ދިރާގު ދިވެހި ޕްރިމިއަރ ލީގުގައި ފަސޭހަ ކަމާއެކު ކްލަބް ގްރީން ސްޓްރީޓުން ޔުނައިޓެޑް ވިކްޓްރީ ބަލިކޮށްފިއެވެ.

ގަލޮޅު ރަސްމީ ބޯޅަ ދަނޑުގައި ހޮނިހިރު ދުވަހުގެ ރޭގަނޑު ކުޅުނު މި މެޗު ގްރީން ސްޓްރީޓުން ކާމިޔާބުކުރީ 5-0 ގެ ނަތީޖާ އަކުންނެވެ.

މެޗު ފަށައިގެން ގްރީން ސްޓްރީޓުން އެޓީމުގެ ވަރުގަދަ އެޓޭކިންގް ލައިނުގެ ބޭނުން ހިފައި ޔޫވީގެ ގޯލަށް ނުރައްކާ ކޮށްފައިވެއެވެ. އެގޮތުން މެޗުގެ ތިން ވަނަ މިނެޓުގައި ގްރީނުން ވަނީ ލިބުނު ޕެނަލްޓީގެ ބޭނުން ހިފާ ލަނޑު ޖަހާ ލީޑު ނަގާފައެވެ. މި ލަނޑު އެޓީމަށް ކާމިޔާބު ކޮށްދިނީ އިތުބާރު ފޯވަރޑް ކެޕްޓަން އަލީ އަޝްފާގް (ދަނގަޑޭ) އެވެ. މި ލަނޑަފަހު ވެސް ގްރީނުން ވަނީ ފުލުފުލުގައި ޔޫވީގެ ގޯލަށް ހަމަލާތައް ފޮނުވައިލައިފައެވެ. އެގޮތުން ގްރީންގެ ދެވަނަ ލަނޑު މެޗުގެ 17 ވަނަ މިނެޓުގައި އެޓީމުން ކާމިޔާބުކުރި އިރު މި ލަނޑަކީ ޔޫވީގެ ކުޅުންތެރިންގެ އަތުން ބައިކޮޅަށް ވަތް ލަނޑެކެވެ.

މެޗުގަ ގްރީނުން ކާމިޔާބުކުރި ތިން ވަނަ ލަނޑު މެޗުގެ 14 ވަނަ މިނެޓުގައި އެޓީމުން ކާމިޔާބުކުރި އިރު މި ލަނޑު ވެސް އެޓީމަށް ކާމިޔާބުކޮށްދިނީ ކެޕްޓަން އަލީ އަޝްފާގް (ދަނގަޑޭ) އެވެ. މެޗުގައި ގްރީނުން ކާމިޔާބުކުރި ހަތަރުވަނަ ލަނޑު މެޗުގެ 26 ވަނަ މިނެޓުގައި އެޓީމަށް ކާމިޔާބު ކޮށްދިނީ ތަޖުރިބާކާރު މިޑްފީލްޑަރ މުހައްމަދު އުމެއިރު އެވެ. ގްރީނުން ވަނީ މެޗުގެ ފުރަތަމަ ހާފު ނިމުމުގެ ކުރިން އެޓީމުގެ ފަސްވަނަ ލަނޑު ވެސް ކާމިޔާބު ކޮށްފައެވެ. މި ލަނޑު މެޗުގެ 39 ވަނަ މިނެޓުގައި އެޓީމަށް ކާމިޔާބު ކޮށްދިނީ ރިހާމް އަބްދުލް ޣަނީ (ބޮބީ) އެވެ.

މި މެޗުގެ ދެ ވަނަ ހާފުގައި ދެ ޓީމުގެ ފަރާތުން ވެސް ފެނިގެންދިޔައީ ހަމަހަމަ ކުޅުމެކެވެ. އެގޮތުން ދެވަނަ ހާފުގަ ވެސް ގްރީނުން ވަނީ ލަނޑު ޖަހާނެ ފުރުޞަތުތައް ތަނަވަސް ކޮށްފައެވެ. ނަމަވެސް ގްރީންގެ ކުޅުންތެރިން ފޮނުވާލި ހަމަލާތައް ޔޫވީގެ ކީޕަރު ވަނީ ހުޝިޔާރު ކަމާއި އެކު ދިފާއު ކޮށްފައެވެ.

މި މެޗުގެ މޮޅު ކުޅުންތެރިޔަކަށް ހޮވުނީ ގްރީންގެ ކެޕްޓަން އަލީ އަޝްފާގް (ދަނގަޑޭ) އެވެ.