ދީނަށް ފުރައްސާރަ ކުރިކަން އެމްޑީއެންއަށް ނޭގެންޏާ ބަޔަކު ކުރާނެ ކަމެއް ނެތް!!

އިންސާނީ ހައްގުތަކާއި ރާއްޖޭގައި ޑިމޮކްރެސީ ކުރިއެރުވުމުގެ ނަމުގައި އުފެއްދި މޯލްޑިވިއަން ޑިމޮކްރެސީ ނެޓްވޯކް (އެމްޑީއެން) އިން ވަނީ ފާއިތުވި އަހަރު ތަކުގައި އެކި ކަންތައްތަކުގައި އަޑު އުފުލާފައެވެ. ކުރީގެ ޖަލު އޮޑިޓް ކޮމިޝަންގެ މެމްބަރަކަށް ހުންނެވި ޝަހިންދާ އިސްމާއިލް އިސްވެ އުފައްދާފައިވާ މި ޖަމްއިއްޔާއިން ވަނީ މުޖުތަމައުގެ އެކި ކަހަލަ ކަންތައްތަކުގައި، ކެއަރ ސޮސައިޓީއާ، ޓްރާންސްޕޭރެންސީ މޯލްޑިވްސްގެ އިތުރުން އެހެނިހެން ޖަމްއިއްޔާ ޖަމާއަތްތަކާއި އެކު މަސައްކަތް ކޮށްފައެވެ.

ކޮންމެވެސް ވަރަކަށް ނޫސްތަކުގެ ސުރުހީންވެސް މި ޖަމިއްޔާގެ ވާހަކަތައް ފެނެއެވެ. މަދުން ނަމަވެސް އެ މީހުން ޑިމޮކްރެސީއަށް ކުރާ މަސައްކަތުގެ ވާހަކަތައް ނޫސްތަކުގައި ޝާއިއުކޮށް އުޅެއެވެ. ނަމަވެސް މި ބުނާ އެމްޑީއެންގެ ވާހަކަތައް މިފަހަކަށް އައިސް މާ ބޮޑަށް ތިލަވެގެން ދިޔައީ މި ޖަމްއިއްޔާއިން ދީނަށް ފުރުއްސާރާކޮށް، ދީނުގެ އުސޫލުތަކަށް ހަޖޫޖަހައި ކީރިތި ރަސޫލާ އަށް ކުޑައިމީސްކޮށް ލިޔުނު ރިޕޯޓަކާއި ގުޅިގެންނެވެ.

ރާއްޖޭގައި ދީނީ ހައްދުފަހަނައަޅާފައި އޮތް މިންވަރު ބެލުމަށް ހެެދި ދިރާސާ ރިޕޯޓް ''ރެޑިކަލައިޒޭޝަން އިން މޯލްޑިވްސް'' އަކީ އަހަރުތަކެއް ކުރިން ތައްޔާރު ކުރި ރިޕޯޓެކެެވެ. އެ ރިޕޯޓު ގިނަ ބަޔަކު ނުކިޔާތީ ނުވަތަ ރައްޔިތުން އޭރު އެހާ އިސްކަންދިން ރިޕޯޓަކަށް ނުވާތީވެ، އެ ރިޕޯޓުގެ ވާހަކަ މާ ގިނަ ބަޔަކު ދައްކާއެއް ނޫޅޭއެެވެ. ރިޕޯޓުގައި ހުރިކަންތައް ފެންމަތިވީ މި އަހަރުގެ ތެރޭގައި އޭގައި ލިޔެފައި ހުރި ބައެއް ވާހަކަތަކުގެ ސްކްރީންޝޮޓްތަކެއް ސޯޝަލް މީޑިއާގައި ލީކުވުމާއި ގުޅިގެންނެވެ.

މި ރިޕޯޓުގައި ލިޔެފައިވާ އެއްޗެއްސަށް ބަލާއިރު މީގައި އިސްލާމްދީނަށް ފުރުއްސާރަ ނުކުރަމޭ ކިތަންމެ ވަރަކަށް ބުންޏަސް އެއާ އެއްބަސްވާނެ ދިވެއްސަކު ނެތެވެ. އެ ކިޔައިފި ކޮންމެ މީހަކަށްވެސް އެ ރިޕޯޓުގައި އިސްލާމްދީނަށާއި، ކީރިތި ރަސޫލާއަށް ފުރުއްސާރަކޮށް ލިޔެފައި ހުރި ވާހަކަތައް ވަރަށްވެސް ސާފެވެ.

ދިވެހިރާއްޖެއަކީ ސައްތައިން ސައްތަ މުސްލިމުން އުޅޭ ގައުމަށްވީ ހިނދު އިސްލާމްދީނުގެ މަތިވެރި އަގީދާއަށާއި އެ ދީނުގެ އިޙްތިސާސްތަކަށް ހަޖޫޖަހާ ބަޔަކު އެއްޗެއް ނެރުމަކީ، ރައްޔިތުންގެ ލޭ ކެކޭނެ ކަމެކެވެ. އެހެން ނުވަންވީ ސަބަބެއްވެސް ނެތެވެ.

