވަރަށް ބައެއް ރަށްރަށް ހަލާކުވިއިރު ރައީސް ޞާލިޙު ވިދާޅުވީ އެ ކާރިޘާގައި ދިވެހި ރައްޔިތުން ދައްކައި ދިނީ އޯގާތެރިކަން ކަމަށެވެ. އަދި އެ ދުވަހު ކުރިމަތިވި ޙާލަތުން އަރައިގަތުމަށް ލިބުނު އެންމެ ބޮޑު ބާރަކީ ވެސް އެއީ ކަމަށެވެ.
26 ޑިސެމްބަރު 2004 ވަނަ އަހަރު ރާއްޖެއަށް ސުނާމީ އެރި ކާރިޘާގަ ދިވެހިންގެ ތެރެއިން 82 މީހުންގެ ފުރާނަ ގެއްލި، 26 މީހަކު ވީނުވީއެއް ނޭނގި ގެއްލިފައިވެއެވެ.
