ފާހާނައަށް ވެއްޓުމާއި ގުޅިގެން ބްރެޒިލް ރައީސްގެ ހަނދުމަފުޅު ނެތިއްޖެ

ފާޚާނާއަށް ވެއްޓުމާއި ގުޅިގެން ބްރެޒިލްގެ ރައީސް، ޖައީރް ބޮލްސޮނާރޯގެ ހަނދުމަފުޅު ވަގުތީ ގޮތުން ނެތުނު ކަމަށް ވިދާޅުވެއްޖެއެވެ.

64 އަހަރުގެ ޖާއިރް ވެއްޓިވަޑައިގަތީ އެމަނިކުފާނު ދިރިއުޅުއްވާ އަލްވޮރާޑާ ޕެލެސްގައި އުޅުއްވަނިކޮށެވެ.

އެ ޤައުމުގެ ބޭންޑު ޓެލެވިޜަންއަށް ދެއްވި އިންޓަވިއުގައި ޖައީރް ވިދާޅުވީ ވެއްޓުނު ވަގުތު ވަގުތީގޮތުން ހަނދާން ދިޔަ ކަމަށާއި ނަމަވެސް އޭގެ އަނެއް ދުވަހު މަޑުމަޑުން ހަނދާން އަނބުރާ އަންނަން ފެށި ކަމަށެވެ.

ޖައީރަށް އަނިޔާވި ރޭ ހޭދަކުރެއްވީ އެޤައުމުގެ ދިފާޢީ ބާރުން ހިންގަމުންދާ ހޮސްޕިޓަލުގައެވެ. އަދި ކްރޭނިއަލް ސީޓީ ސްކޭނެއްވެސް ހެއްދުނު ކަމަށާއި އެ ޓެސްޓުން އެއްވެސް މައްސަލައެއް އުޅޭ ކަމަށް ފާހަގަކުރެވިފައިނުވާ ކަމަށް ބޭރުގެ މީޑިއާތަކުގައި ރިޕޯޓުކޮށްފައިވެއެވެ.

2018 ވަނަ އަހަރުގެ ރިޔާސީ އިންތިޚާބުގެ ކެންޕެއިނާއި ދިމާކޮށް، ވަޅީގެ ޙަމަލާއެއްގެ ޝިކާރަކަށް ޖައީރް ވެވަޑައިތެވެ. އަދި ވެރިކަމާއި ހަވާލުވެވަޑައިގަތް ފަހުން އެމަނިކުފާނުގެ ސަލާމަތާއި މެދު ގިނަ ބަޔަކު ދަނީ ކަންބޮޑުވުން ފާޅުކުރަމުންނެވެ. ވަޅީގެ ޙަމާލާގައި ލިބިވަޑައިގަތް ޒަޚަމްތަކާއި ގުޅިގެން 4 ސަރޖަރީއެއް ކޮށްފައިވެއެވެ. އަދި މި ޑިސެންބަރު މަހުގެ ކުރީ ކޮޅު ހަމުގެ ކެންސަރަށް ސްކީނިންގް ވެސް ހައްދަވާފައިވާކަމަށް މީޑިއާ ތަކުގައި ރިޕޯޓުކޮށްފައިވެއެވެ.