ބެންކޮކްގަ ދިވެހިންތަކެއް ދަތުރުކުރި ކާރެއް އެކްސިޑެންޓްވެ، އެކަކު އައިސީޔޫގައި
24 ޑިސެމްބަރު 2019 | އަންގާރަ 02:20ހާދިސާ ހިނގީ ބެންކޮކް ގަޑިން 3:30 ގައި
އެކްސިޑެންޓް ހިނގިއިރު ކާރުތެރޭގައި ތިން މީހުން ތިބި
ތައިލޭންޑްގެ ބެންކޮކްގައި ދިވެހިން ދަތުރުކުރަމުން ދިޔަ ކާރެއް އެކްސިޑެންޓްވެ ތިން މީހަކަށް އަނިޔާވެ އެކަކު އައިސީޔޫ ގައި އެޑްމިޓްކޮށްފިއެވެ.
ރާއްޖެ.އެމްވީ އަށް މައުލޫމާތުދެމުން، އެ މީހުންނަށް އިންތިޒާރު ކޮށްގެން ހޮޓަލުގައި ހުރި އެމީހުންގެ އެކުވެރިއެއް ކަމަށްވާ މުހައްމަދު ސައީދު ބުނީ އެކްސިޑެންޓް ހިނގާފައިވަނީ އެއަރޕޯޓުން ހޮޓަލަށް ދަނިކޮށް އޭނާގެ ރަށްޓެހިން ތިބި ކާރު ފުރޮޅާލައިގެން ކަމަށެވެ.
އޭނާ ބުނީ، އެ އެކްސިޑެންޓް ހިނގަން މެދުވެރިވީ ޑްރައިވަރު ނިދި ޖެހިގެން ގޮސް ކާރު ކޮންކްރީޓް ބޮލްކަކަށް އެރުމުން ކަމަށް ލަފާކުރެވޭ ކަމަށެވެ. ހާދިސާ ހިނގާފައިވަނީ ބެންކޮކް ގަޑިން 3:30 ހާއިރުއެވެ. ބެންކޮކް ފުލުހުން ވަނީ ކާރު ދުއްވަން އިން ޑްރައިވަރު ހައްޔަރު ކޮށްފައެވެ. ހާދިސާ ގައި އަނިޔާވި ތިން މީހުންނަކީ، ސ. ހުޅުދޫ އަހްމަދު ސައީދުއާ މުހައްމަދު ސަބާހުގެ އިތުރުން ކ. މާލެ އަހުމަދު ރަޝީދުއެވެ. މި ތިން މީހުންގެ ތެރެއިން އައިސީޔޫގައި އެޑްމިޓް ކޮށްފައިވަނީ އަހުމަދު ސައީދު އެވެ.
މުހައްމަދު ބުނީ، އަހުމަދު ސައީދުގެ ހާލު ސީރިއަސްވެ ޑޮކްޓަރުން އުއްމީދު ކަނޑާލާފައިވާ ކަމަށެެވެ.
އަހުމަދު ރަޝީދުގެ އާއިލާއަށް ގުޅުމަށް މަސައްކަތް ކުރާ ކަމަށް މުހައްމަދު ބުންޏެވެ.
މުހައްމަދު ބުނީ، އަނިޔާވި މީހުންގެ ތެރެއިން މުހައްމަދު ސަބާހުގެ އަތުގެ ތަންތަން ކަނޑައިގެން ގޮސް މޭމައްޗަށް ކޮންމެވެސް ވަރަކަށް ހާނިކަވެފައިވާ އަދި އަހްމަަދު ރަޝީދަށްވެސް އަނިޔާތަކެއްވީ ކަމަށް އޭނާ ބުންޏެވެ.