ރިޕޯޓު އާންމުވުމާއިއެކު މި ބުނާ ދީނަށް ފުރުއްސާރަކޮށް ރިޕޯޓު ނެރުނު މީހުން އޭގެ ދިފާއުގައި ނިކުތެވެ. އަދި ރައްޔިތުންގެ ތެރޭގައި އެމީހުންނަށް ރުޅިވެރިކަން އިތުރުވު، ނަފްރަތުކުރާން ފެށުމުން، އެމްޑީއެނުން ބުނީ އެއީ އެމީހުންނަށް ''އޮޅިގެން'' ކުރެވުނު ކަމެއް ކަމަށެވެ. އަދި ތަކުރާރު ނުވާނެ ކަމަށްވެސް ބުނެ ބަޔާނެއް ނެރުނެެވެ. އޭގެ އިތުރުން ދީނުގެ އަސްލުތަކާއި ހިލާފަށް ހުރި ވާހަކަތައް، އިލްމުވެރިއެއްގެ އެހީގައި އޭގައި ހުރި ކަންކަން ރަނގަޅުކުރާނެ ކަމަށެވެ. އެކަމަކު އެ ރާގު ބަދަލުވާން ސިކުންތެއްވެސް ނުނަގައެވެ.

ޓްވީޓަކަށް ފަހު ޓްވީޓް ކުރަމުން މި ޖަމްއިއްޔާއިން ބުނަން ފެށީ ރިޕޯޓުގައި ގޯސް މައުލޫމާތެއް ނޯއްނާނެ ކަމަށެވެ. އެ ހިސާބުން އެ ޖަމްއިއްޔާ އަށް ގޯސްވީ ދިވެހިންނެވެ. މި މީހުންނަށް ގޯސްވީ ސަރުކާރެވެ. ގޯސްވީ ދީނީ އިލްމުވެރިންނެވެ. ހުރިހާ ގޯހަކަށްވީ އިސްލާމިކް މިނިސްޓްރީ އެވެ. އަމިއްލަ ފަސްބައިގައި ހޭކިފައިހުރި، އެއްވެސް ހަޑިއެއް މިވެރިންނަށް ފެންނަ ކަމަކަށް ނުވިއެވެ.

އެމްޑީއެނުން ހީކޮށްގެން ތިވީ އެ މީހުންނަށް އެ މީހުންގެ ގޮތް ދޫނުކޮށް އެ ގޮތުގައި އަބަދުގެ އަަބަދަށް ތިބެވޭނެ ކަމަށެވެ. އެކަމަކު ޖަމްއިއްޔާގެ އަތްދަށު ސަރުކާރު ނުވާނެކަން އެނގިގެންދިޔައީ ޔޫތް މިނިސްޓްރީން މި ޖަމްއިއްޔާ އުވާލީމާއެވެ. އުވާލުމުން އަނެއްކާ މިހާރު މި ކިޔަނީ ދީނަށް ފުރުއްސާރާ ނުކުރާ ކަމަށެވެ.

އެމްޑީއެންގެ މެމްބަރުންނެވެ. މައްސަލަ އަކަށް ވެގެން މިއުޅެނީ ރިޕޯޓް ލިޔުމެއް ނޫނެވެ. މައްސަލަ އަކީ ދީނަށް ފުރުއްސާރަކޮށް ދީނުގެ ކަންތައްތަކަށް ހަޖޫ ޖެހުމެވެ. ގާނޫނީ އަސާސީގެ 27 ވަނަ މާއްދާގައި ބަޔާންކޮށްފައިވާ ހިޔާލުފާޅުކުރުމުގެ މިނިވަންކަން ކޮންމެ ދިވެހި ރައްޔިތަކަށް ލިބިގެންވެއެވެ. އެ މާއްދާގައި ބުނާ ގޮތުން، މިނިވަންކަން ފިކުރުކުރުމާއި، އިސްލާމްދީނުގެ އަސްލަކާ ހިލާފުނުވާ ގޮތެއްގެ މަތިން އެމީހެއްގެ ބުއްދިއަށް ފެންނަ ގޮތާއި، ހިޔާލުތައް ދުލާއި ގަލުމުން މިނޫންވެސް ގޮތްގޮތަށް ފާޅުކުރުމުގެ މިނިވަންކަން ކޮންމެ މީހަކަ ލިބިގެންވެއެވެ.

އެމްޑީއެނުން އެ ޖަމްއިއްޔާ އުވާލައިގެން ކަންބޮޑުވުމުގެ ކުރިން އެ މާއްދާއަށް ރިޔާއަތް ކުރެއްވުމުން ތިބުނާ ޖަވާބު ސާފުކޮށް ލިބިވަޑައިގަންނަވާނެ އެވެ. އެެމްޑީއެންއަަކަށް ވިޔަސް ދިވެހިރާއްޖޭގެ ގާނޫނު އަސާސީއަށް ވުރެ މަތީގައި ނުތިބެވޭނެއެވެ. ރިޕޯޓުގައި ކިތަންމެ ވަރަކަށް އިސްލާމްދީނާ ދެކޮޅު ވާހަކައެއް ނެތޭ ބުންޏަސް އިންސާނީ ހައްގުތަކަށް މަސައްކަތް ކުރާ ޖަމްއިއްޔާއިން އެއޮތީ އެކަން ކޮށްފައެެވެ. އެއީ އޮޅުމެއްގެ ތެރެއިން ކުރެވުނު ކަމެއް ނޫނެވެ. ކުރެވުނު ކަމެއް ސާފު ނުވަންޏާ އޭގައި ބަޔަކު ކުރާނެ ކަމެއް ނެތެވެ.