ލޮނުމިދިލިގޭ އޮޕަރޭޝަން: ދެ ކުޑަދެކުދިންނާއި، ތިން މީހެއްގެ ބަންދުގެ މުއްދަތު އިތުރުކޮށްފި
18 އަހަރު ނުފުރޭ ކުދިން ވަނީ ކޯޓުން ޝަރުތުކުރުމަށްފަހު ގޭބަންދަށް ބަދަލުކޮށްފައި
ލޮނިމިދިލިގެއިން ފުލުހުން ހޯދާފައިވާ މަސްތުވާތަކެތި ކަމަށް ބެލެވޭ ބައެއް ތަކެތި
ބުރާސްފަތި ދުވަހުގެ ރޭ ފުލުހުން ހިންގި ޑްރަގް ރެއިޑް އޮޕަރޭޝަނެއްގައި މ. ލޮނުމިދިލިގޭ ބަލައި ފާސްކޮށް ހައްޔަރު ކުރި މީހުންގެ ތެރެެއިން، ދެ ކުޑަކުއްޖަކާއި ތިން މީހެއްގެ ބަންދުގެ މުއްދަތު އިތުރުކޮށްފިއެވެ.
މި އޮޕަރޭޝަންގައި ހައްޔަރުކޮށްފައިވަނީ ހަތަރު ކުޑަކުދިންނާއި ދެ ދިވެހި ފިރިހެނުން، އަދި ދިވެހި އަންހެނަކާއި އެކު ބިދޭސީ ފިރިހެނެކެވެ. މީ މީހުންގެ ތެރޭގައި ދެމަފިރިއަކުވެސް ހިމެނެއެވެ.
ލޮނުމިދިލިގެއިން ހައްޔަރު ކުރި މީހުންގެ ތެރެއިން 18 އަހަރު ނުފުރޭ އެއް ކުއްޖަކަށް ކޯޓުން ޝަރުތު ކުރުމަށްފަހު ފަސް ދުވަހަށް ގޭބަންދުކޮށްފައިވާއިރު، އަނެއް ކުއްޖާއަށް ވަނީ ޝަރުތުކުރުމަށްފަހު ދިހަ ދުވަހަށް ގޭބަންދު ކޮށްފައެވެ.
ދޫކޮށްލާފައިވާ ދެމަފިރިންގެ އަތުން މަސްތުވާތަކެތި ފެނިފައިނުވާތީ،އެމީހުން ކޯޓަށް ގެންދެވިފައެއް ނުވެއެވެ. ބަންދުކުރި ހަތަރު މީހުންގެ ބަންދަށް ކޯޓުން ވަނީ 10 ދުވަހުގެ މުއްދަތު ދީފައިކަމަށް ފުލުހުން މައުލޫމާތު ދެއެވެ.
ފުލުހުން ހިންގި މި އޮޕަރޭޝަންގައި މަސްތުވާތެކެތި ކަމަށް ބެލެވޭ 20 ރަބަރު ޕެކެޓާއި އެކި އެކި ގައުމުތަކުގެ ފައިސާ ހޯދާފައި ވެއެވެ. އެއީ 38715 ދިވެހި ރުފިޔާ، 142 އެމެރިކާ ޑޮލަރު، 15 ޗައިނީސް ޔުއާން، 10 ސިންގަޕޯރ ޑޮލަރު، 40 ތައި ބާތް، ކުވެއިތު ދީނާރަކާއި ސައުދީ ރިޔާލެއްގެ އިތުރުން ކުރީގެ ދިވެހި ރުފިޔާ ނޫޓުގެ ފަސް ރުފިޔާއެވެ. މި ފައިސާގެ ޖުމްލަ އަދަދު 41،127 ރުފިޔާއަށް އަރާ ކަމަށް ފުލުހުން ބުންޏެވެ.
މިފައިސާތައް ފެނިފައިވަނީ 18 އަހަރު ނުފުރޭ ކުޑަކުދިން ދިރިއުޅޭ ކޮޓަރި ތެރެއިން، އެތަނުން ކުއްޖެއްގެ ވޮލެޓުން ކަމަށް ފުލުހުން މައުލޫމާތު ދެއެވެ. ބަންދުކުރި ކުދިންގެ ތެރޭގައި މިކުއްޖޭ ހިމެނޭކަމެއް ފުލުހުން ކަށަވަރު ކޮށްދީފައެއް ނުވެއެވެ.
