މާލެ ސިޓީގައި މި ދުވަސްވަރު ވައްކަން ކުރުން އިތުރުވެފައިވާތީ ފުލުހުންގެ ހައްސަ އޮޕަރޭޝަނެއް ހިންގަމުން އެބަދެ އެވެ.

ފުލުހުން ބުނީ، މިމަހުގެ 22 ވަނަ ދުވަހުން ފެށިގެން މި އޮޕަރޭޝަން ކުރިއަށް ގެންދާ ކަމަށެވެ. އަދި މި އޮޕަރޭޝަނަކީ، ވޭތުވެދިޔަ ދެ ހަފްތާގެ ތެރޭގައި މާލެ ސިޓީގައި ތަންކޮޅެއް ގިނައިން ވައްކަމުގެ މައްސަލަތައް ހުށަހެޅިފައި ވުމުންނާއި، އަދި ކުރިއަށް އޮތް އައު އަހަރަށް ކުށް މަދު ކުރުމުގެ ގޮތުން ހިންގާ އޮޕަރޭޝަނެއް ކަމަށެވެ.

ފުލުހުން ބުނީ، މި އޮޕަރޭޝަނަކީ ރަށުތެރެ ރަނގަޅަށް ބެލެހެއްޓުމަށްޓަކައި ކުރިއަށް ގެންދާ އޮޕަރޭޝަނެއް ކަމަށާއި މި އޮޕަރޭޝަނުގެ ތެރެއިން މީހުން ހުއްޓުވައި، ސުވާލުކުރުމާއި އަދި އުޅަނދުފަހަރު ހުއްޓުވައި ބަލާ ފާސްކުރުން ހިމެނޭނެ ކަމަށެވެ.

މިދުވަސް ވަރަކީ ސުކޫލްތަކުގެ ބޮޑު ޗުއްޓީ ދުވަސްވަރު ކަމަށްވާތީ، މާލޭގައި ދިރިއުޅޭ ގިނަ ބަޔަކު، ރާއްޖޭގެ އެކި ރަށްރަށާއި ރައްޖެއިން ބޭރަށް އެކިއެކި ބޭނުންތަކުގައި ދާ ދުވަސްވަރެއް ކަމަށްވާތީ އާންމުކޮށް މިދުވަސްވަރު ވައްކަމުގެ މައްސަލަތައް އިތުރުވެ އެވެ.

މީގެއިތުރުން، ކޮންމެ އަހަރެއްގެ އައު އަހަރު ފާހަގަ ކުރުމަށްޓަކައި، އެކި ފަރާތްތަކުން ހިންގާ ހަރަކާތްތަކާއި ގުޅިގެންވެސް، ކުށްކުރުން މަދު ކުރުމަށް ނުވަތަ ހުއްޓުވުމަށްޓަކައި މީގެކުރިންވެސް ފުލުހުން ހާއްސަ އޮޕަރޭޝަންތައް ހިންގާފައި ވެއެވެ.