ސިފައިން ހިންގަންޖެހޭ ސަލާމަތީ އެއްވެސް ކަމެއް އިތުރު ބަޔަކަށް އަންގާކަށް ނުޖެހޭނެ: ރީކޯ މޫސަ

ޤައުމުގެ ސަލާމަތީ ކަންކަން ކުރުމުގައި ސިފައިން ހިންގަންޖެހޭ އެއްވެސް ކަމަކީ، އެކަމުގެ މަޢުލޫމާތު އިތުރު އެއްވެސް ބަޔަކަށް ދޭން ޖެހޭ ކަމެއް ނޫން ކަމަށް ރައްޔިތުންގެ މަޖިލީހުގެ ކުރީގެ ނައިބު ރައީސް މޫސާ މަނިކު (ރީކޯ މޫސަ) ވިދާޅުވެއްޖެ އެވެ.

ބުދަ ދުވަހު މޫސަ ކުރެއްވި ޓްވީޓެއްގައި ވިދާޅުވެފައިވަނީ، ޤާނޫނުއަސާސީގެ 241 ވަނަ މާއްދާގައި ވާގޮތުން، ސިފައިން ހިންގަންޖެހޭ ސަލާމަތީ އެއްވެސް ކަމަކީ އިތުރު ބަޔަކަށް މަޢުލޫމާތުދީ، ހުއްދަ ހޯދަންޖެހޭ ކަމެއް ނޫން ކަމަށެވެ. އަދި ކުއްލި ނުރައްކަލުގެ ޙާލަތު އިޢުލާން ކުރުމަށްފަހު، ރައްޔިތުންގެ މަޖިލީހުގެ ރުހުން ހޯދީމަ ނިމުނީ ކަމަށެވެ.

Advertisement

މިދިޔަ ރިޔާސީ އިންތިޚާބަށްފަހު، އިދިކޮޅު ޕީޕީއެމުން ވަކިވެވަޑައިގަންނަވާފައިވާ، މޫސަ މިހެން ވިދާޅުވެފައިވާއިރު، އިދިކޮޅު ޕީޕީއެމާއި ޕީއެންސީ ކޯލިޝަނުން ބުނެފައިވަނީ، އެމްއެންޑީއެފުން މިހާރު އިޢުލާން ކޮށްފައިވާ އެލަރޓް ސްޓޭޓަސް "ޔެލޯ 2" މުޅި ރާއްޖެއަށް އިޢުލާން ކުރި ސަބަބު ހާމަ ކުރުމަށް ގޮވާލާފައި ވަނިކޮށެވެ.

އަންގާރަ ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އިދިކޮޅު ކޯލިޝަނުގައި ހިމެނޭ ޕީއެންސީގެ ރައީސް ޢަބްދުއްރަހީމް ޢަބްދުﷲ (އަދުރޭ) ވިދާޅުވެފައިވަނީ، ވެގެންއުޅޭ ގޮތެއް ނޭނގި ކުއްލިއަކަށް ހަތިޔާރާއެކީގައި ރާއްޖޭގެ އެކި ކަންކޮޅުތަކުގައި ސިފައިން ޙަރަކާތްތެރިވަމުންދާތީ ކަންބޮޑުވާކަމަށެވެ. އަދި މިފަދަ އޮޕަރޭޝަނެއް ހިންގާއިރު ރައްޔިތުންނަށް އެ އޮޕަރޭޝަންއަކީ ކޮން މަޤުޞަދެއްގައި ކުރިއަށްގެންދާ އޮޕަރޭޝަނެއްކަން ވަރަށް ސާފުކޮށް އޮޅުންފިލުވާދޭން ޖެހޭ ކަމަށް އޭނާ ވިދާޅުވި އެވެ.

