ފަތުރުވެރިންނަށް ހާއްސަކޮށްގެން ހެދި ރެސްޓްރޫމް ސިޓީ ކައުންސިލާ ހަވާލުކޮށްފި
މިތަނުގައި 7 އާންމު ފާހާނާ، 1 ހާއްސައެހީއަށް ބޭނުންވާ ފާހާނާ އަދި ފެންވަރާ ތަނާއި ރީތިވާ ތަން ހިމެނޭ
މަސްވެރިންގެ ޕާކުގައި ހެދި ރެސްޓް ރޫމްގެ ތަޅުދަނޑި މާލެ ސިޓީ ކައުންސިލްގެ މޭޔަރު ޝިފާ (ކ) އާއި އެމްޑަބްލިއުއެސްސީގެ އެމްޑީ އާޒިމް (ވ) ހަވާލުކޮށްދެއްވަނީ
ރާއްޖެ އަންނަ ފަތުރުވެރިންގެ ތެރެއިން މާލެއަށް ޒިޔާރަތްކުރާ ފަތުރުވެރިންނަށް ޚާއްޞަކޮށްގެން މަސްވެރިންގެ ޕާކުގައި ތަރައްޤީކުރި ރެސްޓްރޫމް އެމްޑަބްލިއުއެސްސީން ސިޓީ ކައުންސިލާ ޙަވާލުކޮށްފިއެވެ.
މާލޭގެ އާޘާރީ ތަންތަން ބަލާލުމަށާއި އެކިއެކި ބޭނުންތަކުގައި މާލެ އަންނަ ފަތުރުވެރިންނަށް ޢަމާޒުކޮށްގެން އެމްޑަބްލިއުއެސްސީގެ ސީއެސްއާރް ޕރޮގުރާމުގެ ދަށުން ހެދި ރެސްޓް ރޫމް މާލެ ސިޓީ ކައުންސިލާ ޙަވާލުކޮށްފައިވަނީ ހޯމަ ދުވަހު މަސްވެރިންގެ ޕާކުގައި ބޭއްވި ޚާއްޞަ ރަސްމިއްޔާތެއްގައެވެ. އެގޮތުން މަސްވެރިންގެ ޕާކުގެ ނަމުން ނަންދީފައިވާ މި ރެސްޓް ރޫމްގެ ތަޅުދަނޑި މާލެ ސިޓީ ކައުންސިލުގެ މޭޔަރ ޝިފާ މުޙައްމަދާއި ޙަވާލުކޮށްދެއްވީ އެމްޑަބްލިއުއެސްސީގެ މެނޭޖިންގ ޑިރެކްޓަރ އާދަމް އާޒިމެވެ.
މީޑިއާއަށް މަޢުލޫމާތު ދެއްވަމުން މާލެ ސިޓީ ކައުންސިލުގެ މޭޔަރ ޝިފާ ވިދާޅުވީ މިތަން ވެގެންދާނީ ފަތުރުވެރިން ލަފާ ފުރުމުގައި ވަރަށް މުހިންމު ތަނަކަށް ކަމަށެވެ. އަދި އެތަނުން ފަތުރުވެރިންނަށް ބޭނުންވާ މަޢުލޫމާތާއި މާލޭގައި ހުރި އާޘާރީ ތަންތަނާއި ކައިރި ރަށްރަށް ދަތުރުކުރާ ފެރީގެ މަޢުލޫމާތުގެ އިތުރުން މާލެއިން ދެވެން ހުންނަ ރަށްރަށުގެ މަޢުލޫމާތު އެތަނުން ލިބޭނެ ގޮތަށް ހަމަޖެހިގެންދާނެ ކަމަށެވެ.
ޝިފާ ވިދާޅުވީ ރެސްޓްރޫމުން އަގު ނެގުމާ މެދު ވަކި ގޮތެއް ނުނިންމާ ކަމަށާއި، އެކަން ނިންމާނީ ކައުންސިލް ބައްދަލުވުމުން ކަމަށެވެ. އަދި އެތަން ހިންގަން ބޭނުންވާ ފަރާތްތަކަށް އެ ފުރުސަތު ހުޅުވާލާފައިވާނެ ކަމަށާއި، ވަރަށް ގިނަ ބަޔަކު އެކަމަށް ޝައުގުވެރިކަން ފާޅުކުރަމުންދާ ކަމަށެވެ.
އެމްޑަބްލިއުއެސްސީގެ އެމްޑީ އާޒިމް ވިދާޅުވީ އެކި ބޭނުންތަކުގައި 3000 އާ ގާތްކުރާ ޢަދަދަކަށް ދުވާލެއްގެ މައްޗަށް މާލެއަށް ފަތުރުވެރިން ޒިޔާރަތްކުރާ ކަމަށާއި، ނަމަވެސް އެ ފަރާތްތައް ފާޚާނަކޮށް މަޑުކޮށްލާނެ ތަނެއް ނެތް ކަން ފާހަގަކުރެވޭ ކަމަށެވެ. އަދި ރެސްޓް ރޫމާއެކު އެކަން މަގުފަހިވެގެން ދާނެ ކަމަށާއި، މީގެ ކުރިން އެފަދަ ވަޞީލަތެއް ނެތުމަކީ ލަދުވެތި ކަމެއް ކަމަށެވެ.
މިއީ ފަތުރުވެރިންނަށް ޚާއްޞަކޮށްގެން މާލޭގައި ފުރަތަމަ ފަހަރަށް ހެދި ފާޚާނާ ބަރިއެވެ. 7 ފާޚާނާއާއި ޚާއްޞަ އެހީއަށް ބޭނުންވާ މީހުން ފެންވެރުމާއި ފާޚާނާ ކުރުމަށް ހަދާފާއިވާ ފާޚާނާއަކާއި 2 ފެންވަރާ ތަނާއި އަދި މޫނު ދޮވެ ރީތިވުމަށް ބޭނުންކުރެވޭނެގޮތަށް ހަދާފައިވާ ރެސްޓް ރޫމް ބައިގައި ކުޑަ އޮފީހަކާއި ވެއިޓިންގ އޭރިއާއެއް ހިމެނޭ ގޮތަށް ތަރައްޤީ ކުރި މިތަން ހިންގަން ނިންމާފައިވަނީ ބިޒްނަސް މޮޑެލްއަކަށް ކަމަށް ސިޓީ ކައުންސިލުން މަޢުލޫމާތުދެއެވެ.
