ސީޕްލޭން ޓާމިނަލް މިހާރު ހިންގާ ގޮތަށް ހިންގުމަށް ދޫކޮށްލުމަކީ ކޮރަޕްޝަން: ޔައުގޫބު
21 ޑިސެމްބަރު 2019 | ހޮނިހިރު 04:42އާ ޓާމިނަލް ވެސް އެގޮތަށް ހިންގަމުން ގޮސް ތިން އަހަރުގެ ތެރޭގައި އެމްއޭސީއެލްއާ އެއްކޮށް ހަވާލުވާނެ
ވެލާނާ އިންޓަރނޭޝަނަލް އެއަރޕޯޓުގެ އާ ސީޕްލޭން ޓާމިނަލް
ވެލާނާ އިންޓަރނޭޝަނަލް ޓާމިނަލްގައި ހިންގަމުން އަންނަ ސީޕްލޭން ޓާމިނަލް މިހާރު ހިންގަމުން އަންނަ ގޮތަށް ހިންގުމަށް ދޫކޮށްލުމަކީ ކޮރަޕްޝަން ކަމަށް ދާންދޫ ދާއިރާގެ މެންބަރު ޔައުޤޫބް ޢަބްދުﷲ ތުހުމަތު ކުރައްވައިފިއެވެ.
ސީޕްލޭން ޓާމިނަލް މިހާރު ހިންގަމުން އަންނަނީ ސީ ޕްލޭންތައް އޮޕަރޭޓް ކުރާ އެކި ކުންފުނިތައް ގުޅިގެންނެވެ. އަދި އާ ޓާމިނަލް ވެސް އެގޮތަށް ހިންގަމުން ގޮސް ތިން އަހަރުގެ ތެރޭގައި އެމްއޭސީއެލްއާ އެއްކޮށް ޙަވާލުވާނެ ކަމަށް އެމްއޭސީއެލްގެ އެކްޓިން މެނޭޖަރު މޫސާ ޞާލިޙު ވަނީ ވިދާޅުވެފައެވެ.
މިކަމާއި ގުޅިގެން ޔައުޤޫބް ކުރެއްވި ޓްވީޓެއްގައި ވިދާޅުވީ މުޅި ޤައުމުގެ ފޯކަސް ވަކިކަމަކަށް ހުއްޓިފައިވާ ވަގުތެއްގައި އަދި ސީޕްލޭން ޓާމިނަލްގެ މައްސަލަ މަޖިލީހުން ބަލަމުންދާ ދަނޑިވަޅެއްގައި އަދި މަޖިލިސް ޗުއްޓީގައި އޮއްވާ އެޓާނީ ޖެނެރަލް އޮފީހުގެ ލަފަޔާ ޚިލާފަށް ސީޕްލޭން ޓާމިނަލް ވަކިބަޔަކަށް ފައިދާވާނެހެން ދޫކޮށްލުމަކީ ބޮޑުވެގެންވާ ކޮރަޕްޝަނެއް ކަމަށެވެ.
އެއަރޕޯޓުގެ އިރުމަތީ ފަރާތުގައި އޮންނަ ފަޅު ހިއްކައިގެން ހަދާ އާ ޓާމިނަލް ހެދުމުގެ ގޮތުން 18،000 އަކަމީޓަރުގެ ޞަރަޙައްދެއް، ވަނީ ހިއްކާފައެވެ. އޭގެ އިތުރުން ސީ ޕްލޭންގެ ހެނގަރު ހެދުމަށް 14،000 އަކަމީޓަރު ބިން ހިއްކާފައިވެއެވެ.
އާ ސީ ޕްލޭން ޓާމިނަލްގެ މަސައްކަތް ކުރިއަށް ގެންގޮސްފައިވަނީ ޗައިނާގެ ބެއިޖިން އާބަން ކޮންސްޓްރަކްޝަން ގްރޫޕް (ބީޔޫސީޖީ) އާ ޙަވާލުކޮށްގެންނެވެ. އެ މަޝްރޫއު އެ ކުންފުންޏާ ހަވާލުކޮށްފައިވަނީ 40 މިލިއަން ޑޮލަރަށެވެ.