މީގެއިތުރުން ކުރީގެ ޑިފެންސް މިނިސްޓަރު އަދި ޕީއެންސީ ޕާލަމެންޓްރީ ގްރޫޕުގެ މެމްބަރު އާދަމް ޝަރީފް އުމަރު ކުރެއްވި ޓްވީޓެއްގައި ވިދާޅުވެފައިވަނީ، ޤައުމީ ސަލާމަތާއި ގުޅޭ ކަންކަން ސަމާސާއަކަށް ވެގެން ނުވާނެ ކަމަށެވެ. އަދި ޤައުމީ ސަލާމަތަށް ނުރައްކާ ވެއްޖެނަމަ އަޅަން ޖެހޭ ފިޔަވަޅެއް އެޅުމަކީ ކަމާއި ގުޅުން ހުރި މުއައްސަސާ ތަކުގެ ޒިންމާއެއް ކަމަށެވެ.

ޤައުމީ ސަލާމަތާއި ފަރުދުންގެ ރައްކާތެރި ކަމަކީ ސީރިއަސް ކަންކަން ކަމަށާއި، މިރިނުވެ ގޮބޮޅި ކާށިވާ ގޮތަށް ޤައުމީ ސަލާމަތާއި ގުޅޭ ކަންކަން ސަމާސާއަކަށް ވެގެން ނުވާނެ ކަމަށް އާދަމް ޝަރީފުގެ ޓްވީޓްގައި ވެއެވެ.

އިދިކޮޅު ކޯލިޝަނުންނާއި އަދި ކުރީ ރައީސް އަބްދުﷲ ޔާމީންގެ ސަރުކާރުން ރާއްޖޭގައި، ދެ ފަހަރެއްގެ މަތިން ކުއްލި ނުރައްކަލުގެ ހާލަތު އިއުލާންކޮށް، އިދިކޮޅު ހުރިހާ ސިޔާސީ ލީޑަރުން ޖަލަށްލާފައިވާއިރު، މުޅި ގައުމު އޮތީ ސަރުކާރުން އަމިއްލައަށް ކުރި ކަންތައްތަކެއްގެ ތެރެއިން ބޮއްސުންލާފަ އެވެ.

އެގޮތުން ފުރަތަމަ ކުއްލި ނުރައްކަލުގެ ޙާލަތު އިއުލާން ކުރީ ރައީސް ޔާމީން، ނައިބު ރައީސްކަމުގެ މަޤާމަށް ޢައްޔަން ކުރެއްވި އަޙްމަދު އަދީބުގެ ހައްޔަރު ކުރުމަށްފަހު، އަދި މިހާތަނަށް ސަރުކާރަކުން ހިންގާފައިވާ އެންމެބޮޑު ޚިޔާނާތް ކަމަށްވާ އެމްއެމްޕީއާރުސީގެ ޚިޔާނާތާވެސް ފަޅާއެރުމާއި ގުޅިގެން ޤައުމު ހަލަބޮލި ވުމާއި ގުޅިގެންނެވެ.

ދެ ވަނަ ފަހަރަށް ކުއްލި ނުރައްކަލުގެ ޙާލަތު އިޢުލާން ކުރީ، 2018 އެކެއް ފެބްރުއަރީގައި ސުޕްރީމް ކޯޓުން ނެރުނު ޢަމުރު ތަންފީޒު ކުރަން ސަރުކާރުން ބޭނުން ނުވުމުން، އުއްތަމަ ފަނޑިޔާރާއި، ސުޕްރީމް ކޯޓުގެ ފަނޑިޔާރަކު ހައްޔަރުކޮށް، ކުރީގެ ރައީސް މައުމޫން ޢަބްދުލްގައްޔޫމް ހައްޔަރު ކުރުމަށާއި، އެކަމާއި ގުޅިގެން ޤައުމު ހަލަބޮލި ވުމާއި ގުޅިގެންނެވެ.

ސުޕްރީމް ކޯޓުގެ ޢަމުރު "ބޮލާލާ ޖެހުމަށްފަހު"، ސުޕްރީމް ކޯޓަށް ސަލާމަތީ ޚިދުމަތްތަކުން ވަދެ، އުއްތަމަ ފަނޑިޔާރާއި ސުޕްރީމް ކޯޓުގެ ފަނޑިޔާރަކު ހައްޔަރުކުރިއިރު، ޑިފެންސް މިނިސްޓަރަކަށް ހުންނެވީ، އާދަމް ޝަރީފް އުމަރެވެ.