ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ގެ ޓެކްނިކަލް ޑިރެކްޓަރގެ މަގާމަށް ބާސެލޯނާ އެކަޑަމީ ކަމަށްވާ ލަ މާސިއާގައި ގިނަ ދުވަސްތަކެއްވަންދެން މަސައްކަތްކުރި އިންގްލޭންޑްގެ ކޯޗު ޖުޑާން އަލީ ހަމަޖައްސައިފިއެވެ.

އެފްއޭއެމްގައި ހޮނިހިރު ދުވަހުގެ ހަވީރު އޮތް ރަސްމިއްޔާތުގައި ޖުޑާން ވަނީ މި މަގާމާއި ހަވާލުވެ މަގާމުގެ އެއްބަސްވުމުގައި ސޮއި ކޮށްފައެވެ.

އެފްއޭއެމްގެ ރައީސް ބައްސާމް އަދީލް ޖަލީލް ވިދާޅުވީ އެފްއޭއެމްއިން ބޭނުންވާ މަންޒިލަށް އެފްއޭއެމްގެ ކަންކަން ގެންދިޔުމަށް ޖުޑާން އެހީވެދެއްވާނެ ކަމަށާއި ޖުޑާން އަކީ ތަޖުރިބާކާރު ބޭފުޅެއް ކަމަށާއި އެފްއޭއެމްގެ ވިސްނުމާއި އޭނާގެ ވިސްނުން އެއްގޮތް ވުމަކީ އޭނާ އާއި މި މަގާމް ހަވާލުކުރި އެއް ސަބަބު ކަމަށެވެ. ޖުޑާންގެ މަސައްކަތަކަށް ވަނީ ޒުވާން ކުޅުންތެރިން ބިނާ ކުރުން ކަމަށާއި ފުޓުބޯޅަ ކުރިއެރުވުމަށް މަސައްކަތް ކުރުމުގެ އިތުރުން ލީގު ވަރުގަދަ ކުރުމަށް އިރުޝާދު ދިނުން ކަމަށެވެ.

މަގާމާއި ހަވާލުވުމަށްފަހު ޖުޑާން ވިދާޅުވީ އޭނާގެ މައިގަނޑު މަސައްކަތް އިނގޭ ކަމަށާއި މިހާތަނަށް މިކަހަލަ ކިތަންމެ ފުރުސަތެއް ލިބިފައިވާ ކަމަށާއި ނަމަވެސް މި ފުރުސަތު އޭނާ އަށް ދޫކޮށްލެވެން ނެތް ކަމަށެވެ. ރާއްޖޭގެ ފުޓުބޯޅަ މިހާރު މި އޮތް ހަރުފަތުން އެހެން ހަރުފަތަކަށް ގެންދިޔުމަކީ ޗެލެންޖެއް ކަމަށާއި އެހެން ނަމަވެސް މި ޗެލެންޖާއި ކުރިމަތިލާން އޭނާ ހުރީ ތައްޔާރަށް ކަމަށެވެ.

އެފްއޭއެމްގެ ޓެކްނިކަލް ޑިރެކްޓަރގެ މަގާމަށް ޖުޑާން މި ހަމަޖައްސަނީ އެމަގާމުގައި ކުރިން ހުރި އިހުސާން އަބްދުއްޣަނީ (ސާންތީ) މަގާމުން އިސްތިއުފާ ދިނުމާއި ގުޅިގެންނެވެ. މައުލޫމާތު ލިބުނު ގޮތުގައި ސާންތީ މަގާމުން އިސްތިއުފާ ދިނީ މަގާމުން ވަކި ކުރުމުގެ ނޯޓިސް ލިބުމާއި ގުޅިގެންނެވެ.

ބާސެލޯނާ އެކެޑަމީގައި 10 އަހަރު މަސައްކަތްކުރި ޖުޑާން އަކީ ޔޫއެފާ އޭ ލައިސަންސްގެ ކޯޗެކެވެ. މީގެ ކުރިން އޭނާ ވަނީ 2013 ވަނަ އަހަރު ޓައިވާން ފުޓްބޯލް އެސޯސިއޭޝަނުގެ އެލީޓް ޑިވެލޮޕްމެންޓްގެ ހެޑެއްގެ ގޮތުގައި މަސައްކަތް ކޮށްފައެވެ. އަދި އޭނާ ވަނީ މީގެ ކުރިން އިނގިރޭސި ޕްރިމިއާ ލީގުގެ ބްލެކްބާން ރޯވާސްގެ ކޯޗިން ޕްރޮގްރާމްތަކެއްގައި ބައިވެރިވެފައެވެ.

ޖުޑާން ވަނީ 2011 ވަނަ އަހަރު ރާއްޖޭގެ ގައުމީ ފުޓުބޯޅަ ޓީމުގެ ކޯޗުގެ މަގާމާއި ހަވާލުވާން ޕްރޮޕޯސަލް ހުށައަޅައިފައެވެ.