"ސަރްކާރް 3" އިން އެތައް ކަމެއް ދަސްވެއްޖެ: އަމިތު ސާދު

ހޮލީވޫޑް ފްރެންޗައިޒްއެއް ކަމަށް "ގޯޑްފާދަރ" ސްޓައިލަށް ބޮލީވުޑްގައި އުފައްދަމުން އަންނަ "ސަރްކާރް"ގެ ތިން ވަނަ ބައި އޭޕްރީލް މަހު ރިލީޒްކުރާ އިރު އެ ފިލްމުން އެތައް ކަމެއް ދަސްވެއްޖެ ކަމަށް އެ ފިލްމުގެ މުހިންމު އެއް ރޯލުން ފެނިގެންދާ ޒުވާން ތަރި އަމިތު ސާދު ބުނެފިއެވެ.

އަމީތާބް ބައްޗަންގެ ކާފަ ދަރިއެއްގެ ރޯލުން އަމިތު ފެނިގެންދާ މި ފިލްމް ރިލީޒްކުރުމަށް ހަމަޖައްސާފައި ވަނީ އޭޕްރީލް 7 ގައެވެ.

ރާމް ގޯޕާލް ވަރްމާގެ މި ފިލްމާ ބެހޭ ގޮތުން އަމިތު ބުނީ އަމީތާބާ އެކު މަސައްކަތްކުރުމުގެ ފުރުސަތު ލިބުމަކީ އޭނާ އަށް ލިބުނު ވަރަށް ބޮޑު ފަހްރެއް ކަމަށެވެ. އަމީތާބުގެ މަސައްކަތުގެ އަހްލާގާއި ފިލްމަށް ތައްޔާރުވުމަށް ކުރާ މަސައްކަތާ ބެހޭ ގޮތުން ކުރިން ވެސް އަޑު އިވިފައިވާ ކަމަށާއި ނަމަވެސް އެކަން ކައިރިން ފެނިގެން ދިއުމަކީ ލިބިގެންދިޔަ ފިލާވަޅުތަކެއް ކަމަށެވެ. އަދި އާނާގެ ރޯލަށް ތައްޔާރުވުމުގެ ގޮތުން އަމީތާބުގެ އެހީތެރިކަން ވަރަށް ބޮޑަށް ލިބިގެންދިޔަ ކަމަށާއި ޑައިރެކްޓަރު އާރްޖީވީގެ އެހީތެރިކަން ވެސް ވަރަށް ބޮޑަށް ލިބުނު ކަމަށެވެ.

މީގެ ކުރިން އަމިތު ވަނީ "ކައި ޕޯ ޗޭ" ގައި ވެސް މުހިންމު ރޯލަކުން ފެނިގެން ގޮސްފައެވެ. އެ ފިލްމްގައި އޭނާ ދެއްކި އެކްޓިން އަށް ގިނަ ބަޔަކު ތައުރީފްކޮށްފައި ވެއެވެ.

"ސަރްކާރް"ގެ ފުރަތަމަ ބައި އަދި ދެ ވަނަ ބައިން އަމީތާބުގެ އިތުރުން ދެން ފެނިގެން ދިޔައީ ދަރިފުޅު އަބީޝެކް ބައްޗަންއެވެ. އެހެން ކަމުން ތިން ވަނަ ބައިގަ އަމިތު އަށް ވަނީ ބޮޑު ގޮންޖެހުމަކާ ކުރިމަތިލާންޖެހިފައެވެ. އަމިތުގެ އިތުރުން "ސަރްކާރް 3" އިން ފެނިގެންދާނީ ޔާމީ ގޯތަމް އަދި ޖެކީ ޝްރޯފް، މަނޯޖް ވަޖްޕާއީ އަދި ރޮނިތު ރޯއީއެވެ.