އިންކަމް ޓެކްސްއަށް ޤާސިމް: "ހިތި ބޭސް ގުޅަވެސް ކާލަންޖެހޭ ފަހަރު އަންނާނެ"
އިންކަމް ޓެކްސްއަށް ރައްޔިތުން ސަމާލުވެތިބުމަށް އެދިވަޑައިގެންނެވި
ޖުމްހޫރީ ޕާޓީގެ ލީޑަރ ޤާސިމް އިބްރާހިމް
އަންނަ އަހަރުން ފެށިގެން އާމްދަނީން ޓެކްސް ނަގަން ފަށާއިރު، އެއީ ހިތި ބޭސްގުޅައެއް ކާލަންޖެހުންފަދަކަމެއްގެ ގޮތުގައި ޖުމްހޫރީ ޕާޓީގެ ލީޑަރު ޤާސިމް އިބްރާހިމް ސިފަކުރައްވައިފި އެވެ.
ޖުމްހޫރީ ޕާޓީއަށް އަލަށް ގުޅިވަޑައިގެންނެވި މެމްބަރުންގެ ފޯމްތައް ހަވާލުކުރުމަށް އަންގާރަ ދުވަހުގެރޭ މ. ކުނޫޒުގައި ބޭއްވި ރަސްމިއްޔާތެއްގައި އިންކަމް ޓެކްސްއާއި ގުޅޭގޮތުން ވާހަކަދައްކަވަމުން ޤާސިމް ވިދާޅުވީ، އަންނަ ޖެނުއަރީ މަހު އިންކަމްޓެކްސް ނަގަން ފަށާނެ ކަމަށާއި، އެކަމަށް ރައްޔިތުން ސަމާލުވެތިބުމަށް އެދިވަޑައިގަންނަވާ ކަމަށެވެ. އެގޮތުން ހިތި ބޭސްގުޅަވެސް ބައެއް ފަހަރު ކާން ޖެހިދާނެ ކަމަށާއި، ހިތާ ދެކޮޅަށްވެސް ކުރަންޖެހޭ ބައެއް ކަންކަން ހުންނަކަން ޤާސިމް ފާހަގަކުރެއްވިއެވެ.
އޭގެ އިތުރުން، އާމްދަނީން ޓެކްސް ނެގި ނަމަވެސް އޭގެ އެންމެ އެދެވޭ ލާބައާއި މަންފާ ރައްޔިތުންނަށް ފޯރުކޮށްދޭން ޖެހޭނެ ކަމަށާއި، ޓެކްސްގެ ފައިސާއަށް ހިޔާނަތްތެރި ނުވެ އޭގެ ވެރި ފަރާތްތަކަށް ލިއްބައިދެވިއްޖެނަމަ "ހިތިބޭސްގުޅަ" ކައިގެންވެސް މަންފާ ލިބިގަނެވޭނެ ކަމަށް ޤާސިމް ވިދާޅުވިއެވެ.
ޤާސިމް އިތުރަށް ވިދާޅުވީ، ސަރުކާރުން ޓެކްސް ނަގަނީވެސް ރައްޔިތުންގެ ލާބައާއި މަންފާއަށްޓަކައި ކަމަށާއި، ޓެކްސްގެ މަންފާ އެންމެ ފައިދާހުރި ގޮތެއްގައި ރައްޔިތުންނަށް ފޯރުކޮށްދެއްވާނެ ކަމަށް އުއްމީދު ކުރައްވާ ކަމަށެވެ. އަދި އެކަމުގައި ކޮރަޕްޝަން ނުހިމެނޭނެ ކަމަށް ޔަޤީން ކުރައްވާ ކަަމަށްވެސް ޤާސިމް ވިދާޅުވިއެވެ.
އިންކަމްޓެކްސް ޤާނޫނުގެ ދަށުން ޓެކްސް ނަގަން ފެށުމަށް ހަމަޖެހިފައިވާއިރު، އާމްދަނީން ޓެކްސް ނެގުމުގެ ބިލު ފާސްކުރުމަށް ނުފެންނަ ކަމަށް ވޯޓު ދެއްވި މެމްބަރުންގެ ތެރޭގައި ޖުމްހޫރީ ޕާޓީގެ ލީޑަރ އަދި މާމިގިލި ދާއިރާގެ މެމްބަރ ގާސިމް އިބްރާހިމްވެސް ހިމެނިވަޑައިގަންނަވައެވެ.
އާމްދަނީން ޓެކްސް ނެގުމުގެ ބިލު މަޖިލީހުން ފާސްކޮށްފައިވަނީ އަންނަ އަހަރުގެ އޭޕްރީލް މަހުން ފެށިގެން މުސާރައިގެ ގޮތުގައި ލިބޭ އާމްދަނީން ޓެކްސް ނަގާގޮތަށެވެ. އެގޮތުން އާމްދަނީގެ ގޮތުގައި މަހަކު 60،000 ރުފިޔާއަށް ވުރެ މަތިން ލިބޭ ފަރާތްތަކުން ޓެކްސް ނެގިގެންދާނެ އެވެ. ދެން ހުރި ޓެކްސްތައް އަންނަ ޖެނުއަރީ މަހުން ފެށިގެން ނެގުމަށް ވަނީ ފާސްކޮށްފަ އެވެ.
