ޤާސިމްގެ ޤާތިލު ނިސްބަތްވަނީ ޅ. ހިންނަވަރަށް!
22 ޑިސެމްބަރު 2019 | އާދީއްތަ 19:22އޭނާގެ ބަންދަށް ކްރިމިނަލް ކޯޓުން ވަނީ 15 ދުވަހުގެ މުއްދަތެއް ޖަހާފައި
ޤާސިމް ހަސަން
ތޫނު އެއްޗަކުން ހަމަލާދީ މަރާލި ޓެކްސީ ޑްރައިވަރު ގާސިމް ހަސަންގެ ޤާތިލަކީ ޅ. ހިންނަވަރު މީހެއްކަން ހާމަވެއްޖެ އެވެ.
ޤާސިމް މެރުމުގެ ކުށަށް ޅ. ހިންނަވަރު ބޮޑުހިޔާގޭ އަދުޙަމް މުހައްމަދު އިއުތިރާފު ވެެފައިވާއިރު، އޭނާގެ ބަންދަށް ކްރިމިނަލް ކޯޓުން ވަނީ 15 ދުވަހުގެ މުއްދަތެއް ޖަހާފައެވެ. އެގޮތުން 20 ޑިސެންބަރު 2019 އިން ފެށިގެން 04 ޖެނުއަރީ 2019 ގެ ނިޔަލަށް ބަންދުގެ މުއްދަތު ވަނީ ޖަހާފައެވެ.
ކްރިމިނަލް ކޯޓުން ބުނީ، މި މައްސަލައިގައި ބަންދާއިމެދު ގޮތެއް ނިންމުމަށް ބޭއްވުނު މަޖިލީހުގައި އޭނާ ޤާސިމް މެރުމުގެ ކުށަށް އިއުތިރާފުވެ ބަޔާނުގައި ސޮއިކޮށްފައިވާ ކަމަށެވެ. އެގޮތުން މި މައްސަލައިގެ ބާވަތުން އޭނާ ބަންދުން ދޫކޮށްލައިފިނަމަ މުޖުތަމައުގެ ސަލާމަތާއި އަމާންކަމަށް ބުރޫއަރާފާނެ ކަމަށް ބެލެވޭ ކަމަށް ކޯޓު އަމުރުގައި ބުނެފައިވެއެވެ.
މި މައްސަލައާއި ގުޅިގެން އޭނާ ހައްޔަރުކޮށްފައިވަނީ މިދިޔަ ބުރާސްފަތި ދުވަހުއެވެ. އަދި އޭނާގެ އިނގިލީގެ ނިޝާނާއި، ގާސިމް މަރާލަން ބޭނުންކުރި ހަތިޔާރުން ފެނުނު އިނގިލީގެ ނިޝާނާ ދިމާވެފައިވާ ކަމަށް ވަނީ މައުލޫމާތު ލިބިފައެވެ.
އޭގެ އިތުރުން، އޭނާ ކުށަށް އިއުތިރާފް ވެފައިވާކަން ހާމަކުރައްވާ ކޮމިޝަނަރ އޮފް ޕޮލިސް މުހައްމަދު ހަމީދު ކުރެއްވި ޓްވީޓްގައި ވިދާޅުވީ، އޭނާ ފުލުހުންގެ ތަހުގީގަށް އެއްބާރުލުން ދެމުން އަންނަ ކަމަށެވެ. ގާސިމް ހަސަން މެރުމަށް ބޭނުންކުރި ހަތިޔާރު ފެނިފައިވަނީ އޭނާގެ ހަށިގަނޑު ފެނުނު ސަރަޙައްދާއި 300 މީޓަރު ދުރުން ކަމަށާއި، އެ ސަރަޙައްދުން ފުލުހުންނަށް މި މައްސަލައިގެ ތަޙުޤީޤާއި ގުޅުންހުރި މުހިއްމު ހެކިތަކެއް ލިބިފައިވާ ކަމަށް ހަމީދު ކުރެއްވި ޓްވީތެއްގައި ވިދާޅުވެފައިވެއެވެ. އެގޮތުން މައްސަލައާއި ގުޅުންހުރި ފިންގަރ ޕްރިންޓާއި ޑީއެންއޭ ފެނިފައިވާކަމަށް ހަމީދު ވިދާޅުވެފައިވެއެވެ.
އުމުރުން 59 އަހަރުގެ ގާސިމް މަރާލާފައި އޮއްވާ ފެނިފައިވާކަމުގެ ރިޕޯޓް ފުލުހުންނަށް ލިބިފައިވަނީ ޑިސެމްބަރު މަހުގެ ހަތަރު ވަނަ ދުވަހުގެ ރޭގަނޑުގެ ވަގުތެއްގައި ހުޅުމާލެއިންނެވެ. ގާސިމް މަރުވެފައިވަނީ، ގާތިލް އޭނާގެ ކަރަށް ވަޅި ހެރުމާ ގުޅިގެންނެވެ.
ސީންގައި ހަރަކާތްތެރިވި ބައެއް ފުލުހުންގެ ފަރާތުން ލިބިފައިވާ މައުލޫމާތުތަކަށް ބަލާއިރު، ގާސިމްއަށް ހަމަލާދީފައިވަނީ ކާރުގެ ތެރޭގައި ހުއްޓާ ކަމަށް ބެލެވޭ ކަމަށެވެ. ކާރުގެ ތެރެއިންވެސް ފުލުހުންނަށް ލޭ ފެނިފައިވެއެވެ.
